Ante o éxito da primeira edición, que contara coa participación de máis de 250 participantes, o Concello de Zaragoza pon en marcha unha nova edición do Curso de Iniciación á Lingua Aragonesa, o cal está dirixido aos maiores de 14 anos que queiran aprender máis sobre aspectos sociais, históricos, artísticos e lingüísticos.

Fonte: Heraldo

A Consellería de Cultura e Política Lingüística do Goberno vasco defende que os procesos selectivos das Ofertas Públicas de Emprego (OPE) do País Vasco deben esixir o coñecemento do éuscaro como parte do seu proceso de normalización.

Fonte: ABC

En marzo de 2018 chegará a Navarra o Festival Navarro Infantil e Xuvenil de Cancións en Éuscaro, no que centenares de rapaces e rapazas da comunidade de entre 6 e 16 anos interpretarán diversos temas da cultura musical da súa terra en lingua vasca.

Fonte: Noticias de Navarra

A ONG Plataforma per la Llengua móstrase a favor de manter a lingua catalá no ámbito sanitario balear, para o cal solicitou que non se modifique a esixencia da lingua como requisito para os traballadores da sanidade pública das illas.

Fonte: La Vanguardia

Con motivo da festividade do Día da Lingua Materna, que a UNESCO celebra cada 21 de febreiro, o Principado de Asturias organizou un completo programa de pezas teatrais clásicas e concertos de música tradicional asturiana.

Fonte: El Comercio

A Oficina de Promoción do Valenciano do Concello de Castelló puxo en marcha a iniciativa "Benvidos a casa", a través da cal anima as familias que acaban de ter un fillo ou unha filla a priorizar o uso da lingua valenciana.

Fonte: Cope

O Parlamento de Navarra creará unha comisión especial que se encargará de elaborar unha proposta para unha nova Lei foral do éuscaro que teña como principios o respecto aos dereitos lingüísticos, a superación de zonificación lingüística e a oficialización do éuscaro en toda Navarra.

Fonte: Diario de Navarra

O Goberno de Aragón busca a colaboración das entidades locais a través de protocolos cos que pór en marcha actuacións que conduzan á normalización da lingua aragonesa. A organización de seminarios ou a concesión de axudas para a investigación son algunhas das accións propostas.

Fonte: Heraldo

O 33,1% da mocidade vasca de entre 16 e 24 anos recoñece o éuscaro como a súa lingua materna, unha porcentaxe que se incrementou considerablemente nos últimos anos. De feito, este grupo de idade é o que suma un maior número de persoas que tiveron o éuscaro como lingua materna.

Fonte: Deia

O colexio infantil El Nial de Pola de Lena puxo en marcha un programa para que os nenos e nenas aprendan a variante lenense do asturiano a través de xogos e actividades. Tamén se prevé que no próximo curso as matrículas e outros documentos administrativos se elaboren tanto en castelán como en asturiano.

Fonte: La Nueva España