A filóloga Garbiñe Mendizabal será a nova directora de Igualdade Lingüística da Deputación de Guipúscoa, substituíndo a Mikel Irizar. A Deputación indicou nun comunicado que a nova directora "acumula unha ampla experiencia no eido da normalización do éuscaro".

Fonte: El Diario Vasco

O Goberno do País Vasco asinou un acordo coa Asociación Española de Normalización-UNE para traducir ao éuscaro as normas UNE-ISO, que certifican a xestión da calidade e a xestión ambiental nas empresas. En virtude deste convenio, desenvolverase un programa de tradución á lingua vasca de normas UNE durante os vindeiros catro anos.

Fonte: La Vanguardia

O Concello de Pamplona repartirá 82 500 euros entre quince entidades sen ánimo de lucro para que desenvolvan proxectos dirixidos ao fomento da lingua vasca. Cómpre mencionar que a cantidade achegada para estas axudas se incrementou nun 27 % respecto á convocatoria anterior.

Fonte: Noticias de Navarra

A primeira curtametraxe de debuxos animados en lingua aragonesa "Lo Gorroi" ("O gorro vermello"), impulsada polo Goberno de Aragón xunto coa Escola de Arte de Zaragoza, foi presentada nos cines Aragonia nunha sala chea de persoas asistentes.

Fonte: Aragón Digital

O Concello de Bilbao outorgoulle o premio Cimubisaria a "Bilbao Now", unha aplicación que funciona como axenda cultural e guía turística da cidade. Esta app conta cun servizo de guía sonora e permite gardar favoritos e planificar rutas. Ademais, pode utilizarse completamente en éuscaro, castelán, francés ou inglés.

Fonte: eitb.eus

A Dirección Xeral de Política Lingüística de Cataluña editou un mapa de localización dos lugares onde aprender a lingua de signos catalá (LSC). Este mapa informa sobre os lugares que ofrecen cursos desta lingua, así como sobre os datos de contacto de cada centro.

Fonte: Generalitat de Catalunya

O sindicato STEPV solicitou que o valenciano sexa a lingua central do modelo educativo plurilingüe da Comunidade Valenciana, de xeito que un mínimo do 50% dos contidos curriculares sexa neste idioma, chegando a acadar o 90% na etapa Infantil nos territorios nos que o valenciano é a lingua maioritaria.

Fonte: El Mundo

Ata o 30 de abril de 2018, as entidades que impulsen o catalán e/ou organicen actividades para fomentar o seu uso, poden solicitar a inclusión ou renovación no Censo de entidades de fomento da lingua catalá do Departamento de Cultura de Cataluña.

Fonte: Generalitat de Catalunya

A Real Academia da Lingua Vasca-Euskaltzaindia pretende cambiar algunhas definicións vinculadas ás relacións familiares para adaptalas á realidade actual. Deste xeito, os académicos dispoñen dun mes para realizar suxestións e, se non hai obxeccións relevantes, o Dicionario de Euskaltzaindia recollerá os cambios inmediatamente.

Fonte: eitb.eus

O Consorcio para a Normalización Lingüística de Cataluña traballa para impulsar o uso do catalán en todos os ámbitos, especialmente no eido socioeconómico, que é un dos sectores onde máis relacións comunicativas se establecen cada día. Deste xeito, o tecido comercial é esencial para ofrecer conversación en lingua catalá ás persoas que non dominan o idioma.

Fonte: Generalitat de Catalunya