O Departamento de Saúde presenta o Plan de actuación 2026 para consolidar o uso do catalán no sistema sanitario público. O documento establece medidas organizativas, xurídicas e formativas para profesionais sanitarios, así como mecanismos para garantir os dereitos lingüísticos das persoas usuarias. Como novidade, incorpora un eixe centrado na gobernanza e seguimento, con órganos específicos que permitan avaliar, orientar prioridades e reforzar a rendición de contas. Con estas accións, búscase fortalecer a presenza e a normalización do catalán en todos os ámbitos da atención sanitaria.

Fonte: Generalitat de Catalunya

O Concello de Vitoria-Gasteiz impartirá cursos de éuscaro para diversos colectivos, cun investimento de 960.000 euros e un período de execución entre xullo de 2026 e xuño de 2028. A oferta, incluída nos plans AROA e de Normalización Lingüística, abrangue familias con fillos en idade escolar, persoas maiores de 55 anos, persoal municipal, persoal de comercio e hostalería, e cidadanía estranxeira. As clases serán presenciais e adaptadas a distintos niveis e necesidades formativas, e incluirán probas de nivel para acreditación.

Fonte: Ayuntamiento de Vitoria-Gasteiz

O Consell encargoulle á firma valenciana Invest Group a realización dunha nova enquisa sobre o uso e o coñecemento do valenciano, cun investimento de 172.248 euros, co obxectivo de recoller datos do presente exercicio. O estudo, incluído no Plan Valenciano de Estatística 2025-2028, implicará 8043 entrevistas a domicilio con persoas maiores de 15 anos, seguindo un cuestionario definido pola Subdirección Xeral de Política Lingüística. O proxecto busca ofrecer unha fotografía completa do estado da lingua no territorio, con informes xerais e específicos para análise detallada.

Fonte: Valencia Plaza

A Academia Valenciana da Lingua presentou o Nomenclátor Toponímico Valenciano, unha ferramenta que recolle e sistematiza máis de 125.000 nomes de lugares, co que duplican os recollidos no anterior corpus de 2009, ademais de incorporar xeorreferenciación. O proxecto, elaborado pola Sección de Onomástica, ofrece unha análise lingüística e etimolóxica que permite a profesionais, persoal investigador e persoas afeccionadas acceder a topónimos normalizados, oficiais e de uso obrigatorio en cartografía e documentos públicos. A aplicación, dispoñible en liña, facilita consultas simples e avanzadas, e integra nomes alternativos e enlaces a outras plataformas lingüísticas. Ademais, permite a proposta de corrección ou inclusión de novos topónimos, asegurando unha xestión participativa e rigorosa do patrimonio toponímico valenciano.

Fonte: Diari de la Llengua

Centos de familias ven que se lles nega a posibilidade de matricular os seus fillos en valenciano, debido a que a Consellería de Educación asigna as aulas segundo a elección do curso anterior e non ten en conta as preferencias actuais. A asociación Famílies pel Valencià insta as familias e direccións a presentar reclamacións e pídelle á Consellería rectificación inmediata para garantir igualdade de elección.

Fonte: Diari de la Llengua

A Universidade do País Vasco asume o reto de contribuír á creación de 300.000 novos falantes de éuscaro para 2036 e a incrementar o uso declarado ata o 20 %. O plan estratéxico 2026-2028 da institución prevé fomentar o uso do éuscaro, aumentar a súa presenza e calidade nos estudos de grao e posgrao, investigación e divulgación, e ofrecer acollida lingüística ao alumnado e persoal investigador estranxeiro. Para lograr estes obxectivos, a implicación de toda a comunidade é esencial, e a universidade anima a participar na Euskaltzaleon Martxa o 13 de xuño baixo o lema «euskaraz bizitzeko behar den dena».

Fonte: Universidad del País Vasco 

A oferta de contidos en catalán en Disney+ amplíase coa incorporación de 37 novas dobraxes grazas á colaboración entre a plataforma, o Departamento de Política Lingüística e 3Cat, co que se eleva a 128 o número de títulos dispoñibles nesta lingua. O novo lote inclúe 30 películas de imaxe real, catro de animación e tres que combinan ambas.

Fonte: Generalitat de Catalunya

A Academia de Ciencias Médicas de Bilbao e Euskaltzaindia asinaron por primeira vez un convenio de colaboración centrado na normalización do éuscaro e na difusión das normas lingüísticas de Euskaltzaindia. O acordo recolle atención ás consultas da academia sobre léxico, gramática e ortografía, así como colaboración en bolsas, cursos, programas e divulgación dos fondos en éuscaro das súas bibliotecas. Ademais, acordaron enriquecer e utilizar unha base de datos con máis de 110 millóns de palabras para apoiar o traballo de análise e normativización do idioma.

Fonte: Euskaltzaindia

O Concello de Portugalete convoca subvencións para promover o uso do éuscaro en rótulos, carteis de interior e contido dixital en comercios, hostalería e servizos. As axudas cobren ata o 100 % do gasto en rótulos (máximo 800 €), un 60-75 % en carteis ou webs (máximos 500-800 €) e a adopción do dominio .eus (ata 30 €).

Fonte: En Portugalete

O Concello de Elgoibar, en colaboración con Danobatgroup e a editorial Elkar, convoca a V bolsa Gotzon Garate, con 8000 euros para apoiar novos escritores na creación dunha novela en éuscaro. A persoa gañadora contará con 12 meses para completar a obra e recibirá unha titoría literaria baixo a supervisión do Concello.

Fonte: Diario Euskadi