España
Un proxecto impulsa o uso do éuscaro a través de dúas aplicacións móbiles
O proxecto 2deo, iniciado en decembro de 2017 no País Vasco para fomentar o uso do éuscaro, presentou os primeiros resultados dende a súa posta en marcha, destacando o desenvolvemento de dúas aplicacións para dispositivos móbiles, JarriOn e Goazen, que permiten compartir contidos audiovisuais nesta lingua.
Fonte: El Diario Vasco
O catalán será a lingua prioritaria do ámbito universitario nas Illas Baleares
O Consello de Goberno da Universidade das Illas Baleares (UIB) aprobou o novo Reglamento de usos lingüísticos e normalización na UIB, que establece que a lingua catalá terá un uso prioritario no ámbito académico e no administrativo.
Fonte: ABC
Un convenio de colaboración fomentará o uso da lingua aragonesa en persoas adultas
A comarca aragonesa de Alto Gállego, en colaboración coa asociación cultural Calibo, firmaron un novo convenio de colaboración a través do que promover a ensinanza da lingua aragonesa entre as persoas adultas.
Fonte: Heraldo
Ábrese o prazo de inscrición para un novo obradoiro de lingua asturiana
O Servizo de Normalización Lingüística da Comarca da Sidra organizará un taller dirixido a todas as persoas que queiran mellorar o seu dominio da lingua asturiana tanto oral coma escrita, independentemente do seu nivel.
Fonte: El Búscolu
Apróbase o novo decreto de regulación do coñecemento do catalán no sistema público sanitario das Illas Baleares
O venres 23 de marzo de 2018 aprobouse o decreto que regulará o coñecemento da lingua catalá na sanidade pública balear. Este decreto establece que non será necesario dispoñer dunha titulación lingüística para presentarse ás oposicións, se ben será obrigatorio acreditala en dous anos unha vez obtida a praza.
Fonte: ABC
A Real Academia da Lingua Vasca organizará nove congresos para celebrar o seu centésimo aniversario
Con motivo da celebración do centenario da Euskaltzaindia, a Real Academia da Lingua Vasca, prevese organizar nove congresos entre 2018 e 2019 en todos os territorios en que se fala éuscaro, nos que se tratarán asuntos relacionados cos ámbitos de actuación da Academia.
Fonte: El Diario
Unha manifestación reúne centos de persoas para reivindicar a oficialidade do éuscaro en toda Navarra
O sábado 24 de marzo de 2018 convocouse unha manifestación en Pamplona co fin de reivindicar a oficialidade do éuscaro en toda Navarra. Centos de persoas estiveron presentes nesta marcha para reclamar a recuperación e a normalización desta lingua.
Fonte: Noticias de Navarra
Apróbase unha ordenanza municipal en Mieres que permitirá o uso da lingua asturiana nas comunicacións oficiais
O Pleno do concello asturiano de Mieres aprobou a Ordenanza municipal que permitirá usar a lingua asturiana en todas as comunicacións orais e escritas que se fagan entre a Administración e a cidadanía.
Fonte: La Nueva España
Presentan un documental que recolle a memoria da literatura en lingua aragonesa dende o século XIV
O documental 'Recosiros I. Biblioteca de autores en aragonés', que foi presentado na Facultade de Ciencias Humanas e da Educación de Huesca, foi realizado como homenaxe aos escritores dos séculos XIV ao XX, a fin de fomentar a cultura e a lingua aragonesas.
Fonte: Heraldo
Hondarribia pon en marcha unha iniciativa para que os cativos reflexionen sobre o uso do éuscaro
O Concello vasco de Hondarribia e Euskaltzaleen Topagunea porán en marcha unha iniciativa dirixida a familias con fillos e fillas de entre 4 e 8 anos para reflexionar sobre o éuscaro e fomentar o seu uso.
Fonte: Diario Vasco
Boletín
Subscríbase ao boletín
