España
Presentan o proxecto Txikipedia, unha enciclopedia en éuscaro para nenas e nenos de 8 a 13 anos
Txikipedia é un proxecto posto en marcha por Euskal Wikilarien Elkartea. Trátase dunha enciclopedia en éuscaro para nenas e nenos de 8 a 13 anos, cuxo léxico e sintaxe se adaptaron a esa franxa de idade para que a súa lectura e comprensión resulten máis doadas.
Fonte: EITB
O Goberno catalán traballará para potenciar as industrias da lingua de Cataluña
O Departamento de Cultura da Generalitat apoiará a Asociación Catalá Clúster das Industrias da Lingua Clusterlingua no desenvolvemento de tecnoloxía e de recursos lingüísticos para o sector.
Fonte: Generalitat de Catalunya
O colectivo Fala Ceibe acode a Europa para pedir maior protección para o galego no Bierzo
O colectivo Fala Ceibe remitiulle ao Parlamento Europeo información sobre a situación da lingua galega no Bierzo a través da eurodeputada Ana Miranda. Pretenden así lograr unha maior protección legal para o galego nesta comarca.
Fonte: Diario de León
Celébrase unha xornada para felicitar as familias navarras impulsoras do ensino en éuscaro nas escolas públicas
A Asociación Sortzen convocou o 15 de abril de 2018 no municipio navarro de Olite unha nova edición da xornada Besarkatu, que a través dunha aperta ten por finalidade felicitar as familias que contribuíron á inmersión lingüística do éuscaro nas escolas públicas da zona media e sur de Navarra.
Fonte: Noticias de Navarra
Convócanse as probas de carácter extraordinario de lingua catalá dirixidas ao persoal do Servizo de Saúde balear
Un total de 114 persoas presentouse ás probas de lingua catalá da convocatoria extraordinaria organizada pola Escola Balear da Administración Pública, na que soamente puido participar o persoal do Servizo de Saúde.
Fonte: 20 Minutos
A primeira festa pola lingua valenciana de 2018 mobiliza máis de trinta mil persoas
O 15 de abril celebrouse a primeira festa pola lingua valenciana do 2018 no municipio de Rafelguaraf, á que asistiron máis de 30 000 participantes. Durante o encontro realizáronse talleres e actividades lúdicas para os máis novos, e xa están programados novos encontros noutros puntos da xeografía valenciana ata o vindeiro 9 de xuño.
Fonte: Levante
O Parlamento vasco solicita que o éuscaro sexa recoñecido como un mérito na oferta pública de emprego
O Parlamento vasco solicitoulle ao Goberno central que o coñecemento das linguas oficiais, como o caso do éuscaro, se teña en conta coma un mérito nos postos da oferta pública de emprego nos que o uso destes idiomas sexa indispensable.
Fonte: Cope
Oviedo acolle o vindeiro 21 de abril unha manifestación en defensa da oficialidade da lingua asturiana
O vindeiro 21 de abril de 2018 celebrarase en Oviedo unha mobilización en defensa da oficialidade da lingua asturiana. A manifestación estará acompañada por dous temas musicais en asturiano creados especialmente para a ocasión.
Fonte: La Nueva España
Búscase a unha persoa disposta a mostrar a súa vida en éuscaro durante once días
A plataforma Eibarren Akebai convoca para o vindeiro 20 de abril de 2018 unha proba para atopar unha persoa que durante once días mostre a súa vida en éuscaro na cidade guipuscoana de Eibar, gravando situacións cotiás en diferentes ambientes da cidade e animando o público a usar esta lingua.
Fonte: Diario Vasco
A lingua catalá podería ser un requisito para optar ás bolsas de traballo do Servizo Público de Saúde balear
A última actualización do decreto que regula a capacitación lingüística do persoal do Servizo de Saúde balear dispón que o coñecemento da lingua catalá será un requisito indispensable para solicitar unha bolsa de traballo, que deberá ser de nivel B1 para a categoría de médico e de A2 para o persoal técnico.
Fonte: El Mundo
Boletín
Subscríbase ao boletín
