O Parlamento de Navarra aprobou instar o Departamento de Educación a implantar sinalización e carteis bilingües en castelán e éuscaro nos centros educativos públicos da comunidade. A medida dará prioridade aos colexios nos que se emprega o éuscaro nos modelos lingüísticos A, B e D, tanto na sinalización física como dixital.

Fonte: Magisnet

O TSXPV anulou o Decreto 19/2024 sobre a normalización do uso do éuscaro no sector público vasco ao considerar insuficiente a memoria económica que acompañou a súa tramitación. A sentenza, que aínda non é firme, estima parcialmente o recurso presentado por Vox e cuestiona a falta dunha avaliación económica detallada das medidas previstas. Porén, o tribunal desbotou outros argumentos do recurso relacionados coa cooficialidade lingüística e a igualdade ante a lei.

Fonte: Poder Judicial

Seis axencias de comunicación crearon Markalariak, unha comunidade profesional que busca fortalecer o ecosistema creativo vasco e situar o éuscaro no centro da comunicación e da publicidade. A iniciativa aposta por compartir coñecementos, crear sinerxías, atraer novas xeracións e representar os intereses comúns do sector. Desde a súa creación, xa celebrou dous encontros destinados a conectar profesionais e favorecer a colaboración arredor da comunicación en éuscaro.

Fonte: Gobierno Vasco

O Goberno vasco iniciou este procedemento polo papel do éuscaro na creación e transmisión da cultura vasca. A declaración pretende reforzar o seu recoñecemento xurídico e patrimonial, ao destacar a súa función na conservación de tradicións, coñecementos e expresións culturais. Tras a publicación do expediente, abrirase un período de información pública antes de decidir sobre a súa aprobación definitiva.

Fonte: Gobierno Vasco

A Universidade de Barcelona inicia este curso o despregamento do II Plan de Dinamización Lingüística para reforzar o uso do catalán na docencia, a investigación e a vida universitaria. Farao mediante a campaña «La UB es mou pel català» que incluirá máis de trinta actuacións, entre elas informar sobre os dereitos lingüísticos e garantir a transparencia sobre a lingua das clases. O plan tamén implicará as facultades e diversos colectivos da comunidade universitaria para consolidar o catalán en todos os ámbitos da institución.

Fonte: Universitat de Barcelona 

O Grupo Noticias e Euskaltzaindia asinaron un acordo de colaboración para incorporar os contidos en éuscaro dos seus medios ao Corpus de Referencia do Éuscaro, co obxectivo de ampliar os recursos dispoñibles para o estudo da lingua. Os textos serán utilizados para a súa indexación, análise estatística e tratamento lexicográfico, o que contribuirá a coñecer mellor os usos reais do idioma e a enriquecer as ferramentas lingüísticas da Academia.

Fonte: Euskaltzaindia

O Concello de Manresa presentou unha enquisa sobre os usos lingüísticos que sitúa o catalán como a lingua habitual da metade da poboación, por riba da media de Cataluña. O estudo revela, porén, unha tendencia a cambiar cara ao castelán nas conversas bilingües, polo que a cidade impulsou a campaña «No canviïs mai» para fomentar o mantemento do catalán nos intercambios cotiáns e reforzar o uso social desta lingua como elemento de cohesión.

Fonte: Ajuntament de Manresa

O Concello de Pamplona abriu unha consulta pública previa á creación do Regulamento Orgánico do Consello Municipal do Éuscaro, co fin de incorporar achegas da cidadanía e das entidades interesadas. O órgano, previsto no primeiro Plan de Normalización Lingüística municipal (2027-2031), terá funcións consultivas, de asesoramento e seguimento das políticas lingüísticas. A súa creación busca reforzar os dereitos lingüísticos e favorecer unha maior presenza e prestixio social do éuscaro na cidade.

Fonte: Iruñeko Udala

CC. OO. de Catalunya incorporouse a Compendium.cat, o portal do Consello da Avogacía Catalá que reúne recursos para facilitar o uso profesional do catalán nos ámbitos xurídico e administrativo. O acordo busca favorecer que as persoas traballadoras poidan empregar a lingua catalá con normalidade e seguridade no contorno laboral.

Fonte: Diari de la Llengua

O Servizo de Éuscaro do Concello de Donostia-San Sebastián ofrecerá de outubro a maio a actividade en liña MintzaOn, destinada a rapaces e rapazas de 8 a 14 anos con coñecementos previos de éuscaro. A proposta gratuíta busca reforzar a expresión oral mediante xogos, retos, música e conversas en pequenos grupos, fóra do horario escolar. Preto de 350 participantes poderán practicar a lingua semanalmente, con dúas modalidades adaptadas ás diferentes idades.

Fonte: Donostiako Udala