A Secretaría Xeral de Política Lingüística da Consellería de Cultura, Educación e Universidade abriu no mes de maio de 2020, no marco do Plan de reactivación dos sectores cultural e turístico fronte aos efectos derivados da covid-19, unha convocatoria de axudas á que se podían presentar creacións culturais, bens ou servizos de consideración análoga, coa finalidade de configurar un fondo de contidos creativos de interese cultural e artístico, lingüístico e turístico.

Baixo a denominación de Fondo de Proxectos Culturais Xacobeo 2021 impulsouse esta iniciativa que buscaba preservar a actividade e o emprego dos sectores cultural e turístico para paliar os efectos da crise sanitaria provocada pola covid-19 e xerar contidos de calidade a disposición da poboación galega.

A creación deste repositorio de contidos creativos de interese cultural en lingua galega ten os seguintes obxectivos:

• Dinamizar a lingua propia de Galicia
• Inxectar fondos e apoiar artistas, creadores e empresas do eido cultural no contexto da crise da covid-19 para que ninguén quede fóra
• Abrir unha vía para a continuidade, viabilidade e visibilidade da oferta e do consumo de propostas lingüísticas e culturais

A convocatoria, dotada inicialmente cunha partida de 1,5 millóns de euros, está destinada  a todas as ramas do sector cultural con proxectos virtuais ou que se vaian realizar de xeito presencial baixo as condicións que a situación sanitaria permita. Ou mesmo combinar ambas opcións. Tamén outros servizos como deseño, produción técnica ou subministración de materiais e expresións artísticas. En resumo, os produtos deste repositorio de contidos poden pertencer aos seguintes ámbitos:

• Virtual (vídeos, música, películas, documentais, fotografías...)
• Presencial (actuacións teatrais, musicais, exposicións...)
• Outros servizos: materiais e produción

Este fondo dispón de tres modalidades:

• Música, artes escénicas e audiovisual
• Dinamización da lingua galega, do patrimonio cultural e de proxectos editoriais, literarios e expositivos.
• Xacobeo, turismo, xeografía, paisaxe, gastronomía, usos e costumes sociais.

Máis información

Recursos