A palabra maorí kaitiakitanga, que expresa a idea de coidado, protección e responsabilidade co medio natural, foi escollida como a palabra máis fermosa do mundo pola plataforma de aprendizaxe de linguas Babbel. O termo destacou entre 223 palabras de 75 linguas pola súa sonoridade, riqueza semántica e relevancia cultural, converténdose nun recoñecemento internacional á lingua e á cosmovisión maorís.
Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
17 de xullo de 2026
O Goberno vasco aprobou a implantación progresiva de NEUREHIZKI, unha plataforma dixital desenvolvida polo Basque Center on Cognition, Brain and Language (BCBL) para avaliar os procesos de lectura en éuscaro entre alumnado de 1.º e 2.º de Primaria. O sistema permitirá detectar de forma precoz dificultades de aprendizaxe e ofrecer respostas individualizadas, contando cunha formación específica para o profesorado e os equipos de orientación.
17 de xullo de 2026
O Instituto Cervantes e RTVE asinaron un convenio de catro anos para reforzar a promoción do español e da súa cultura, mediante a creación e difusión de contidos en televisión, radio e canles dixitais. O acordo inclúe colaboración en programas educativos, materiais audiovisuais, eventos culturais e intercambio de contidos entre ambas as institucións para ampliar a oferta formativa e cultural en español.
17 de xullo de 2026
O conselleiro de Cultura, Lingua e Xuventude, José López Campos, agradeceu o clima amable do Consello da Cultura Galega, “unha entidade que tivo un peso moi importante”, dixo, na actualización do Plan xeral de normalización da lingua galega, e que quedou patente na entrega do documento á presidenta da entidade, Dolores Vilavedra.
17 de xullo de 2026
O secretario xeral da Lingua, Valentín García, e o actor Alberte Montes presentaron en Santiago a actividade de dinamización lingüística «Galego pode selo calquera», un monólogo cómico teatral que se poderá gozar no Carballiño, en Boiro, en Ribadeo e en Toén no marco do programa FalaRedes 2026.
Fonte: O Portal da Lingua Galega
16 de xullo de 2026
O conselleiro de Cultura, Lingua e Xuventude, José López Campos, agradeceu “o apoio” do presidente da Real Academia Galega, Henrique Monteagudo, durante o proceso de elaboración da proposta de actualización do Plan xeral de normalización da lingua galega. Fíxoo na entrega ao presidente da entidade do documento que foi presentado onte na Cidade da Cultura.
16 de xullo de 2026
A Base de Nomes Xeográficos do Instituto Cartográfico e Xeolóxico de Cataluña superou os 400.000 rexistros, consolidándose como un amplo inventario da toponimia catalá. A ferramenta permite preservar a diversidade lingüística e histórica do territorio, ademais de facilitar aplicacións prácticas como a cartografía, a xestión de emerxencias ou a planificación territorial.
Fonte: Diari de la Llengua
16 de xullo de 2026
A XI Xornada de Onomástica Galega, que este ano ten como lema «Onomástica e ecoloxía», abordará a relación entre os nomes do territorio e a súa transformación pola acción humana. Organizada pola Real Academia Galega, a cita analizará a perda da toponimia vinculada a cambios ambientais, industriais e administrativos, coa participación de especialistas no estudo do patrimonio lingüístico.
16 de xullo de 2026
A campaña Configura.cat conseguiu sumar 500.000 novos dispositivos configurados en catalán co obxectivo de aumentar a presenza dixital da lingua propia. A iniciativa, impulsada por varias entidades, busca que persoas usuarias e organizacións fagan visible a súa preferencia lingüística ante as plataformas tecnolóxicas e favorezan a incorporación do catalán en servizos dixitais.
Fonte: Diari de la Llengua
15 de xullo de 2026
A Universidade de Vigo impulsa un proxecto de innovación docente que adapta O lobo da xente de Vicente Risco para mellorar a competencia comunicativa en galego do futuro profesorado. A iniciativa combina lectura graduada e dramatización oral mediante a metodoloxía TPRS (Total Physical Response through Storytelling), co obxectivo de reforzar a aprendizaxe lingüística, achegar a literatura galega á aula e fomentar a seguridade no uso da lingua.
Boletín
Subscríbase ao boletín
