A dirección xeral de Política Lingüística da Consellería de Educación da Comunidade Valenciana convoca, a finais do mes de febreiro de 2018, un curso de formación destinado a lingüistas externos ao grupo de comunicación de À Punt. O obxectivo é formar os profesionais do sector da comunicación para mellorar as súas habilidades lingüísticas en revisión e validación.

Fonte: La Vanguardia

A colección de manuscritos sobre a lingua vasca e os seus dialectos, recompilados por Luís Luciano Bonaparte a mediados do século XIX, fixéronse públicos no Arquivo Real e Xeral de Navarra, de xeito que se poden consultar no buscador web "Arquivo Aberto" no portal institucional do Goberno de Navarra. Do total de 134 manuscritos, 118 son en éuscaro e o resto noutras linguas como, entre outras, castelán, francés, latín ou provenzal.

Fonte: Noticias de Navarra

En España existen ata 6 linguas con máis de 250 000 falantes que se atopan en risco de desparecer, segundo datos da Organización das Nacións Unidas para a Educación, a Ciencia e a Cultura (UNESCO). Estas linguas son o bable, o aranés, o aragonés, a fala estremeña, o tamazight e o caló.

Fonte: EcoDiario

O V Premio Martí Gasull i Roig, outorgado pola Plataforma pola Lingua, foi entregado a Cataluyna Ràdio polo seu papel como defensores da lingua catalá. Esta concesión decidiuse por votación popular, na que se contou con 7207 participantes.

Fonte: La Vanguardia

O Concello de Benidorm pon en marcha a iniciativa «Voluntariat pel Valencià», a través da cal as persoas interesadas poderán conversar en valenciano entre elas. A idea é pór en contacto persoas que queiran aprender a falalo con outras que queiran ensinalo, sen necesidade de xustificar unha titulación específica de profesor.

Fonte: Información

A mostra "Navarrorum. Dous mil anos de documentos navarros sobre o éuscaro" comeza a súa xira, chegando en primeiro lugar á Casa da Cultura Fray Diego de Estrella. Agárdase que acade o éxito recollido durante os meses que estivo exposto en Pamplona, onde atraeu a atención de miles de visitantes.

Fonte: Diario de Navarra

Aragón celebra o 21 de febreiro a xornada Día da Lingua Materna, a través da que darlle visibilidade á lingua aragonesa e promover a diversidade cultural. Realizaranse unhas 120 actividades en 63 localidades aragonesas, con accións como teatro infantil, conferencias, concertos, xornadas de poesía e moitas máis.

Fonte: AraInfo

O 28 de febreiro de 2018 dá comezo no concello asturiano de Corvera unha nova edición do taller 'Escrifala', que terá como obxectivo a práctica da lingua asturiana oral e escrita. Deste xeito, os asistentes, aos que se lles recomenda dispor dun coñecemento previo da lingua, poderán explorar novas expresións e formas de comunicación.

Fonte: Asturies

A Facultade de Tradución e Interpretación da Universidade Pompeu Fabra (UPF) de Barcelona, en colaboración coa Federación de Persoas Xordas de Cataluña (FESOCA,) organizan a sexta edición do Premio UPF-FESOCA, que ten como finalidade fomentar o uso normalizado da lingua de signos catalá.

Fonte: Llengua Catalana

Do 21 de febreiro ao 1 de marzo de 2018, organizaranse diversos talleres a través dos que achegar á xente temas innovadores e de actualidade en lingua vasca. Trátase dunha iniciativa dos centros de formación de ensinanza do éuscaro, os euskaltegis, que buscan que os alumnos sintan seguridade á hora de utilizar a súa lingua.

Fonte: El Diario Vasco