O Goberno vasco destinará até 1,15 millóns de euros en 2026 á formación en éuscaro da Ertzaintza, mediante un acordo entre a Academia Vasca de Policía e Emerxencias e HABE. A iniciativa permitirá impartir cursos para acreditar os perfís lingüísticos 1 e 2, así como formar o alumnado que accede á escala básica da Policía vasca. Con esta colaboración, o executivo busca avanzar na normalización do éuscaro na Administración e garantir unha atención máis próxima e axeitada á realidade sociolingüística de Euskadi.

Fonte: Gobierno Vasco

3Cat estreou «Català fàcil», unha iniciativa audiovisual pensada para reforzar a confianza das novas persoas falantes e favorecer o uso cotián do catalán. O proxecto inclúe 58 vídeos e 170 pezas breves para a plataforma pública, YouTube e redes sociais, con situacións habituais e recursos prácticos baseados nos niveis A1 e A2.

Fonte: Ara

O Goberno catalán abriu unha consulta pública previa do decreto que regulará a avaliación e certificación da lingua de signos catalá, co obxectivo de recoller achegas da cidadanía e do colectivo signante. O novo marco establecerá un sistema oficial de acreditación aliñado cos niveis europeos, regulará as probas, a validez dos certificados e os requisitos das persoas avaliadoras.

Fonte: Generalitat de Catalunya

Revolut incorpora o catalán aos seus caixeiros automáticos en Cataluña e faino ademais como opción predeterminada, segundo confirmou o Departamento de Política Lingüística. A entidade financeira prevé tamén lanzar a súa web e a súa aplicación nesta lingua durante o primeiro semestre de 2027, unha decisión atribuída en boa medida á presión social exercida por persoas usuarias e entidades.

Fonte: Diari de la Llengua

O Departamento de Política Lingüística abriu a segunda convocatoria de axudas para que entidades e concellos pequenos organicen cursos gratuítos de catalán para persoas adultas no curso 2026-2027. A liña, integrada no plan de impulso da lingua, busca garantir formación inicial en todo o territorio, especialmente onde a oferta é máis limitada. A nova edición amplía as entidades beneficiarias, permite formatos presenciais, semipresenciais e virtuais síncronos, e cubrirá o 100 % do profesorado e do material didáctico para cursos A1 e A2.

Fonte: Generalitat de Catalunya

O Concello de Ciutadella presentou a campaña «Idò, aquí vivim en català» para reforzar o uso social do catalán nun contexto de preocupación pola súa progresiva minorización. A iniciativa, desenvolvida con Plataforma per la Llengua e Fem-ho en Català, aposta por unha mensaxe próxima e inclusiva que anima a manter a lingua en situacións cotiás, desde bares até centros educativos ou espazos de lecer. A través dun vídeo con escenas reais, a campaña lembra que moitas persoas entenden o catalán ou queren aprendelo, e chama a vivilo con naturalidade, orgullo e vontade compartida.

Fonte: Menorca

Euskadi impulsa o proxecto «Adi! Filmak euskaraz» para ampliar a presenza do éuscaro no audiovisual e incorporalo con máis forza aos hábitos de lecer da cidadanía. A iniciativa permitirá duplicar os filmes nesta lingua nas salas, con 24 estreas anuais, das cales doce serán grandes producións internacionais, e reforzará tamén a oferta en plataformas dixitais mediante dobraxe e subtitulación. Ademais, Kulturklik incorporará un espazo específico para localizar contidos dispoñibles en éuscaro. O proxecto, desenvolvido con axentes do sector, busca que familias, infancia e mocidade poidan vivir a lingua con naturalidade tamén no consumo cultural.

Fonte: Gobierno Vasco 

A Universidade Politécnica de Valencia ofrece cursos MOOC gratuítos para preparar as probas de valenciano dos niveis B2, C1 e C2, abertos tanto á comunidade universitaria como ao público xeral. A formación inclúe módulos lingüísticos, exercicios autocorrixibles e unha proba final para facilitar a preparación autónoma das persoas participantes.

Fonte: Universitat Politècnica de València

O Goberno de Navarra e o movemento euskaltzale Taupa asinaron un convenio de 200.000 euros para fortalecer o uso social do éuscaro e preparar a próxima edición de Euskaraldia. O acordo permitirá desenvolver o programa «Euskarak 365 egun» e impulsar novas iniciativas como Eusfera, orientada a reforzar a presenza da lingua nos espazos familiares e infantís, e Gau Beltza, centrada no lecer comunitario en éuscaro.

Fonte: Gobierno de Navarra

O Concello de Donostia-San Sebastián publicou, a través do Servizo de Éuscaro, un dicionario castelán-éuscaro pensado para o persoal da hostalería, co obxectivo de facilitar o uso de palabras e expresións básicas nesta lingua no trato coa clientela. A ferramenta, organizada en seis apartados prácticos, procura achegar especialmente o éuscaro ás persoas migrantes que traballan no sector. Ademais, o servizo municipal visitará 300 locais entre abril e maio para presentar este recurso e informar das axudas dispoñibles.

Fonte: Donostiako Udala