España
O arquivo de Aragón reúne 1700 rexistros sonoros en lingua aragonesa e catalá
A Dirección Xeral de Política Lingüística do Goberno de Aragón incorporou 900 rexistros sonoros e vídeos das localidades nas que se fala lingua aragonesa ou catalá á súa páxina web. Deste xeito, este arquivo de tradición oral chega xa aos 1700 documentos.
Fonte: Heraldo
O Goberno de Navarra e o Concello de Pamplona presentan as actividades do Día Internacional do Éuscaro
O Goberno de Navarra e o Concello de Pamplona presentaron as actividades que terán lugar no mes de decembro para celebrar o Día Internacional do Éuscaro, que será o día 3 dese mes. En concreto, organizaranse actuacións teatrais, concertos ou laboratorios de cultura dixital que se distribuirán por varias localidades como Alsasua, Tafalla, Lesaka ou Sangüesa, ademais de Pamplona e Tudela.
Fonte: Diario de Navarra
Comezan os trámites da proposición de lei para regular o plurilingüismo na Comunidade Valenciana
As Cortes Valencianas aprobaron a proposición de lei para regular o plurilingüismo na Comunidade, unha iniciativa que establece porcentaxes mínimas para valenciano, inglés e castelán.
Fonte: 20minutos
Ondarroa lanza unha campaña dirixida á mocidade para fomentar o uso do éuscaro nas redes sociais
A Fundación Labayru puxo en marcha o desafío #botaba co obxectivo de difundir a través de Instagram expresións en éuscaro que se utilizan entre amigos, na casa e no traballo.
Fonte: El Correo
A Universidade do País Vasco reforzará o uso do éuscaro co seu novo Plan estratéxico
A Universidade do País Vasco aprobou as bases do Plan estratéxico 2018-2021 con 51 votos a favor, 4 en contra, 32 abstencións e un voto nulo. Entre os obxectivos principais deste plan atópase o de fomentar o uso da lingua vasca.
Fonte: El Diario Vasco
O Concello de Pamplona únese a unha plataforma para promover o éuscaro nas redes sociais
O Concello de Pamplona uniuse a BEITU!, unha plataforma de redes sociais en éuscaro para a mocidade de entre 14 e 18 anos. Grazas a BEITU!, os mozos e mozas poderán recibir e compartir contidos en lingua vasca vinculados ao lecer.
Fonte: Noticias de Navarra
Preséntase unha iniciativa para fomentar o uso do éuscaro no País Vasco e Navarra no ano 2018
Institucións do Goberno do País Vasco e Navarra e colectivos que exercen labores en favor do éuscaro, presentaron a iniciativa Euskaraldia, que pretende "activar" o uso da lingua vasca entre a cidadanía vascófona durante once días do ano 2018. En concreto, desenvolverase entre os días 23 de novembro e 3 de decembro do 2018.
Fonte: Noticias de Navarra
O Goberno da Comunidade Valenciana aproba o decreto para o funcionamento da Oficina de Dereitos Lingüísticos
O Goberno da Comunidade Valenciana aprobou o decreto que regula o funcionamento da Oficina de Dereitos Lingüísticos (OLD). O obxectivo desta Oficina será o de garantir os dereitos lingüísticos da cidadanía, que son os que protexen o uso das linguas oficiais da Comunidade.
Fonte: Las Provincias
Case a metade da policía vasca ten acreditado algún perfil lingüístico de éuscaro
Un total de 3437 membros da policía do País Vasco ten acreditado algún perfil lingüístico de éuscaro, o que supón un 43% do total de axentes. Isto significa que, dende a aprobación do primeiro plan de uso desta lingua no ano 2014, a porcentaxe de policías co idioma acreditado medrou un 5%.
Fonte: Noticias de Álava
O Concello de Xixón convoca un premio á Mellor Idea Normalizadora para a lingua asturiana
O Concello de Xixón vén de convocar un novo concurso para conmemorar a figura do xesuíta Fierro Botas. En concreto, trátase do Premio Fierro Botas á Mellor Idea Normalizadora da lingua asturiana, que está destinado a alumnado de ESO e Bacharelato.
Fonte: Asturies.com
Boletín
Subscríbase ao boletín
