España
O Tribunal Superior de Xustiza de Navarra rexeita o recurso contra o decreto do éuscaro na Administración
O Tribunal Superior de Xustiza de Navarra rexeitou o recurso presentado polo sindicato Afapna contra o decreto polo que se regula o uso do éuscaro nas administracións públicas. O Tribunal entende que o sindicato non acreditou os supostos prexuízos irreparables que ocasionaría a execución do decreto.
Fonte: Noticias de Navarra
A Real Academia da Lingua Vasca demanda unha maior presenza do éuscaro no Tour de Francia e na Vuelta a España
A Real Academia da Lingua Vasca quere aproveitar o gran seguimento do Tour de Francia e da Vuelta a España, dúas competicións ciclistas que contarán con etapas no País Vasco, para fomentar o uso do éuscaro. Deste xeito, a Academia envioulles unha carta ao deputado xeral de Biscaia, ao deputado de Promoción Económica e á deputada foral de Éuscaro e Cultura para solicitar unha maior presenza da lingua vasca nestes encontros deportivos.
Fonte: Noticias de Gipuzkoa
A Deputación de Guipúscoa incrementa as axudas para fomentar o uso do éuscaro
O voceiro foral da Deputación de Guipúscoa, Imanol Lasa, anunciou que, no 2018, este organismo aumentará as axudas para fomentar o uso da lingua vasca nun 11,6%, o que supón que a cantidade total destinada a estas axudas será de 2,8 millóns de euros.
Fonte: El Diario Vasco
O Goberno de Navarra impulsa unha campaña para consolidar o valor do éuscaro
O Goberno de Navarra, a través de Euskarabidea (Instituto Navarro do Éuscaro), impulsou a campaña "O éuscaro ten valor. Euskarak balio du", que ten como obxectivo "reforzar o valor do éuscaro e presentar esta lingua propia de Navarra como elemento cultural positivo e de futuro, que suma, enriquece e achega".
Fonte: Noticias de Navarra
O Goberno da Generalitat Valenciana convoca unhas axudas para fomentar o valenciano nas festas da comunidade
A Consellería de Educación, Investigación, Cultura e Deporte da Comunidade Valenciana publicou unha convocatoria de axudas, por importe de 200 000 euros, para actividades de fomento do valenciano desenvolvidas por catro comisións de festas da comunidade durante o ano 2018.
Fonte: Valencia Plaza
Segundo un estudo, o 90 % dos establecementos comerciais e hoteleiros de Tolosa pode ofrecer os seus servizos en éuscaro
Galtzaundi Euskara Taldea, en colaboración coa asociación de comerciantes e hostaleiros Tolosa&Co e o Concello de Tolosa, realizou este diagnóstico do éuscaro que revela que o elevado nivel de euscaldunización non se reflicte na paisaxe lingüística.
Fonte: Noticias de Gipuzkoa
Organízanse en Avilés obradoiros infantís de hip hop en asturiano
Estes obradoiros de hip hop en asturiano, organizados pola Estaya de la Llingua, están dirixidos a nenas e nenos de entre 6 e 10 anos e son de balde.
Fonte: La Nueva España
Critican o tratamento que a Televisión do Principado de Asturias lles dá aos temas lingüísticos nos seus informativos
A Xunta pola Defensa de la Llingua Asturiana (XDLA) denuncia o tratamento parcial que se lle dá nos informativos á actualidade sobre temas lingüísticos, aos que acusa de estar ao servizo dos contrarios á normalización do asturiano.
Fonte: Asturies.com
O BCBL investiga as diferenzas existentes no cerebro das persoas zurdas bilingües
O Basque Center on Cognition, Braind and Language (BCBL), un centro de investigación con sede en San Sebastián, busca persoas de entre 18 e 36 anos, zurdas e bilingües castelán-éuscaro que queiran participar nun estudo internacional que analizará os seus cerebros para saber se funcionan de forma distinta aos das destras monolingües.
Fonte: Diario Vasco
O Concello de Castelló organiza un curso de valenciano para persoas que chegaron recentemente á localidade
O Concello de Castelló organiza, xunto coa Fundación Escola Valenciana, un curso de lingua valenciana para persoas que chegaron recentemente á localidade. As prazas para esta formación xa están esgotadas, de xeito que sesenta persoas mellorarán as súas capacidades en valenciano.
Fonte: elperiodic.com
Boletín
Subscríbase ao boletín
