O Concello de Donostia presentou o Plan estratéxico para a promoción do éuscaro 2026-2036, unha folla de ruta que pretende converter o coñecemento da lingua nun uso real e cotián. O alcalde, Jon Insausti, salientou que o reto consiste en lograr que a cidadanía viva con naturalidade en éuscaro, ao tempo que reivindicou a lingua como ferramenta de cohesión nunha cidade diversa. O documento aposta por reforzar a transmisión familiar, ampliar a oferta de lecer en éuscaro e favorecer a integración lingüística das persoas acabadas de chegar mediante un proxecto colectivo e compartido.

Fonte: Donostiako Udala

O Goberno vasco activou a Rede de Empresas Lanera nun encontro celebrado no Parque Tecnolóxico de Áraba, ao que se sumaron arredor de 80 compañías. A iniciativa procura crear unha comunidade empresarial comprometida co impulso do éuscaro no ámbito laboral, con espazos de colaboración, recursos compartidos e medidas adaptadas a cada realidade. Tras unha fase de diagnóstico con achegas de máis de 300 axentes e máis de 600 experiencias identificadas, o proxecto abre agora unha nova etapa para reforzar o uso da lingua no tecido socioeconómico.

Fonte: Gobierno Vasco

O Goberno vasco aprobou unha nova liña de axudas de 2,25 millóns de euros para que as persoas que estudaron éuscaro no curso 2025-2026 poidan recuperar parte ou a totalidade da matrícula. A medida intégrase nunha estratexia máis ampla para avanzar cara á gratuidade da aprendizaxe e favorecer non só o acceso, senón tamén a continuidade e o uso real da lingua. Nos últimos cinco anos, o Executivo destinou 25,1 millóns a estas políticas, das que se beneficiaron 43.500 persoas, cun aumento notable das matriculacións nos euskaltegis.

Fonte: Gobierno Vasco

A Generalitat fixo balance do primeiro ano do Pacto Nacional pola Lingua cunha valoración positiva e anunciou a creación da Oficina de Protección dos Dereitos Lingüísticos para coordinar queixas e denuncias por discriminación. Segundo o Goberno, xa se completou o 62 % das medidas previstas, con avances salientables na oferta de cursos de catalán, na supervisión dos plans lingüísticos educativos e nas actuacións da Axencia Catalá de Consumo. O Executivo destaca tamén os progresos no ámbito sanitario, onde todos os centros contan xa con referente lingüístico e plans de xestión da lingua.

Fonte: Diari de la Llengua

A Universidade Pública de Navarra incorporará no curso 2026-2027 un título propio de experto en planificación lingüística para a revitalización e a promoción social do éuscaro, financiado polo Goberno navarro. A formación, impartida integramente en éuscaro e en modalidade en liña, busca preparar persoal cualificado para deseñar, xestionar e avaliar políticas lingüísticas en contextos plurilingües. O programa abordará sociolingüística, normativa, xestión institucional e promoción do éuscaro nos ámbitos socioeconómico e non formal.

Fonte: Universidad Pública de Navarra

Xirona é a primeira cidade catalá en elaborar unha enquisa propia sobre usos lingüísticos cos estándares da Enquisa de Usos Lingüísticos da Poboación (EULP), que sitúa no 60,7 % a poboación que emprega habitualmente o catalán, só ou combinado con outras linguas. O estudo amosa unha presenza destacada da lingua en ámbitos como o traballo, o comercio, a restauración ou a atención médica, aínda que só unha de cada catro persoas mantén o catalán cando recibe resposta en castelán. O Concello considera que os datos son positivos mais insuficientes, polo que chama a reforzar o uso social da lingua en todas as interaccións cotiás.

Fonte: Diari de la Llengua

O programa Musikariak Ikastetxeetan, impulsado por Euskarabidea, achegou este curso a música en éuscaro a máis de 6400 alumnas e alumnos de 52 centros educativos de Navarra. A iniciativa, dirixida ao alumnado de ESO e Bacharelato que estuda éuscaro ou en éuscaro, leva creadoras e creadores musicais ás aulas para compartir a súa traxectoria e contextualizala dentro da canción vasca. O proxecto busca reforzar a transmisión cultural, ofrecer referentes actuais e ampliar o coñecemento da mocidade sobre a creación musical en lingua vasca.

Fonte: Gobierno de Navarra

O éuscaro conta cun novo recurso dixital para a aprendizaxe a través da música: Hiztegi Bat, un dicionario en liña creado a partir das letras de Gorka Urbizu, fundador de Berri Txarrak. A plataforma reúne case 400 palabras presentes nas súas cancións, con definicións, referencias aos temas nos que aparecen e exercicios interactivos para practicar. O proxecto, desenvolvido por Beñat Erazuma, amosa o potencial da cultura vasca como ferramenta pedagóxica e como vía para achegar a lingua ás novas xeracións.

Fonte: Radio Nervión

Oarsoaldea reforzará o proxecto AktiBatuz! para promover o uso do éuscaro no deporte xuvenil, coa participación dos concellos de Pasaia, Lezo, Oiartzun e Errenteria e de sete clubs da comarca. A iniciativa, agora coordinada polo servizo lingüístico Ebete, iniciará unha nova etapa con dinámicas actualizadas e accións prácticas para o próximo curso. O obxectivo é asociar o éuscaro a experiencias positivas no deporte e consolidar hábitos lingüísticos entre a mocidade, os equipos técnicos e as entidades deportivas.

Fonte: Herri Bizia

O Parlamento de Cataluña rexeitou a proposta para esixir o nivel A2 de catalán na renovación da regularización extraordinaria de persoas estranxeiras e o B1 nos futuros procesos de arraigamento. A cámara si aprobou, porén, reclamar ao Estado a protección do catalán en todos os territorios onde se fala, así como valorar o coñecemento das linguas oficiais como mérito no acceso á formación sanitaria especializada.

Fonte: Diari de la Llengua