O Concello de Pamplona e Soziolinguistika Klusterra asinaron un convenio para desenvolver a IX Medición do Uso das Linguas na Vía Pública, un estudo científico que ofrecerá datos actualizados sobre o emprego real dos idiomas na cidade. A investigación, con máis de tres décadas de traxectoria, baséase na observación sistemática de conversas espontáneas e incorpora melloras metodolóxicas e ferramentas dixitais que reforzan a representatividade dos resultados. Cun orzamento de 11.596 euros, o proxecto permitirá fundamentar en evidencias o futuro Plan municipal de Normalización Lingüística.

Fonte: Iruñeko Udala

Santa Coloma de Gramenet acolleu unha reunión representantes municipais na II Xornada sobre Política Lingüística, centrada nos plans locais de impulso ao catalán e no reforzo do papel dos concellos. Durante o encontro presentáronse 40 propostas de actuación e unha guía práctica para facilitar a elaboración de estratexias propias, ademais de experiencias en acollida lingüística, comercio e ámbito educativo.

Fonte: Generalitat de Catalunya

Asturias acolle desde o 24 de febreiro a rodaxe de Coworkinaos, a primeira serie de ficción coproducida pola Televisión de Galicia e a Radiotelevisión do Principado de Asturias, e gravada en galego e en asturiano. A comedia segue as vivencias de seis persoas de distintas idades que comparten un espazo de teletraballo no rural, onde a convivencia dá pé a conflitos e situacións recoñecibles. O proxecto, no que participan intérpretes de ambas as comunidades, inscríbese na iniciativa “Asturias e Galicia crean ficción”, orientada a reforzar os vínculos culturais e lingüísticos e a impulsar o sector audiovisual nos dous territorios.

Fonte: Culturagalega

A Deputación Foral de Bizkaia impulsa “Zu ere euskaldun” co propósito de situar o éuscaro no centro e escoitar de maneira activa a poboación migrante a través de espazos comunitarios nos que a aprendizaxe lingüística se produza con naturalidade. Un diagnóstico previo revelou que, malia existir un amplo ecosistema de recursos, persisten barreiras simbólicas, pedagóxicas e institucionais que dificultan que as persoas recentemente chegadas se apropien da lingua como ferramenta de integración.

Fonte:  Bizkaiko Foru Aldundia

Máis de 30.000 estudantes cursan este ano asturiano e eonaviego en Asturias, o que supón un incremento do 34 % tras a súa incorporación á etapa de infantil. Na xornada do Día Internacional da Lingua Materna púxose en valor o compromiso do alumnado coa conservación da lingua propia e destacouse que aprender asturiano constitúe ao tempo unha expresión identitaria e unha oportunidade de futuro, capaz de reforzar o vínculo coa comunidade e ampliar horizontes culturais.

Fonte: RTPA

Máis da metade das pequenas e medianas empresas de Cataluña consideran que o coñecemento do catalán é un requisito na contratación, unha cifra que aumenta seis puntos respecto ao ano anterior. A pesar de que o uso desta lingua é amplo entre as empresas, especialmente no sector servizos, tamén se observa un retroceso no seu emprego, especialmente ao adaptarse ás preferencias lingüísticas da clientela. A presencia do catalán nas pemes é especialmente forte na comunicación escrita e nas páxinas web, aínda que a súa utilización diminúe desde 2012.

Fonte: Diari de la Llengua

O presidente do Principado presentou a Estratexia de Normalización do Asturiano e do Eonaviego 2026-2030, un plan elaborado tras unha exhaustiva análise sociolingüística e cultural. A estratexia establece obxectivos e directrices para promover o uso das linguas propias e garantir os dereitos lingüísticos e culturais da cidadanía. Divídese en cinco grandes áreas: a Administración, a transmisión interxeracional, a cultura e o deporte, a economía e a sociedade, e a proxección internacional. Este proxecto inclúe avances importantes como a creación da Subdirección de Política Lingüística e a reforma estatutaria para recoñecer a oficialidade das linguas.

Fonte: Principado de Asturias

O Concello de Irún impulsa unha nova edición do Mes do Éuscaro, iniciativa coa que procura reforzar o uso e a motivación pola lingua entre a mocidade. Baixo o lema «Klik euskarari!», o programa inclúe representacións teatrais, a publicación de creacións do alumnado na revista Irunero e a celebración dun Mintzodromo Gaztea no Espazo Palmera Montero.

Fonte: Ayuntamiento de Irun

A entidade menorquina Fem-ho en Català logrou que o Concello anule a licitación dos novos rótulos viarios que prevía formatos bilingües. Tras o recurso presentado en decembro, os servizos xurídicos municipais concluíron que a sinalización debe axustarse á normativa vixente, que establece a denominación exclusivamente en catalán.

Fonte: Periódico de Ibiza y Formentera

O Plan de fortalecemento do catalán no sistema universitario e de investigación pechou a súa primeira fase cun cumprimento superior ao 80 % dos obxectivos previstos, segundo a comisión de seguimento. A Generalitat inicia agora a súa actualización para o período 2026-2030, co propósito de compatibilizar internacionalización e normalización lingüística, así como de integrar o impacto da intelixencia artificial. Entre as prioridades figuran ampliar a docencia en catalán, reforzar a acollida lingüística e consolidar a súa presenza na investigación.

Fonte: Generalitat de Cataluya