Lansarean, a primeira aplicación en éuscaro para buscar traballo, conta xa con 4000 ofertas, 400 empresas e 2900 usuarios. Foi lanzada por Bai Euskarari Elkartea coa intención de dirixirse aos profesionais que buscan traballo e ás empresas que ofrecen oportunidades laborais.

Fonte: Noticias de Gipuzkoa

A enciclopedia de música catalá Viasona estreou unha nova páxina web coa que queren dar unha visión global do sector da música en catalán. O novo espazo incorpora unha sección de actualidade e mellora o acceso á enciclopedia xa existente.

Fonte: El Nacional

A asociación Karrikiri leva fomentando durante máis de 20 anos o uso da lingua vasca en Pamplona con diferentes iniciativas como bolsas de emprego, busca de pisos entre xente que fale éuscaro, listaxe de comercios euscaldúns e un servizo de tradución.

Fonte: Noticias de Navarra

O estudo realizado pola Plataforma pola Lingua destacou que tan só o 32% das notarías de Cataluña ofrécelles aos seus clientes escoller o catalán para a redacción de escrituras. Isto contrasta co dato de que o 51,1% da clientela afirmou falar catalán na súa vida cotiá.

Fonte: La Vanguardia

O vindeiro 17 de maio celebrarase en San Sebastián a terceira edición do Día de Internet en Éuscaro, que porá o foco nos móbiles para coñecer que modelos poden utilizarse en lingua vasca.

Fonte: EITB

A Dirección Xeral de Política Lingüística do Departamento de Cultura achegará 60 000 euros para a promoción e o coñecemento do aranés.

Fonte: Gencat

A Plataforma per la Llengua pediulles ao Síndic de Greuges (Valedor do Pobo na Comunidade Valencia) e ao Ministerio de Fomento que se respecte a denominación "València" nos sinais de estradas, autovías e autoestradas. Esta denominación é oficial dende a publicación do Decreto 16/2017.

Fonte: La Vanguardia

Esta nova liña de axudas convocada pola Dirección Xeral de Política Lingüística está dirixida a proxectos de fomento e difusión da lingua de signos catalá e conta cunha dotación económica de 40 000 euros.

Fonte: Generalitat de Catalunya

O Goberno da illa de Mallorca puxo en marcha obradoiros de rap en catalán para impulsar o uso desta lingua entre a xente nova. Así mesmo, anunciou a convocatoria de axudas para a rotulación en catalán.

Fonte: SER

A Alianza para a Diversidade Lingüística, á que pertence o proxecto Idiomas en Perigo de Extinción, mantén actualizado un mapa interactivo que informa sobre a situación de cada lingua, no cal o aragonés figura no máximo nivel de alerta.

Fonte: Heraldo