A AMIC puxo en marcha novas edicións dos certames AMIC-Directes e AMIC-Ficcions, dirixidos a mozos e mozas de 14 a 18 anos para impulsar a creación audiovisual e literaria en catalán. O primeiro anima a producir directos e videopódcasts en Twitch ou YouTube, mentres que o segundo propón crear unha historia propia en tres capítulos. As iniciativas buscan fomentar a creatividade da mocidade e ampliar o uso do catalán nos novos formatos dixitais.

Fonte: Diari de la Llengua

Nestas xornadas, que se desenvolveron entre o 16 ao 18 de outubro, participaron especialistas e persoas falantes de diferentes territorios. Os encontros combinaron relatorios, coloquios e presentacións de publicacións, coa intención de reforzar o uso da lingua e favorecer a súa continuidade entre xeracións.

Fonte: Sobrarbe Digital

O Goberno de Cataluña aprobou a reserva dun espazo na TDT para que RTVE poida emitir La 2 Cat, unha canle integramente en catalán. A reorganización busca reforzar a presenza desta lingua no espazo audiovisual público e impulsar a modernización tecnolóxica da televisión.

Fonte: 20minutos

A Mancomunidade de Uribe Kosta puxo en marcha unha campaña para fomentar que a cidadanía empregue o éuscaro nas súas relacións coa Administración. A iniciativa, que se desenvolverá mediante carteis nos espazos municipais de Barrika, Gorliz, Lemoiz, Plentzia, Sopela e Urduliz, anima a iniciar e manter as interaccións en éuscaro. A campaña busca ampliar as oportunidades de uso da lingua e reforzar a súa normalización no ámbito administrativo.

Fonte: Mancomunidad de Uribe Kosta

Plataforma per la Llengua e o Consello do Deporte Escolar de Barcelona asinaron un convenio para promover o uso do catalán no deporte escolar. O acordo recolle, entre outros aspectos, a creación de contidos divulgativos sobre lingua e deporte e a incorporación da perspectiva lingüística nas formacións do CEEB.

Fonte: Plataforma per la Llengua

Miles de persoas participaron no Nafarroa Oinez, organizado conxuntamente polas ikastolas Erentzun e San Fermín. As entidades promotoras reivindicaron o dereito a aprender e vivir en éuscaro en toda Navarra e reclamaron superar as limitacións territoriais ao seu uso. A xornada destacou a responsabilidade compartida de institucións e sociedade na normalización lingüística.

Fonte: EFE

O Concello de Beasain recibiu once activistas de dez comunidades lingüísticas participantes no programa internacional Aditu, coordinado pola asociación Garabide. Durante o encontro coñeceron as políticas municipais de promoción do éuscaro e intercambiaron experiencias sobre revitalización de linguas minorizadas. O Concello explicou que destina o 5,32 % do seu orzamento á política lingüística e que desenvolve actuacións específicas para favorecer o uso do éuscaro fóra do ámbito educativo.

Fonte: Besaingo Udala

Plataforma per la Llengua rexistrou 3645 queixas por vulneracións dos dereitos lingüísticos en 2025, fronte ás 395 de 2016, cun forte incremento tamén das discriminacións graves. A sanidade sitúase como o principal ámbito de preocupación, pois concentrou 69 das 75 discriminacións documentadas nas administracións. A entidade reclama unha aplicación máis efectiva da normativa lingüística e alerta de que as dificultades para recibir atención en catalán poden afectar tamén á seguridade asistencial.

Fonte: El Món

O catalán converteuse no terceiro idioma máis solicitado nas ofertas de emprego en Cataluña, presente como requisito explícito no 17,9 % das vacantes de 2025, segundo un estudo de Pimec e a UOC. A demanda medrou con forza desde 2019, cando só o 0,6 % das ofertas o esixían, un aumento que o estudo relaciona coa perda do seu carácter de coñecemento dado por suposto. Educación, atención ás persoas, hostalaría e restauración son algúns dos sectores nos que resulta máis difícil atopar profesionais cun bo nivel de catalán.

Fonte: Diari de la Llengua

A empresa DuckDik lanzou unha pulseira de saúde que permite ás persoas usuarias escoller entre galego, éuscaro, catalán, castelán e valenciano para interactuar coa aplicación asociada. O dispositivo non dispón de pantalla e concentra a comunicación na aplicación, que ofrece os servizos na lingua seleccionada. A iniciativa parte da importancia de facilitar a comprensión das recomendacións relacionadas coa saúde na lingua habitual de cada persoa.

Fonte: Consello da Cultura Galega