Serielizados Kick abriu a convocatoria da súa quinta edición, coa que seleccionará dez proxectos inéditos de series, webseries ou miniseries de ficción en catalán. Cada proposta recibirá apoio económico, formación especializada e unha residencia creativa, antes de se presentar ante profesionais do sector nun foro final que busca facilitar o seu desenvolvemento e reforzar a creación audiovisual en lingua catalá.

Fonte: Audiovisual 451

O Concello de Bilbao e Euskaltzaindia renovaron o seu convenio para promover e normalizar o uso do éuscaro en todos os barrios da cidade. O acordo inclúe asesoramento lingüístico e a organización de actividades culturais, como teatro, xornadas e publicacións, co obxectivo de reforzar a presenza social da lingua.

Fonte: Bilboko Udala

O Instituto de Estudos Cataláns advirte, tras analizar vídeos de monitorado de ximnasio, dunha forte interferencia do castelán e do inglés no catalán empregado nas clases. O informe sinala carencias fonéticas, morfolóxicas, sintácticas e léxicas, ademais dun uso insuficiente da terminoloxía deportiva propia, polo que reclama maior coidado do rexistro profesional e máis conciencia lingüística no sector.

Fonte: Diari de la Llengua

A Obra Cultural Balear reclamoulle ao Ministerio de Transportes que modifique o nome oficial do aeroporto de Palma para axustalo á toponimia vixente. A entidade propón as fórmulas Aeroporto de Palma (Mallorca) ou Aeroporto de Palma-Mallorca, co fin de manter a referencia á illa sen empregar unha denominación da cidade que considera allea á legalidade actual.

Fonte: Diari de la Llengua

O Instituto de Estudos Baleáricos presentou Saladina 2, a adaptación ás Illas Baleares do método “A punt” para a aprendizaxe do catalán no nivel A2. O material, dirixido a persoas adolescentes e adultas, aposta por un ensino comunicativo e vinculado ao contexto social e cultural balear, con contidos actuais, traballo colaborativo e voces das distintas illas nos audios.

Fonte: Govern de les Illes Balears

A Generalitat prepara novos materiais de autoaprendizaxe de catalán dirixidos a colectivos profesionais, entre eles o sector do taxi, co propósito de facilitar a adquisición da lingua. Ademais, impulsa unha reforma da formación e da acreditación lingüística para persoas adultas, reforza a oferta de cursos e adapta os itinerarios ás necesidades laborais, en paralelo á futura lei de transporte, que prevé esixir competencias en catalán para garantir os dereitos lingüísticos da cidadanía.

Fonte: El Mon

A Generalitat abriu a convocatoria Interlingua, destinada a apoiar nas universidades catalás actuacións de fomento e uso do catalán, do aranés, da lingua de signos catalá e doutras linguas. As axudas contan cun orzamento de 1,66 millóns de euros, 200.000 máis ca na edición anterior. A convocatoria financiará accións de formación, acreditación, acollida lingüística e cultural, así como outras iniciativas universitarias vinculadas ao multilingüismo.

Fonte: Generalitat de Catalunya

Asturias avanzou cara á súa primeira Lei de bibliotecas e fomento da lectura, coa creación dun sistema bibliotecario propio e novas ferramentas de planificación e coordinación. O proxecto reforza a rede pública e reduce a 2000 habitantes o limiar para dispor de biblioteca, aínda que prevé alternativas para os concellos máis pequenos. Porén, o texto non inclúe medidas específicas para garantir a presenza de libros en asturiano nin para visibilizar a produción literaria do país. A tramitación parlamentaria abrirá agora a porta a emendas que determinen se a futura norma recoñece expresamente o papel das bibliotecas na protección da lingua asturiana.

Fonte: InfoAsturies

O Consello de Goberno vasco aprobou unha convocatoria de 650.000 euros para apoiar en 2026 o desenvolvemento de longametraxes, series e miniseries. As axudas cubrirán gastos previos á rodaxe como guión, dereitos, promoción, mercados, casting ou asesoramento. A convocatoria establece contías máximas segundo o formato, o xénero e a lingua, con importes superiores para proxectos realizados en éuscaro.

Fonte: Gobierno Vasco

Un estudo internacional liderado pola UPF conclúe que preto de 2000 linguas comparten patróns para reutilizar palabras ou partes delas sen comprometer a claridade comunicativa. A investigación, publicada en Nature Human Behaviour, analizou case 2000 idiomas de 193 familias lingüísticas a partir da base de datos Lexibank. O traballo mostra que as linguas tenden a aforrar léxico cando o contexto evita a ambigüidade, mais crean formas diferenciadas cando existe risco de confusión.

Fonte: Diari de la Llengua