A traballadora humanitaria portuguesa Joana Pechirra publicou Bu Obi Kriol?!, un manual práctico e de acceso gratuíto para aprender crioulo guineano, nacido das súas propias notas de campo en Guinea-Bissau. A obra busca cubrir a falta de materiais introdutorios e facilitar tanto a aprendizaxe da lingua como o achegamento á cultura local. Ademais, o proxecto pretende combater prexuízos lingüísticos e reforzar a integración social, ao tempo que se converteu nun recurso útil tamén para a diáspora e para persoas interesadas noutras linguas.
Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
04 de setembro de 2026
O Goberno de Navarra renovou a campaña «Euskera ahora» para impulsar a aprendizaxe do éuscaro entre a poboación adulta, que no último curso reuniu preto de 5800 persoas. Como principal novidade, a matrícula nos niveis A1 e A2 será gratuíta, mentres que o resto contará con axudas de ata 475 euros. A iniciativa, que tamén promove a formación en liña, busca ampliar o número de falantes e facilitar o acceso á lingua tanto á poboación local como á chegada recentemente a Navarra.
04 de setembro de 2026
O Concello de Burriana distribuíu entre os centros de infantil e primaria novos materiais didácticos para fomentar o uso do valenciano nas aulas. A iniciativa, desenvolvida en colaboración coa editorial local Dylar, inclúe lecturas adaptadas ás distintas etapas educativas e un cartel de vocabulario para o alumnado máis novo. O obxectivo é facilitar recursos atractivos que favorezan a presenza habitual da lingua desde a infancia.
04 de setembro de 2026
O Goberno español solicitou que a oficialidade do galego, o catalán e o éuscaro na Unión Europea volva debaterse no Consello de Asuntos Xerais do 23 de setembro. A iniciativa retómase tras o bloqueo do pasado ano por parte de varios Estados, que alegaron dúbidas xurídicas e prácticas. España defende que a futura ampliación da UE reforza a necesidade de recoñecer tamén linguas oficiais dun Estado membro e comprométese a asumir os custos da medida.
03 de setembro de 2026
O departamento manterá a denominación de Pireneos Orientais tras unha consulta na que esta opción obtivo o 47 % dos votos, fronte ao 42 % de Pireneos Cataláns. Esta última proposta contaba co apoio de entidades defensoras da lingua, que a consideraban unha oportunidade para reforzar o recoñecemento da identidade catalá do territorio. A votación rexistrou unha participación próxima ao 10 % e o resultado deberá ser ratificado polo Consello de Estado.
03 de setembro de 2026
Unha investigación desenvolvida durante cinco anos en seis estados de México conclúe que o alumnado indíxena continúa a afrontar importantes barreiras de acceso, inclusión e recoñecemento no ensino superior. O estudo sinala que o carácter maioritariamente monolingüe e monocultural das universidades limita a presenza das linguas e dos saberes propios destes pobos. As conclusións reclaman cambios nas políticas, nos plans de estudo e nas vías de acceso para avanzar cara a un modelo universitario máis intercultural e inclusivo.
03 de setembro de 2026
O Concello de Reus abriu o prazo para participar na XIII edición do Premio de Ideas para Promover o Uso do Catalán, que permanecerá aberto ata o 15 de outubro. A convocatoria, dotada con 2000 euros, busca apoiar proxectos que amplíen a presenza oral e escrita da lingua en ámbitos sociais, comerciais, empresariais e asociativos. As propostas poderán dirixirse ao conxunto da cidadanía ou a colectivos específicos, co propósito de favorecer novos hábitos lingüísticos e incrementar o uso habitual do catalán.
03 de setembro de 2026
A 44ª edición da Semana do Libro en Catalán celebrarase do 18 ao 27 de setembro en Barcelona, cunha aposta especial pola difusión da literatura catalá no ámbito dixital. O certame reunirá 282 selos editoriais e reforzará a promoción da lingua mediante encontros con persoas creadoras de contido, podcasts e actividades destinadas á mocidade.
Fonte: Diari de la Llengua
02 de setembro de 2026
A Universidade de Rojava rexeitou a decisión do Ministerio de Educación sirio de reducir a ensinanza do kurdo a tres horas semanais, ao considerar que supón un retroceso respecto do modelo desenvolvido durante os últimos doce anos. A institución defende o dereito a recibir formación na lingua materna e advirte de que a medida pode prexudicar a calidade educativa e desaproveitar os avances acadados. Como alternativa, propón un sistema bilingüe en kurdo e árabe que garanta os dereitos lingüísticos e favoreza unha educación inclusiva e sostible.
02 de setembro de 2026
O Concello de Salceda impartirá do 14 ao 30 de setembro un curso gratuíto de iniciación á lingua e á cultura galegas, destinado a persoas maiores de 16 anos procedentes do exterior e residentes en Galicia. A formación busca facilitar a súa integración social e cultural mediante unha primeira aproximación ao galego, con vocabulario, expresións e diálogos básicos, ademais de contidos culturais. O curso, de 20 horas e carácter presencial, servirá tamén como base para acceder posteriormente ás certificacións oficiais de lingua galega.
Boletín
Subscríbase ao boletín
