Os días 2 e 3 de marzo de 2018 convocarase na Universidade de Oviedo un seminario organizado pola asociación Iniciativa polo Asturiano para informar a cidadanía das implicacións positivas que tería a inclusión da lingua asturiana na sociedade.

Fonte: El Cofidencial Autonómico

Catro de cada cinco centros educativos públicos de Baleares imparten a maioría das materias soamente en lingua catalá. Esta proporción é menor no que respecta aos centros privados e concertados, xa que aproximadamente un de cada tres imparte as clases só en catalán.

Fonte: ABC

Unhas 159 obras publicadas por 42 editoriais no 2017 foron traducidas ao catalán grazas ao apoio da Generalitat de Cataluña, a través dunha nova liña de axudas dirixidas exclusivamente á súa tradución. As obras poden ser consultadas e solicitarse en préstamo no Portal da Lingua Catalá.

Fonte: GenCat

Os días 2 e 3 de marzo de 2018 celebrouse un seminario no que a Academia da Lingua Asturiana expuxo diversas propostas a través das que apoiar a oficialidade do asturiano. Entre outras medidas, destacan a inclusión da lingua asturiana nos colexios dende os 3 anos ou a emisión dunha canle de televisión e radio.

Fonte: La Nueva España

A Consellería de Educación da Comunidade Valenciana financiará un estudo a través do que cuantificar, en termos de renda, emprego e produto interior bruto a contribución das actividades relacionadas co uso da lingua valenciana.

Fonte: Levante

O Goberno de Navarra abriu unha nova convocatoria de axudas para levar a cabo actividades de promoción da lingua vasca na comunidade. As asociacións sen ánimo de lucro serán as principais beneficiarias, se ben os centros de traballo e as entidades privadas tamén teñen posibilidade de solicitalas.

Fonte: Noticias de Navarra

Un estudo recente da Plataforma pola Lingua de Cataluña confirma que soamente 4 de cada 10 produtos de marca propia dos supermercados ofrecen a súa etiquetaxe en catalán. De feito, o 40 % dos produtos alimentarios presenta a etiquetaxe nesta lingua, porcentaxe que baixa a case o 30 % no caso de produtos non alimentarios.

Fonte: La Vanguardia

Segundo os datos ofrecidos polo Instituto Nacional de Estatística, a edición de libros descendeu en Euskadi case un 10 % en 2016 respecto ao ano anterior. Publicáronse 1569 títulos, dos cales o 28 % estaba en éuscaro.

Fonte: Noticias de Álava

A finais de marzo de 2018 poderán visualizarse as películas participantes no premio "Espiello Agora x l'aragonés", unha iniciativa que nace co obxectivo de promover o patrimonio lingüístico aragonés e fomentar a creación audiovisual nesta lingua.

Fonte: AraInfo

O último informe realizado sobre a situación das linguas cooficiais e linguas minoritarias de España presentado ao Consello Europeo xa non inclúe a lingua árabe ceutí, xa que se considera que pola súa orixe non pode ser considerada unha lingua rexional española.

Fonte: El Faro de Ceuta