España
Solicitan recoñecemento constitucional para as linguas de signos española e catalá
A Confederación Estatal de Persoas Xordas (CNSE) insiste na necesidade de recoñecer na Constitución a lingua de signos como unha lingua oficial máis do Estado español.
Fonte: Servimedia
A metade das empresas vascas con dez ou máis persoas empregadas dispoñen de páxina web en éuscaro
Segundo datos do Eustat, o 50,4 % das empresas vascas con dez ou máis persoas empregadas conta con páxina web en éuscaro unha porcentaxe que ascende ao 61,7 % no caso das que se encontran nas comarcas de Guipúscoa.
Fonte: La Vanguardia
A partida destinada ao asturiano da RTPA vai dedicarse integramente á dobraxe
Os 70 000 euros da Radiotelevisión do Principado de Asturias que estaban destinados ao uso da lingua asturiana van dedicarse á dobraxe de longametraxes e programas infantís.
Fonte: Asturies.com
O Consorcio para a Normalización Lingüística de Cataluña ofrecerá novos cursos de catalán na comunidade
O Consorcio para a Normalización Lingüística de Cataluña organizará unha nova quenda de cursos de lingua catalá en 146 localidades da comunidade. Os cursos permitirán obter certificados de todos os niveis, que serán equivalentes aos oficiais emitidos pola Dirección Xeral de Política Lingüística.
Fonte: Generalitat de Catalunya
Preséntase un libro que recolle o refraneiro de Aragón en lingua aragonesa
O autor Chusé Antón Santamaría escribiu un libro titulado Sapienza en purnas, que recolle, en lingua aragonesa e castelá, o refraneiro do saber popular de Aragón relacionado co paso do tempo.
Fonte: Heraldo
O Goberno de Navarra impulsa unha campaña para promover o "prestixio social do éuscaro"
O Goberno de Navarra impulsará a campaña "O éuscaro de todos e todas" durante o mes de decembro de 2017 para promover o "prestixio social" do idioma. O seu obxectivo, de acordo co Instituto Navarro do Éuscaro, será o de amosar a utilidade da lingua tanto no ámbito persoal como profesional.
Fonte: La Vanguardia
Máis de mil persoas participarán nun encontro para fomentar o uso do éuscaro en Bilbao
As institucións de Bilbao e Biscaia organizan, por sexto ano consecutivo, o encontro "Berbagunea" para promover o uso da lingua vasca na cidade de Bilbao. A xuntanza terá lugar o 14 de decembro de 2017 e asistirán máis de mil persoas amantes do éuscaro.
Fonte: ABC
O TERMCAT publica un dicionario de termos en catalán relacionados co eido da ciberseguridade
O TERMCAT publicou a "Terminoloxía da ciberseguridade", que elaborou en colaboración co Centro de Seguridade da Información de Cataluña (CESICAT) e con expertos na materia. Este dicionario contén máis de 250 palabras en catalán, con definicións equivalentes en castelán, inglés e francés.
Fonte: Generalitat de Catalunya
O Goberno das Illas Baleares presenta unha campaña para fomentar a compra de xoguetes en lingua catalá
O Goberno das Illas Baleares presentou unha campaña para impulsar a venda de xoguetes en lingua catalá e promover o uso desta lingua no ámbito lúdico. Baixo o título de "E ti, xogas en catalán?", a campaña está dirixida a tendas que venden xoguetes en catalán e pretende darlles máis visibilidade para fomentar o seu consumo entre a cidadanía.
Fonte: El Mundo
Solicitan que a Academia da Lingua Asturiana teña presenza no Consello Escolar
O grupo parlamentario de Esquerda Unida presentou unha emenda á lei de modificación do Consello Escolar para que a Academia da Lingua Asturiana teña presenza neste organismo. En concreto, solicítase que seis expertos no eido da educación e da pedagoxía entren no Consello para presentar propostas sobre a implantación do asturiano no sistema educativo.
Fonte: El Comercio
Boletín
Subscríbase ao boletín
