Bielsa acollerá do 16 ao 18 de outubro as I Chornatas de l’Aragonés, un encontro destinado a reunir persoas vinculadas coa lingua aragonesa desde ámbitos como a investigación, a creación literaria ou a difusión cultural. A iniciativa promoverá o intercambio de coñecementos mediante relatorios, coloquios e actividades arredor do cinema, a literatura e a música. O obxectivo é xerar un espazo de reflexión colectiva sobre a situación actual do aragonés e o seu valor como patrimonio cultural.

Fonte: El Diario de Huesca

O Concello de Irún retoma o programa Mintzalaguna, que reúne persoas que están a aprender éuscaro con falantes habituais para practicar a lingua en grupos reducidos. Os encontros, que comezarán en outubro e prolongaranse ata xuño, celebraranse semanalmente e incluirán tamén actividades complementarias de carácter lúdico. A iniciativa busca crear novos espazos de relación e favorecer que máis persoas incorporen o uso oral do éuscaro á súa vida cotiá.

Fonte: Ayuntamiento de Irun

O alumnado de Historia da Universidade de Valencia reuniu preto dun cento de sinaturas para reclamar unha presenza normalizada do valenciano na docencia, nos materiais e nas actividades universitarias. Segundo os datos achegados, a lingua representa o 40,65 % da docencia nos graos, mentres que nos mestrados a súa presenza baixa ao 3 %. Para o curso 2026-2027, a universidade estableceu como criterio xeral que polo menos a metade da docencia se ofreza en valenciano.

Fonte: Diari de la Llengua

A Obra Cultural Balear e a Universidade das Illas Baleares organizarán do 8 ao 10 de outubro o ciclo «La llengua que es canta», dedicado ao papel da música na normalización lingüística durante as últimas catro décadas. O encontro reunirá especialistas e incluirá mesas de debate e audicións comentadas para analizar a evolución da música en catalán e as perspectivas de futuro.

Fonte: Última Hora

 O Goberno vasco e a asociación Garabide impulsan a creación da Federación Mundial de Comunidades en Procesos de Revitalización Lingüística, que reunirá comunidades de diferentes partes do mundo comprometidas coa recuperación das súas linguas. A futura rede busca compartir experiencias, construír unha visión común sobre a diversidade lingüística e reforzar a capacidade de representación internacional destas comunidades.

Fonte: Gobierno Vasco

A Deputación de Castelló presentou o número 11 de Aula de Lletres Valencianes, revista científica dedicada ao estudo e difusión do valenciano. A nova edición reúne investigacións sobre cuestións como a presenza da lingua na intelixencia artificial e as estratexias de aprendizaxe do inglés entre alumnado valencianofalante e bilingüe. A publicación busca contribuír á investigación, ensino e promoción social do valenciano.

Fonte: La Plana al Día

Un estudo do Instituto de Estudos Cataláns revela que só o 11,3 % das interaccións entre mozos e mozas de dez clubs deportivos de Barcelona se producen exclusivamente en catalán. A investigación identifica as persoas adestradoras e monitoras como referentes lingüísticos capaces de favorecer un maior uso da lingua cando a empregan de forma habitual. O proxecto desenvolverá medidas de formación, acompañamento e seguimento para impulsar o catalán como lingua de relación espontánea nos ámbitos deportivos e de lecer.

Fonte: Diari de la Llengua

A presenza do catalán nas principais plataformas audiovisuais aumentou un 77 % nos últimos catro anos, aínda que continúa sendo minoritaria nos seus catálogos. Filmin concentra a maior oferta, mentres que Netflix, Disney+, Max e Prime Video tamén ampliaron os contidos dispoñibles grazas, en boa medida, á incorporación de dobraxes de 3Cat e a outras iniciativas públicas.

Fonte: Diari de la Llengua

O Parlamento de Navarra aprobou instar o Departamento de Educación a implantar sinalización e carteis bilingües en castelán e éuscaro nos centros educativos públicos da comunidade. A medida dará prioridade aos colexios nos que se emprega o éuscaro nos modelos lingüísticos A, B e D, tanto na sinalización física como dixital.

Fonte: Magisnet

O TSXPV anulou o Decreto 19/2024 sobre a normalización do uso do éuscaro no sector público vasco ao considerar insuficiente a memoria económica que acompañou a súa tramitación. A sentenza, que aínda non é firme, estima parcialmente o recurso presentado por Vox e cuestiona a falta dunha avaliación económica detallada das medidas previstas. Porén, o tribunal desbotou outros argumentos do recurso relacionados coa cooficialidade lingüística e a igualdade ante a lei.

Fonte: Poder Judicial