O Concello de Segovia, a través da Empresa Municipal de Turismo, porá en marcha en 2009 unha nova iniciativa baseada no turismo idiomático pola cal se desenvolverán diversos cursos de español para estranxeiros, impartidos por academias de idiomas e institucións universitarias, que ofrecerán cursos de español especializados e combinados con diversas actividades de ocio.

Fonte: Norte Castilla

O Síndic de Greuges volve instar o Concello de Alacant a utilizar as dúas linguas oficiais da Comunidade Valenciana. E nesta ocasión refírese aos contidos da páxina web municipal. A resolución da Sindicatura prodúcese tras a denuncia dun cidadán na que pon de manifesto que a web estaba redactada exclusivamente en castelán, polo que "se vulnera a cooficialidade lingüística vixente na Comunidade".

Fonte: Las Provincias

A ameaza dunha folga xeral en todo o sistema educativo público non universitario, o próximo mércores 17, acabou por incidir na Generalitat Valenciana. A 48 horas de que os colexios e institutos valencianos corran o risco de "baleirarse" de alumnos e profesores, a Consellería de Educación pisou por fin o acelerador en busca dun "acordo consensuado" con todos os sectores do ensino público integrados na Plataforma per l'Ensenyament Públic.

Fonte: El País

O Pleno Municipal do Concello de Xixón aprobou por unanimidade a creación do Conceyu Asesor de la Llingua Asturiana e os seus estatutos co fin de traballar para impulsar a toponimia tradicional do municipio, así como fomentar a cultura e a llingua asturianas no concello.

Fonte: Europa Press

Unha presenza física permanente do Instituto Camões en Madrid sería moi importante para a dinamización do portugués, na opinión da directora do Instituto Cervantes.

Fonte: RTP

O vicepresidente do Goberno catalán, Josep-Lluís Carod-Rovira, presidiu o pasado luns día 15 de decembro o acto de celebración do vinte aniversario do Consorci per la Normalització Lingüística (CPNL) durante o cal destacou a aposta do executivo por esta “entidade de proximidade no terreo” que é “todo un referente”.

Fonte: Generalitat de Catalunya

"O Nadal e os xoguetes adoitan ser sempre fontes de ledicia. Que mellor que atraer os máis novos ao éuscaro a través desa ilusión". As palabras de Xanti Jaka, portavoz de Elkar Fundazioa, definen o espírito co que botou a andar a novena edición da campaña Euskara da oparirik onena -O éuscaro é o mellor dos agasallos-, que percorrerá sete municipios guipuscoanos co obxectivo de promover os produtos en lingua vasca nas compras do Nadal.

Fonte: Noticias de Gipuzkoa

Documentais, dramas, obras románticas e versións cinematográficas de clásicos da literatura traducidos á lingua de signos española serán algunhas das proxeccións que poderán verse no Círculo de Bellas Artes de Madrid ata o día 21 de decembro, no Festival de Cine Documental, Curtametraxes e Vídeo-Arte Accesible de Persoas Xordas.

Fonte: EcoDiario

Microsoft anunciou o lanzamento en catalán dos seus servizos de Windows Live entre os que se inclúe o popular sistema de mensaxería instantánea Messenger. O xestor de correo Live Hotmail estará dispoñible en catalán en febreiro, cando a multinacional prevé concluír o despregue de Windows Live neste idioma.

Fonte: La Vanguardia

Todos os grupos políticos con representación no Conselh Generau de la Vall d’Aran aprobaron unha moción que insta a Unesco a proclamar a lingua occitana como Patrimonio da Humanidade. Deste xeito, o Conselh dá soporte á iniciativa da entidade occitana Chambra d’Òc, que está a levar a cabo unha campaña no mesmo sentido desde hai meses.

Fonte: móndivers