O Goberno das Illas Baleares creou uns adhesivos en catalán para identificar os vehículos nos que viaxan nenos. De acordo coa Consellería de Cultura, esta iniciativa busca "fomentar a visibilidade da lingua catalá nas rúas das aldeas e cidades" do arquipélago.

Fonte: Menorca.info

A ONCE Cataluña convocou o XX Concurso Literario Roc Boronat en catalán, no que participarán 59 novelas. O propósito deste certame é apoiar os escritores para impulsar a creación literaria en lingua catalá entre as persoas con discapacidade visual.

Fonte: La Vanguardia

De acordo coa información do Departamento de Cultura e Política Lingüística do País Vasco, o Goberno vasco concederalles no ano 2018 case cinco millóns de euros aos medios de comunicación que soamente empreguen o éuscaro. Con esta iniciativa preténdese contribuír ao fomento da lingua vasca.

Fonte: 20 minutos

O Secretario Xeral de Universidades anunciou que todos os mestres titulados en calquera universidade española poderán cursar a mención en lingua asturiana nunha universidade distinta a aquela na que lograron o título, algo que só podían facer as persoas que cursaron estudos na Universidade de Oviedo.

Fonte: InfoAsturies

A Dirección Xeral de Política Lingüística de Aragón e a Comarca de Sobrarbe convocaron o "Premio Espiello Agora x l`aragonés" para promover o patrimonio lingüístico aragonés. O galardón recoñecerá o mellor audiovisual en lingua aragonesa do ano 2017, que obterá 900 euros e un trofeo.

Fonte: Aragón Digital

O colectivo Fala Ceive envioulles ao Parlamento de Galicia e ás Cortes de Castela e León unha proposta para o establecemento dun convenio entre ambas as comunidades para fomentar a lingua galega no Bierzo.

Fonte: Galicia Confidencial

O Servizo de Normalización Lingüística do Concello de Eivisa impulsou unha campaña para dar a coñecer termos eivisencos vinculados ao Entroido. Segundo un comunicado do Concello, a finalidade da campaña é relacionar diversas "tradicións desta festividade coas súas palabras correctas", polo que está dirixida "á cidadanía en xeral, con diferentes graos de coñecemento da lingua catalá".

Fonte: Periódico de Ibiza

O conselleiro de Saúde do Goberno vasco, Jon Darpón, presentou a avaliación intermedia do II Plan de Éuscaro de Osakidetza 2013-2019, que busca garantir o uso desta lingua no Servizo Vasco de Saúde. En concreto, Darpón salientou o "avance xeneralizado" que se logrou coa incorporación do plan, pero admitiu que aínda quedan ámbitos nos que mellorar, como na oferta de servizos bilingües.

Fonte: 20 minutos

A dirección xeral de Política Lingüística da Consellería de Educación da Comunidade Valenciana convoca, a finais do mes de febreiro de 2018, un curso de formación destinado a lingüistas externos ao grupo de comunicación de À Punt. O obxectivo é formar os profesionais do sector da comunicación para mellorar as súas habilidades lingüísticas en revisión e validación.

Fonte: La Vanguardia

A colección de manuscritos sobre a lingua vasca e os seus dialectos, recompilados por Luís Luciano Bonaparte a mediados do século XIX, fixéronse públicos no Arquivo Real e Xeral de Navarra, de xeito que se poden consultar no buscador web "Arquivo Aberto" no portal institucional do Goberno de Navarra. Do total de 134 manuscritos, 118 son en éuscaro e o resto noutras linguas como, entre outras, castelán, francés, latín ou provenzal.

Fonte: Noticias de Navarra