Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
Como cada 21 de febreiro, a Organización das Nacións Unidas para a Educación, a Ciencia e a Cultura (UNESCO) conmemora en todo o mundo o Día Internacional da Lingua Materna coa intención de salientar a importancia das linguas como vehículo de identidade, cultura e expresión. Este día tamén pretende promover a diversidade lingüística e cultural e o multilingüismo para construír sociedades máis inclusivas e pacíficas.
Fonte: UNESCO
O investigador Marciano Moreira defendeu a necesidade urxente de oficializar o crioulo ou lingua caboverdiana, apelando a consensos entre partidos políticos e representantes parlamentarios para recoñecela como patrimonio cultural e símbolo de identidade de Cabo Verde. Subliñou que a demora nesa oficialización atrasaría tamén a afirmación da identidade e a dignidade lingüística do país e destacou o papel da lingua no éxito educativo e na cohesión social.
A televisión británica presenta Hold My Hand, o primeiro programa de citas realizado integramente en lingua de signos británica. A serie segue persoas xordas ou persoas de familias xordas nas súas experiencias amorosas, apostando por un formato accesible e inclusivo. O obxectivo é visibilizar a cultura e identidade das persoas xordas.
Fonte: BBC
Segundo datos recentes, o turco é a lingua máis empregada nos fogares alemáns despois do alemán. A estatística reflicte o impacto histórico da migración turca e a crecente diversidade lingüística do país. En Alemaña viven millóns de persoas de orixe turca, o que explica a forte presenza desta lingua na sociedade.
Fonte: Hürriyet Daily News
En Inari, na Laponia finlandesa, escolas infantís de inmersión están a recuperar o saami de Inari, unha lingua indíxena que estivo a piques de desaparecer. A través do uso exclusivo da lingua en xogos e actividades cotiás, estase a crear unha nova xeración de falantes. Esta iniciativa estase a converter nun dos casos máis exitosos de revitalización lingüística en Europa.
Fonte: BBC
Accent Obert someterá nas vindeiras semanas os principais modelos de intelixencia artificial a probas de catalán para avaliar a súa competencia na cultura propia e elaborar unha clasificación pública. A entidade, que cualifica de positiva a presenza da lingua no ecosistema dixital, advirte con todo que cómpre garantir respostas construídas desde un marco cultural catalán.
O conselleiro de Cultura, Lingua e Xuventude, José López Campos, anunciou que se reunirá o mércores, 25 de febreiro, coas principais institucións culturais galegas co fin de “contar con todas elas para avanzar xuntos no deseño de actividades do Ano Oteriano”. Así o adiantou durante a súa visita á Fundación Otero Pedrayo, na que estivo acompañado polo secretario xeral da Lingua, Valentín García, e o director xeral de Cultura, Anxo M. Lorenzo.
O Goberno de Asturias conmemorará o Día Internacional da Lingua Materna cunha programación que se estenderá ata o 27 de febreiro, coa que pretende reforzar a protección e transmisión das linguas propias do Principado. O acto central celebrarase en Sotrondio baixo o lema «Toles nuestres voces», coa participación da comunidade educativa. A axenda inclúe propostas escénicas, musicais e formativas en varios concellos, ademais de recursos dixitais para os centros.
O conselleiro de Cultura, Lingua e Xuventude, José López Campos, celebrou por adiantado o Día da Lingua Materna (que ten lugar o 21 de febreiro) coa cativada da escola infantil pública Virxe de Covadonga, en Ourense, onde os nenos e nenas gozaron de Latexos, unha actividade de dinamización lingüística na que colabora a Xunta de Galicia.
Fonte: Xunta de Galicia
Alcoi converterase en epicentro da reflexión lingüística e cultural esta primavera co ciclo «Parlem de Llengua: Som i Serem», que se desenvolverá entre febreiro e maio. O evento reunirá escritores, mestres, músicos e cidadanía para analizar o presente e futuro do valenciano, combinando literatura, música, xogo e análise sociopolítica. A iniciativa busca fomentar a reflexión crítica e a participación ao redor da lingua e promover a súa identidade cultural como elemento de cohesión social.
Subscríbase ao boletín
