O Concello de Bermeo abriu unha nova convocatoria de axudas para fomentar a aprendizaxe do éuscaro e o seu uso na obtención do permiso de conducir. As subvencións para cursos poderán chegar aos 300 euros por formación e aos 500 euros no caso de realizar varias, mentres que superar o exame teórico do permiso B en éuscaro dará dereito a unha axuda de 150 euros.

Fonte: Radio Popular

Preto de 300 docentes da Universidade Politécnica de Valencia reclamáronlle ao reitorado unha maior presenza do valenciano na docencia e o respecto dos dereitos lingüísticos do alumnado. O colectivo PDIxValencià denuncia que só o 6,3 % das clases se imparten oficialmente nesta lingua e que, na práctica, a porcentaxe descende ata arredor do 3 %. Por iso, pide adecuar a oferta ás preferencias do alumnado e garantir que as materias catalogadas en valenciano se impartan efectivamente nesta lingua.

Fonte: Diari de la Llengua

O Tribunal Superior de Xustiza do País Vasco estimou un recurso da Universidade do País Vasco e deixou sen efecto as medidas cautelares que permitían a determinados estudantes non computar a cualificación de éuscaro nas probas de acceso á universidade. O tribunal considera que excluír unha materia obrigatoria do cálculo da nota podería xerar unha situación de privilexio respecto do resto do alumnado.

Fonte: Orain

A Universidade do País Vasco ofrecerá cursos gratuítos de éuscaro para alumnado, persoal investigador e docente durante o curso 2026-2027, tanto en modalidade presencial como en liña. A formación, con niveis básico, intermedio e avanzado, busca facilitar a integración lingüística na comunidade universitaria e favorecer o uso do idioma tamén na vida cotiá.

Fonte: Universidad del País Vasco

O catalán está presente no 42 % dos usos dixitais cotiáns, segundo o Informe Galàxia, que analiza 342 ferramentas web empregadas en diferentes ámbitos. A presenza é especialmente elevada en mapas, comunicación e produtividade, pero descende notablemente na intelixencia artificial, a creación de contidos e a saúde. O estudo advirte ademais de que plataformas como LinkedIn, Instagram ou Duolingo carecen de versión en catalán malia ofreceren outras linguas con comunidades de falantes semellantes.

Fonte: Diari de la Llengua

A Gramática do catalán antigo é a primeira obra que aborda de maneira completa e sistemática o estudo do catalán medieval. A publicación, composta por cinco volumes e preto de 5000 páxinas, reúne o traballo de máis de sesenta especialistas e analiza aspectos como a sintaxe, a morfoloxía, o léxico e a evolución histórica da lingua. O proxecto, froito dunha ampla colaboración universitaria, aspira a converterse nunha obra de referencia para o estudo do catalán medieval.

Fonte: Diari de la Llengua

O Goberno de Cataluña aprobou un decreto para reforzar a gobernanza do catalán no ámbito dixital e adaptala ao impacto da intelixencia artificial e das tecnoloxías lingüísticas. A norma crea un consello asesor que reunirá Administración, sector tecnolóxico, universidades, investigación e sociedade civil, así como unha comisión interdepartamental encargada de coordinar as actuacións públicas. O obxectivo é impulsar e supervisar medidas que reforcen a presenza do catalán no ecosistema dixital.

Fonte: Generalitat de Catalunya

A Generalitat Valenciana destinou 80.000 euros a promover o uso do valenciano mediante dous convenios con entidades sociais, que recibirán 40.000 euros cada unha. As entidades beneficiarias son a Federación Valenciana de Municipios e Provincias (FVMP) e a Federación de Persoas Xordas da Comunidade Valenciana (FESORD-CV).

Fonte: Castelló Extra

A Unión de Federacións Deportivas de Cataluña e o Departamento de Política Lingüística estudan vías para reforzar o uso do catalán no deporte, especialmente entre a infancia, a mocidade e as persoas chegadas de fóra. As entidades sinalan que só o 14 % dos adestramentos se desenvolven maioritariamente en catalán, malia que o 98,2 % das persoas participantes pode comunicarse nesta lingua. A proposta pretende situar os adestramentos e o papel das persoas adestradoras como ámbitos prioritarios para aumentar o uso efectivo do catalán.

Fonte: UFEC

Os Premios Lazarraga convocan a súa novena edición para recoñecer empresas, entidades e persoas de Áraba e Treviño que promovan o uso do éuscaro no ámbito laboral. A iniciativa, integrada no proxecto Lanabes, concederá cinco recoñecementos a candidaturas que incorporen a lingua na súa actividade e contribúan a ampliar a súa presenza no tecido económico. O prazo para presentar propostas permanecerá aberto ata o 25 de outubro e a entrega terá lugar o 12 de novembro.

Fonte: Diputación Foral Álava