Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O Proxecto de Lei 3690/10 está actualmente en análise na Cámara dos Deputados do Brasil e permitirá crear un programa de preservación, recuperación e transmisión das linguas indíxenas brasileiras que ademais pasarán a ser recoñecidas como bens de patrimonio inmaterial.
Fonte: Câmara dos Deputados
O Grupo de Investigación de Románicas analizou 471 textos de máis dun cento de trobadores para profundar nas estratexias de comunicación cifrada empregadas nas composicións galego-portuguesas nas que se declara o amor a mulleres nobres.
O ministro de Cultura sinalou que incluirá o aragonés e o asturiano na programación do seu departamento e mostrou a súa vontade de difundir e protexer a diversidade cultural e lingüística de España.
Fonte: La Voz de Asturias
O éuscaro tivo unha presenza do 2,48 % nas salas de cine comerciais en 2023, o que significa que das 563 películas estreadas o pasado ano, só 14 se emitiron en versión orixinal en éuscaro, ou dobradas ou subtituladas nesta lingua.
Fonte: EITB
O primeiro ministro de Croacia, Andrej Plenković, presentou finalmente a última versión da Lei sobre a lingua croata que garantirá a protección e a aprendizaxe do idioma no estranxeiro. A medida será adoptada polo Parlamento no mes de marzo.
Fonte: Euractiv
O estado de Novo México, EUA, quere aprobar unha lei que permitirá crear un fondo fiduciario para que as comunidades indíxenas poidan elaborar programas educativos que garantan a supervivencia das súas linguas nativas.
Fonte: Source NM
O plan para fomentar o emprego do éuscaro no Concello de Abanto Zierbena ten previstos tres retos para os vindeiros anos: ofrecer os servizos en éuscaro, incrementar o seu uso oral entre o persoal e os responsables políticos, e impulsar unha correcta xestión do plan de uso.
Fonte: EnAbantoZierbena
O presidente da Deputación de Pontevedra reuniuse con representantes do tecido musical da provincia para comezar a perfilar o contido do programa de difusión de música en galego, unha iniciativa que ten como obxectivo que grupos e solistas que realizan os seus espectáculos nesta lingua actúen en concellos de menos de 50 000 habitantes.
Esta plataforma de contidos educativos audiovisuais en catalán comezará a funcionar en maio e será de acceso universal e gratuíto para a comunidade educativa. Trata temas como matemáticas, historia, arte etc. e ten como obxectivo proporcionar recursos de calidade para as aulas, así como impulsar a lingua.
Fonte: El Món
O secretario xeral de Política Lingüística, Valentín García, participou na apertura da exposición «55 anos da liturxia en galego (1969-2024)», impulsada pola Editorial SEPT e producida por Merlín Comunicación co apoio da Consellería de Cultura, Educación, FP e Universidades e do Arcebispado de Santiago de Compostela.
Subscríbase ao boletín
