Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O Ministerio de Educación de Francia decidiu permitir que os exames do bacharelato se poidan realizar en linguas minorizadas, o que supón un avance no seu recoñecemento no sistema educativo. A medida responde a anos de reclamacións de asociacións culturais e lingüísticas, mais tamén xera debate sobre a súa aplicación e impacto no sistema educativo.
Fonte: Diari de la Llengua
Un documental mostra a situación do jèrriais, a lingua tradicional da illa de Jersey, e os esforzos para a súa recuperación. Recolle testemuños dos últimos falantes nativos e destaca que o número de persoas que o falan está a diminuír rapidamente. Tamén lembra que no pasado o seu uso foi desanimado e mesmo castigado nas escolas.
Fonte: BBC
A Universidade Pública de Navarra incorporará no curso 2026-2027 un título propio de experto en planificación lingüística para a revitalización e a promoción social do éuscaro, financiado polo Goberno navarro. A formación, impartida integramente en éuscaro e en modalidade en liña, busca preparar persoal cualificado para deseñar, xestionar e avaliar políticas lingüísticas en contextos plurilingües. O programa abordará sociolingüística, normativa, xestión institucional e promoción do éuscaro nos ámbitos socioeconómico e non formal.
Xirona é a primeira cidade catalá en elaborar unha enquisa propia sobre usos lingüísticos cos estándares da Enquisa de Usos Lingüísticos da Poboación (EULP), que sitúa no 60,7 % a poboación que emprega habitualmente o catalán, só ou combinado con outras linguas. O estudo amosa unha presenza destacada da lingua en ámbitos como o traballo, o comercio, a restauración ou a atención médica, aínda que só unha de cada catro persoas mantén o catalán cando recibe resposta en castelán.
A Xunta colaborará con PuntoGal nun proxecto para analizar a presenza do galego nos buscadores e medir como os algoritmos condicionan a visibilidade das linguas minoritarias na internet. O convenio, dotado con 64.000 euros, permitirá facer un seguimento dos resultados de busca en galego, crear unha base de datos, elaborar informes anuais e organizar xornadas sobre posicionamento dixital. A iniciativa tamén estudará o impacto da intelixencia artificial nos resultados ofrecidos por Google e outros servizos de procura.
A Universidade de Santiago investigará, a través do proxecto IDEOLINGAL, como a creación de contido en galego en Instagram e TikTok está a influír nas ideoloxías lingüísticas e na construción de identidades entre a xente nova. O estudo, liderado polo Instituto da Lingua Galega, analizará durante tres anos a oralidade dixital, o contacto co castelán e co inglés, o papel das variedades dialectais e a procura dunha expresión máis natural nas redes. A investigación tamén abordará a dimensión económica destes novos perfís, cada vez máis presentes en campañas de comunicación e márketing.
Segundo datos difundidos polo British Council, existen máis de 6000 persoas que falan o chamado “galés patagón”, unha variedade do galés presente en comunidades da Patagonia arxentina. Este fenómeno lingüístico está ligado á emigración galesa histórica cara a esa rexión, onde a lingua se mantivo en determinados ámbitos familiares e comunitarios.
Fonte: El Valle
A BBC anunciou a creación de dous novos servizos dixitais de noticias en húngaro e romanés, pensados para ampliar o acceso a información independente en Europa Central e do Leste. As novas plataformas, BBC News Magyarul e BBC News România, ofrecerán contidos con temas como política internacional, saúde, tecnoloxía e clima, entre outros.
Fonte: BBC
O éuscaro conta cun novo recurso dixital para a aprendizaxe a través da música: Hiztegi Bat, un dicionario en liña creado a partir das letras de Gorka Urbizu, fundador de Berri Txarrak. A plataforma reúne case 400 palabras presentes nas súas cancións, con definicións, referencias aos temas nos que aparecen e exercicios interactivos para practicar. O proxecto, desenvolvido por Beñat Erazuma, amosa o potencial da cultura vasca como ferramenta pedagóxica e como vía para achegar a lingua ás novas xeracións.
O programa Musikariak Ikastetxeetan, impulsado por Euskarabidea, achegou este curso a música en éuscaro a máis de 6400 alumnas e alumnos de 52 centros educativos de Navarra. A iniciativa, dirixida ao alumnado de ESO e Bacharelato que estuda éuscaro ou en éuscaro, leva creadoras e creadores musicais ás aulas para compartir a súa traxectoria e contextualizala dentro da canción vasca. O proxecto busca reforzar a transmisión cultural, ofrecer referentes actuais e ampliar o coñecemento da mocidade sobre a creación musical en lingua vasca.
Subscríbase ao boletín
