Centos de persoas participaron na 32.ª Corsa Aran per sa Lengua para reclamar un maior uso social do aranés, que segue a perder presenza nas conversas cotiás. A organización recoñeceu os avances legais e educativos, mais advertiu da necesidade de reforzar a lingua nos ámbitos dixitais e na comunicación habitual.

Fonte: Diari de la Llengua

O ministro de Xustiza de Malawi afirmou que os deputados e deputadas do país africano non poderán intervir nas linguas nacionais no parlamento mentres non se modifique a Constitución. A resposta chega tras unha proposta para permitir o uso de linguas vernáculas nos debates parlamentarios, xa que a lexislación vixente esixe o dominio do inglés para exercer como parlamentario.

Fonte: Constitutionnet

O Principado empregou por primeira vez o asturiano como lingua principal nunha proba selectiva para cubrir tres prazas de filoloxía no Servizo de Planificación e Normalización Lingüística. A decisión, amparada pola Lei de uso de 1998 e coherente coas funcións dos postos, suscitou críticas ao non figuraren expresamente nas bases as condicións lingüísticas do exame. O proceso abre un precedente na incorporación efectiva do coñecemento do asturiano ao acceso ao emprego público.