Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O Euskaltegi Municipal Zornotza de Amorebieta, en Biscaia, ofrecerá durante o curso 2026-2027 cursos de éuscaro para persoas desempregadas por 10 euros. A oferta abrangue todos os niveis, de A1 a C1, con clases presenciais de mañá e tarde.
Fonte: Zornotzan
Un estudo do sociolingüista Natxo Sorolla alerta de que o bilingüismo está a agochar un proceso de substitución do catalán polo castelán na Franxa de Aragón. O novo índice ITIG, que ademais da lingua predominante ten en conta os usos bilingües, mostra que a transmisión interxeracional do catalán pasou de +2,2 puntos en 2004 a -0,4 en 2014. O fenómeno é especialmente acusado na metade norte da Franxa, mentres que entre a mocidade o uso do castelán gaña peso fóra do ámbito familiar.
O Teatro Arriaga de Bilbao acolleu a XIX edición da Lectura Continuada de Clásicos, organizada por Bilbo Zaharra Euskaltegia, dedicada este ano a Leturiaren egunkari ezkutua, de Txillardegi. Publicada en 1957 e considerada a primeira novela moderna en éuscaro, a obra marcou un punto de inflexión na literatura vasca.
Fonte: Bilbau.eus
Paraguai celebrou o Día do Idioma Guaraní destacando a vitalidade dunha lingua que comprende arredor do 90 % da poboación e que se emprega habitualmente, soa ou mesturada co castelán, en boa parte do país. A conmemoración coincidiu coa difusión dun artigo de The Economist que cualificaba o guaraní como unha lingua "máis xenial" ca o español.
Fonte: Paraguay.com
A protección da lingua francesa converteuse nun dos puntos de desacordo nas negociacións comerciais entre o Canadá e os Estados Unidos. O Goberno canadense rexeitou un acordo que, segundo o primeiro ministro Mark Carney, podía ameazar as garantías lingüísticas e culturais do país, mentres Washington considera algunhas destas normas unha barreira para as empresas estadounidenses.
Fonte: Notícias R7
O municipio de Vila Nova de Poiares, no distrito de Coímbra, organizará unha nova edición dun curso de portugués destinado ás persoas estranxeiras residentes no concello. A formación, que comezará en setembro, pretende facilitar a comunicación no día a día e favorecer a integración social e a participación na comunidade local.
Fonte: The Portugal News
O conselleiro de Cultura, Lingua e Xuventude, José López Campos, asegurou que as negociacións para renovar o Plan de Normalización da Lingua Galega continuaron durante agosto. A Xunta xa trasladou ao Parlamento un documento de traballo e confía en que o diálogo entre as formacións participantes permita achegar posicións e presentar novidades nos próximos días.
Fonte: Galicia Confidencial
A Consellaría de Educación está ultimando un programa autonómico de auxiliares de conversa que substituirá o estatal e que, segundo o conselleiro de Educación, Román Rodríguez, podería estar operativo ao comezo do segundo trimestre do curso 2026-2027. A iniciativa xorde despois de que a Xunta decidise abandonar o programa estatal tras recibir unha sanción de 3,5 millóns de euros relacionada coa súa aplicación.
Un estudo da Universidade de Córdoba revela unha clara fenda territorial na oferta de ensino bilingüe en Andalucía: os programas concéntranse nos municipios máis grandes, mentres que a súa presenza diminúe notablemente nas zonas rurais. A investigación, que analiza máis de 4000 centros de primaria e secundaria, alerta da desigualdade no acceso á aprendizaxe de linguas estranxeiras segundo o lugar de residencia.
Subscríbase ao boletín
