O Ministerio de Transportes modificará a denominación oficial do aeródromo mallorquino, que pasará a chamarse Aeroporto de Palma-Mallorca. A Obra Cultural Balear celebra unha decisión que pon fin a case catro décadas de uso dun topónimo contrario á normativa vixente. A nova fórmula respecta o nome oficial da capital e mantén a referencia á illa para facilitar a súa identificación internacional.

Fonte: Diari de la Llengua

O SAGA Barcelona Game Fest celebrará do 9 ao 11 de outubro a súa primeira edición, con máis de 80 actividades arredor da industria, do consumo responsable e das comunidades de xogo en catalán. A cita, que aspira a converterse nun referente do sur de Europa, reunirá empresas, talento profesional e delegacións internacionais, ademais de mostrar máis de cincuenta videoxogos dispoñibles nesta lingua. O encontro reforzará así a proxección exterior do sector catalán e a presenza normalizada do idioma no ámbito dixital.

Fonte: Generalitat de Catalunya

Un informe do CIEMEN conclúe que o catalán é a lingua de traballo maioritaria no terceiro sector, xa que preto do 80 % das entidades o emprega na comunicación interna e o 60 % inicia nela a atención ao público. Porén, a falta de protocolos e recursos leva con frecuencia o persoal e o voluntariado a mudar de idioma para asegurar a comprensión. O estudo reclama máis formación e apoio institucional para compatibilizar a eficacia asistencial coa función destas organizacións como axentes de integración e normalización lingüística.

Fonte: Diari de la Llengua

O Departamento de Política Lingüística abrirá unha liña de axudas para que concellos, entidades municipais descentralizadas e consellos comarcais reforcen o uso efectivo do catalán. A convocatoria poderá financiar ata o 100 % de proxectos de aprendizaxe, dinamización comercial, lecer infantil e xuvenil, cinema, boas prácticas lingüísticas e estudos sociolingüísticos. As subvencións cubrirán tamén gastos de organización, materiais, avaliación e difusión das actuacións.

Fonte: Generalitat de Catalunya

O 78,57 % das familias das Illas Baleares escolleu o catalán como lingua do primeiro ensino para o curso 2026-2027, fronte ao 21,42 % que optou polo castelán. A preferencia pola lingua propia foi maioritaria en todas as illas, con especial incidencia en Menorca, onde alcanzou o 89,7 %, mentres que Eivisa presentou os datos máis equilibrados. En total, formalizáronse 7618 matrículas en centros sostidos con fondos públicos.

Fonte: Govern de les Illes Balears

O Goberno vasco aprobou a reforma normativa que permitirá crear o Euskara Bonua, co que se poderá estudar éuscaro ata o nivel B1 por un pagamento único de 120 euros. O itinerario terá unha vixencia máxima de catro anos e reducirá tanto os custos como os trámites administrativos. A medida procura facilitar que máis persoas inicien, retomen ou manteñan a súa aprendizaxe e empreguen a lingua con maior autonomía.

Fonte: Gobierno Vasco

Do 23 ao 25 de outubro a segunda edición deste festival estará dedicada a poñer en valor a diversidade dialectal do catalán. O programa reservará un espazo destacado ás variedades da Franxa (Aragón) e incorporará un concurso de cantautores no que se valorarán tanto a calidade artística como os trazos lingüísticos de cada proposta. Conferencias, mesas redondas, actividades escolares e exposicións completarán unha cita que busca prestixiar os distintos falares do dominio catalán.

Fonte: Diari de la Llengua

O Goberno de Navarra e Eusko Ikaskuntza renovaron o seu acordo de colaboración, dotado con 60.000 euros, para promoveren o éuscaro como elemento cultural e de convivencia. O convenio financiará a segunda fase dun estudo sobre a relación da poboación migrante e local coa lingua e coa cultura navarra, mediante dúas enquisas complementarias. Os resultados permitirán identificar barreiras, expectativas e oportunidades de participación, ademais de orientar futuras políticas públicas e iniciativas comunitarias de integración.

Fonte: Euskarabidea

O Goberno vasco destinou 400.000 euros a unha nova convocatoria de axudas para impulsar publicacións elaboradas integramente en éuscaro. A iniciativa procura ampliar a oferta cultural nesta lingua, facilitar o seu acceso á cidadanía e fortalecer o tecido editorial vasco. Con esta medida, o Executivo autonómico reforza a creación e difusión de contidos como vía para consolidar a presenza social do idioma.

Fonte: Diario Euskadi

O Goberno catalán aprobou a Estratexia para a lingua de signos catalá 2026-2028, un plan integral dotado con máis de dous millóns de euros en 2026 e articulado en 45 medidas. O plan reforzará a atención en servizos públicos, sanidade e emerxencias, ampliará os apoios educativos e impulsará novos recursos lingüísticos, investigación e contidos dixitais. Ademais, prevé declarar o 3 de xuño Día da Lingua de Signos Catalá e avanzar na protección efectiva dos dereitos das persoas xordas e xordocegas signantes.

Fonte: Generalitat de Catalunya