A Deputación da Coruña presentou en Malpica un proxecto piloto de dinamización lingüística que ofrece un curso de cultura e lingua galegas a persoas migrantes sen coñecementos previos do idioma, co obxectivo de facilitar a súa integración social e laboral. O programa conta cunha participación inicial de máis de cincuenta persoas, principalmente que traballan no sector do mar, e está coordinado pola Fundación Vía Galego.
Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
05 de xuño de 2026
05 de xuño de 2026
Preto de 700 persoas participaron en Parlem!, unha iniciativa desenvolvida en Perpiñán e noutras localidades da Cataluña Norte para facilitar o uso do catalán entre falantes, aprendices e persoas que o entenden. Os organizadores destacan que moitas veces se fala en francés con veciños e veciñas da zona porque se descoñece que tamén saben catalán, e consideran que o proxecto contribuíu a dar visibilidade á lingua no espazo público.
05 de xuño de 2026
O Goberno de Cataluña conmemorou o 3 de xuño o Día da Lingua de Signos Catalá (LSC) cun acto institucional no Palau Robert de Barcelona. Durante a xornada presentouse a ampliación do Vocabulario Básico da LSC, que incorpora 730 novos signos para responder ás necesidades comunicativas actuais. O vocabulario, agora con 2480 signos organizados en 10 ámbitos temáticos, busca achegar a LSC á sociedade xeral e facilitar a súa aprendizaxe e uso.
04 de xuño de 2026
A Universidade de Santiago convoca o Premio Luís Porteiro Garea para recoñecer persoas, entidades ou colectivos que contribúan á normalización do galego na institución. O prazo de presentación de candidaturas pecha o 20 de xuño e poden ser propostas por calquera persoa ou entidade a través do rexistro electrónico da universidade.
04 de xuño de 2026
O conselleiro catalán de Política Lingüística fai balance da execución do Pacto Nacional pola Lingua
Un ano despois da súa sinatura, o Pacto Nacional pola Lingua presenta un balance globalmente positivo, coa execución do 62 % das 206 medidas, 27 en fase avanzada e 43 en marcha, cun orzamento de 256 millóns de euros. Destacan iniciativas como a ampliación do CPNL, o reforzo da política lingüística municipal, o récord de aulas de acollida en educación e a formación de profesionais en administración, xustiza e saúde. Ademais, créase a Oficina de Protección de Dereitos Lingüísticos e establécese unha política específica para o ámbito laboral.
04 de xuño de 2026
O secretario xeral da Lingua, Valentín García, e a directora xeral de Xuventude, Lara Meneses, recibiron os premiados na décimo quinta edición de Lingua de Namorar, o certame convocado anualmente pola Secretaría Xeral da Lingua e a Dirección Xeral de Xuventude cos obxectivos de dinamizar o uso da lingua galega entre a mocidade nas súas relacións persoais e nas novas tecnoloxías e incrementar a percepción do galego como unha lingua útil para os momentos de lecer e diversión.
03 de xuño de 2026
O Goberno vasco presentou o Plan estratéxico do éuscaro 2026-2030, enmarcado na iniciativa Jauzia Gara, co obxectivo de pasar do coñecemento ao uso efectivo do éuscaro na vida cotiá. O plan establece catro grandes metas (reforzar o coñecemento, aumentar o uso, fortalecer o prestixio e desenvolver políticas baseadas en datos) estruturadas en 11 eixes estratéxicos, 27 obxectivos operativos e 73 accións.
03 de xuño de 2026
Estudantes e profesorado da cidade siria de Al-Hasakah reclamaron que a lingua kurda sexa recoñecida como segunda lingua oficial e incluída na Constitución de Siria. Os manifestantes critican que esta lingua se limite só a dúas horas optativas nas escolas e defenden o dereito das novas xeracións a recibir educación na súa lingua materna.
Fonte: Hawar News
03 de xuño de 2026
A presenza testemuñal do catalán na visita do papa León XIV á Sagrada Familia xerou críticas da cidadanía, así como de institucións, partidos e entidades, que reclaman que a lingua teña un papel central. O Goberno catalán trasladoulle ao Vaticano a importancia do catalán, aínda que a decisión final lle corresponde á Santa Sede.
Fonte: Diari de la Llengua
03 de xuño de 2026
O Concello de Estella-Lizarra convoca axudas económicas para a aprendizaxe do éuscaro durante o curso 2025-2026, destinadas a persoas maiores de 16 anos empadroadas na cidade con, polo menos, un ano de residencia. As bolsas financian ata o 40 % do custo da matrícula, cun máximo de 400 euros por persoa, e dispoñen dun orzamento total de 7000 euros.
Boletín
Subscríbase ao boletín
