España
O Concello de Montcada i Reixac pon a disposición da cidadanía unha ferramenta para queixas relacionadas cos dereitos lingüísticos
O Concello de Montcada i Reixac habilitou a Bústia polo Catalán, unha canle para comunicar vulneracións dos dereitos lingüísticos, formular propostas e solicitar información sobre o idioma. A ferramenta permitirá trasladar incidencias relacionadas coa ausencia do catalán na sinalización, na documentación, nos espazos dixitais ou na atención ao público.
Fonte: Diari de la Llengua
Un proxecto recompila o dominio .eus, referente dixital da lingua e a cultura vascas en internet
A Biblioteca Nacional de España e a Biblioteca Dixital de Euskadi completaron por cuarto ano a captura masiva do dominio .eus, co propósito de conservar o patrimonio dixital vinculado á lingua e á cultura vascas. A campaña permitiu arquivar máis de 15.500 páxinas web, que suman máis de nove terabytes de información. Esta colaboración garante que os contidos publicados na Rede poidan consultarse no futuro con fins de investigación, documentación e memoria cultural.
Fonte: Gobierno Vasco
Ponse en marcha unha nova edición de cursos intensivos para reforzar a aprendizaxe de catalán entre a mocidade durante o verán
Barcelona ofrece este verán sete cursos intensivos de catalán a 143 estudantes da ESO incorporados ás Aulas de Acollida Acelerada, co propósito de consolidaren os coñecementos adquiridos durante o curso. A formación, gratuíta e complementada con actividades culturais, busca evitar a perda de competencia lingüística durante as vacacións e facilitar a inclusión do alumnado procedente doutros países. A iniciativa tamén pretende reforzar a continuidade educativa e previr o abandono escolar.
Fonte: Diari de la Llengua
Ponse en marcha unha campaña para animar a mocidade a manter o catalán
O CIEMEN puxo en marcha unha campaña dirixida á mocidade para favorecer que manteña o catalán nas conversas cotiás e exerza con normalidade os seus dereitos lingüísticos. A iniciativa, difundida mediante vídeos breves nas redes sociais, ofrece pautas para evitar o cambio automático de idioma cando a outra persoa se expresa noutra lingua. Con esta acción, a entidade pretende frear o descenso do uso social do catalán entre as novas xeracións e reforzar o seu valor como instrumento de cohesión e participación.
Fonte: Diari de la Llengua
O Concello de Pamplona convoca un ano máis o seu certame literario en éuscaro
O Concello de Pamplona convocou a 36.ª edición do Certame Literario en Éuscaro para autoría novel, con modalidades de poesía e narrativa. Poderán participar persoas nacidas ou residentes en Navarra con obras inéditas e de temática libre, que deberán presentar antes do 26 de outubro. A convocatoria, dotada con 9000 euros, establece tres premios por categoría e varias mencións.
Fonte: Iruñeko Udala
A Universidade Asturiana de Verán organiza un curso sobre IA aplicada ao ensino do asturiano
A UABRA ofrece por segundo ano unha programación estival centrada na lingua asturiana. As 50 persoas matriculadas poderán formarse no uso da intelixencia artificial aplicada á creación de materiais didácticos nesta lingua, así como preparar o nivel C1 para as probas de outubro ou afondar na presenza do movemento obreiro na literatura asturiana.
Fonte: RTPA
Duplícase o número de sancións a comercios por non cumprir a normativa de uso do catalán
A Axencia Catalá de Consumo duplicou o número de sancións a establecementos por non cumprir a normativa sobre o uso do catalán: tramitáronse 486 expedientes en 2025 fronte á media dos últimos dez anos. As actuacións buscan garantir a presenza do catalán nos comercios, na etiquetaxe, na atención á clientela e nos servizos, combinando inspeccións, plans municipais, voluntariado e colaboración con grandes empresas, así como reforzar o uso da lingua no ensino, no ámbito laboral e nos centros sanitarios.
Fonte: Diari de la Llengua
Os manuais dixitais en catalán xa están dispoñibles en dous terzos dos coches
O 65 % dos coches das marcas asociadas á Asociación Española de Fabricantes de Automóbiles e Camións (ANFAC) dispoñen xa de manuais dixitais en catalán, tras a incorporación recente de modelos de Stellantis como Abarth, Alfa Romeo, Fiat, Jeep e Lancia. Ademais, Volkswagen estreou unha páxina web de atención á clientela en catalán e Ebro publicará proximamente a versión completa do seu portal nesta lingua.
Fonte: Diari de la Llengua
Unha ferramenta dixital detectará problemas de lectura en éuscaro de forma temperá
O Goberno vasco aprobou a implantación progresiva de NEUREHIZKI, unha plataforma dixital desenvolvida polo Basque Center on Cognition, Brain and Language (BCBL) para avaliar os procesos de lectura en éuscaro entre alumnado de 1.º e 2.º de Primaria. O sistema permitirá detectar de forma precoz dificultades de aprendizaxe e ofrecer respostas individualizadas, contando cunha formación específica para o profesorado e os equipos de orientación.
Fonte: Agencia de Noticias
Un convenio entre o Instituto Cervantes e RTVE promoverá a creación de contidos para a difusión do español
O Instituto Cervantes e RTVE asinaron un convenio de catro anos para reforzar a promoción do español e da súa cultura, mediante a creación e difusión de contidos en televisión, radio e canles dixitais. O acordo inclúe colaboración en programas educativos, materiais audiovisuais, eventos culturais e intercambio de contidos entre ambas as institucións para ampliar a oferta formativa e cultural en español.
Fonte: Instituto Cervantes
Boletín
Subscríbase ao boletín
