Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O goberno flamengo esixirá agora un nivel máis alto de neerlandés oral (B1) para superar o seu programa de integración social. A medida pretende facilitar o acceso ao emprego e á vida social, e virá acompañada de máis formación lingüística para as persoas migrantes.
Fonte: Belga News Agency
A Consellería de Educación iniciou unha nova campaña para fomentar a matriculación en asturiano e eonaviego en centros públicos para o próximo curso. A campaña, que se desenvolverá en tres fases, busca destacar os beneficios destas linguas nas distintas etapas educativas e a súa relación coa identidade cultural de Asturias. A promoción difundirase a través de medios impresos, dixitais e redes sociais e complementarase coa repartición de materiais informativos nos centros educativos.
A Deputación de Valencia e a Academia Valenciana da Lingua (AVL) están explorando novas vías de colaboración para impulsar o uso do valenciano. Ambas as entidades coincidiron na importancia de protexelo como elemento de cohesión social e non de separación.
Fonte: El Periòdic
A Comisión de Normalización Lingüística da Facultade de Filoloxía convoca o XI Concurso literario Mazarelos, dirixido ao alumnado e ao persoal investigador da Universidade de Santiago. O certame, que admite obras de calquera xénero e tema, busca fomentar a creatividade e a expresión en galego. Os traballos deberán ser orixinais e inéditos, e os premios son de 600, 500 e 400 euros para os tres primeiros postos.
O pleno da Real Academia Galega aprobou a candidatura de Henrique Monteagudo á presidencia da institución. Monteagudo, catedrático de Filoloxía Galega da USC, estará acompañado na comisión executiva por Ana Boullón, María López-Sández, María Dolores Sánchez e Lourenzo Fernández. A súa xestión buscará reforzar a colaboración coa sociedade civil e outras entidades, mellorar a presenza feminina na RAG e continuar a promoción do galego.
O Goberno vasco asinou un convenio coa Oficina Pública do Éuscaro para impulsar o seu uso en Iparralde. O acordo busca reforzar a cooperación institucional e promover a presenza da lingua na educación, cultura e medios de comunicación da zona.
Fonte: Euskadi.eus
O arquipélago de Madeira participará por primeira vez na final nacional das Olimpíadas da Lingua Portuguesa, grazas á clasificación de dous estudantes que se clasificaron para a terceira e última fase do certame. Esta iniciativa ten como obxectivo fomentar o uso correcto e consciente do portugués entre o alumnado do 3.º ciclo do ensino básico e do ensino secundario.
Fonte: Dnotícias
O secretario xeral da Lingua, Valentín García, participou na descuberta dunha placa conmemorativa dedicada a VIctorino Gutiérrez Aller nunha homenaxe que o Concello de Lalín lle rende así ao notario cofundador da Irmandade Xurídica Galega.
Fonte: O Portal da Lingua Galega
O obxectivo da convocatoria de subvencións para entidades sen ánimo de lucro en Pamplona, que conta cunha dotación de 118 000 euros, é promover, difundir e normalizar o uso do éuscaro. As actividades deberán estar orientadas á mellora do uso e a competencia lingüística do éuscaro, realizarse no municipio entre novembro de 2024 e outubro de 2025 e estar abertas á cidadanía. As subvencións financiarán entre o 35 % e o 70 % do balance aceptado, cun límite de 22 000 euros por entidade.
A palabra "cantareira" foi elixida como Palabra do Ano 2024 e incorporada ao paseo das Palabras do Ano de Lugo nun acto no que Víctor F. Freixanes destacou a importancia das cantareiras na transmisión oral da lingua galega, vínculo entre xeracións. A elección coincide co inicio da celebración das Letras Galegas 2025, dedicadas ás cantareiras e á poesía popular oral.
Subscríbase ao boletín
