A Concellaría de Mocidade, Solidariedade e Normalización Lingüística organiza, en colaboración coa Mesa pola Normalización Lingüística, a segunda edición da campaña Por un Nadal en Galego, na que participan os 28 centros de educación infantil e primaria (CEIP) da cidade.

Fonte: XornalGalicia.com

Marisol López mantivo o mércores 17 de decembro unha xuntanza de traballo cunha delegación do Euskarabidea/Instituto Navarro del Vascuence

As campañas para incentivar o uso do galego, as actividades de dinamización lingüística, os novos certificados Celga ou o labor dos equipos de normalización dos centros de ensino foron algúns dos contidos abordados na reunión

Os representantes do Goberno de Navarra aproveitaron a súa estadía en Galicia para visitar a exposición “As nosas palabras, os nosos mundos”, que permanece estes dias no Kiosko Alfonso da Coruña

A secretaria xeral de Política Lingüística, Marisol López, mantivo o mércores 17 de decembro unha xuntanza de traballo co director xerente de Euskarabidea/Instituto Navarro del Vascuence, Xabier Azanza Arbizu, para expoñerlle as principais medidas e estratexias postas en marcha en Galicia durante os últimos anos en materia de promoción da lingua galega. Á reunión, realizada a petición do organismo navarro, tamén asistiron o director do Servicio de Asesoramiento y Formación del Vascuence, Julen Calvo Jiménez; o director do Servicio de Desarrollo del Vascuence, Rubén Fuertes Peralta, e as subdirectoras da Secretaría Xeral de Política Lingüística, Cristina Rubal e Nita Ferreiro.

Marisol López deulles conta das principais liñas de actuación da Secretaría Xeral ao longo desta lexislatura e fixo fincapé na importancia de dar a coñecer as linguas cooficiais do Estado fóra dos territorios nos que se falan. Igualmente, ofreceulles información detallada sobre algúns dos proxectos máis significativos do Goberno galego para fomentar o uso da
lingua propia do país.

Os representantes do Instituto Navarro del Vascuence interesáronse especialmente por actividades como a campaña xeral “En galego tes todo por vivir. Tócache!”, e por algunhas das actuacións ligadas a esta iniciativa. Así, coñeceron de preto os proxectos de A Cova e de O Contador, no relativo ás actividades de dinamización lingüística na rúa; ou a Xeración E logo! e o programa dos Axóuxeres, no ámbito das accións de fomento da transmisión familiar da lingua.

Outros dos asuntos que se abordaron na reunión foron o establecemento dos novos certificados de lingua galega, Celga, e o labor desenvolvido para revitalizar o traballo dos equipos de normalización lingüística dos centros de ensino.

Na xuntanza, Marisol López fixo referencia tamén á exposición itinerante “As nosas palabras, os nosos mundos”, sobre a vitalidade do galego na diversidade lingüística mundial. Así, comentoulles aos representantes navarros que a mostra comezou a súa itinerancia en xullo pasado en Santiago de Compostela para trasladarse despois a Vilagarcía, Bilbao, Bruxelas, Vigo, Madrid e A Coruña, onde se inaugurou esta semana e onde permanecerá ata o 4 de xaneiro.

Con posterioridade á xuntanza realizada nas dependencias da Secretaría Xeral de Política Lingüística, os integrantes da delegación de Navarra desprazáronse á Coruña para facer unha visita guiada á exposición “As nosas palabras, os nosos mundos”, instalada no Kiosko Alfonso.

Fonte: Xunta de Galicia

O xogo Cativadas, no que unha ratiña virtual (Lola) lles aprendía aos internautas de curta idade (e aos maiores tamén) diferentes coñecementos prácticos sobre as redes, a informática en xeral e o galego, volve á rede.

Fonte: Código Cero

A Federación Galega de Comercio (FGC) utilizará "todos os medios legais", sen descartar a vía xudicial, se na nova Lei de Comercio se lles obriga a rotular os establecementos e os prezos en galego, como di un dos artigos do borrador da normativa que tramita a Consellería de Industria.

Fonte: El País

A concelleira de Normalización Lingüística, Guadalupe Rodríguez, presentou no Pazo de Raxoi unha nova edición das campañas Carta aos Reis Magos e Para vivir un Nadal en galego, dirixidas a promover o uso do galego nos centros educativos e nos comercios.

Fonte: Concello de Santiago de Compostela

O presidente do PPdeG, Alberto Núñez Feijóo, defendeu "unha Galicia plurilingüe" para que os galegos "teñan a liberdade de elixir" en que lingua queren expresarse.

Fonte: Europa Press

O director xeral de Comunicación Audiovisual, Manuel Fernández Iglesias, rexeitou a creación dun servizo galego de tradución que permita ofrecer as producións cinematográficas estranxeiras neste idioma co fin de que as proxecten as salas comerciais da comunidade.

Fonte: Galicia Hoxe

Os beneficiarios participarán en proxectos sobre fraseoloxía, terminoloxía científica, as Cantigas de Santa María, identidade colectiva, linguas románicas e bibliografía da literatura galega, entre outros

Os bolseiros recibirán unha asignación mensual de 954 euros e deberán presentar un informe sobre a actividade realizada unha vez conclúa o período de colaboración co Ramón Piñeiro

As persoas interesadas en acceder a estas bolsas disporán de 31 días de prazo para presentar as solicitudes

A Secretaría Xeral de Política Lingüística convoca dez bolsas de colaboración en proxectos de investigación que se están a desenvolver no Centro Ramón Piñeiro para a Investigación en Humanidades. O Diario Oficial de Galicia fixo pública o pasado luns a resolución pola que se aproban as bases que rexerán o concurso público para a adxudicación destas bolsas. Os beneficiarios realizarán os seus traballos ao longo do 2009. Entre os requisitos que deberán cumprir, figuran o de estaren en posesión do título de licenciado ou licenciada e o de acreditaren coñecemento da lingua galega no nivel de perfeccionamento ou Celga 4.

A estadía dos bolseiros durará ata o 31 de decembro do 2009 e poderase prorrogar anualmente ata un máximo total de tres anos, á vista do traballo realizado polo bolseiro, sempre que o proxecto ao que estea vinculado requira do seu labor e así o permitan as dispoñibilidades orzamentarias.

O importe das bolsas inclúe unha asignación mensual de 954 euros, que é incompatible con calquera outra axuda ou actividade remunerada e, ademais, as persoas beneficiarias disporán dun seguro de asistencia médica e de accidentes.

Solicitudes
O prazo de presentación de solicitudes será de 31 días naturais contados a partir do seguinte ao da publicación desta convocatoria no Diario Oficial de Galicia, e poderán entregalas na sede do Centro Ramón Piñeiro ou en calquera rexistro público da Comunidade Autónoma de Galicia. As persoas interesadas en acceder a estas bolsas deberán cubrir un formulario e achegar, entre outra documentación, a certificación académica completa e a acreditación de coñecemento de lingua galega do nivel de perfeccionamento ou Celga 4.

A selección dos candidatos e candidatas será realizada por unha comisión presidida polo coordinador-científico do Centro Ramón Piñeiro e composta por tres vogais propostos por ese coordinador e nomeados pola secretaria xeral de Política Lingüística. A resolución publicarase no Diario Oficial de Galicia. Ademais, Política Lingüística difundirá na súa páxina web a relación dos beneficiarios e o importe das bolsas concedidas.

Unha vez finalizada a bolsa, o bolseiro ou a bolseira deberá presentar un informe da actividade realizada, co visto e prace do director do proxecto.

Áreas de investigación
As bolsas convocadas teñen como finalidade colaborar nos proxectos Corpus de referencia do galego actual, Síntese de voz en galego, Tesouro fraseolóxico galego, Cantigas de Santa María, Base de datos do Atlas das Linguas Románicas, Terminoloxía científico-técnica, Bibliografía da literatura galega e Dimensións da identidade colectiva en Galicia.

Fonte: Xunta de Galicia

A partir de agora, para superar as ofertas públicas de emprego de Galicia haberá que saber manexar o galego e contestar as preguntas sobre lexislación neste idioma. A polémica iniciativa do Sergas súmase á que xa tomaron no seu día os gobernos de Baleares e do País Vasco.

Fonte: Diario Médico

Aínda son unha minoría e atopalos nos estantes dos supermercados non é nada doado. Os xoguetes en lingua galega comezan a asomarse no mercado pero a meirande parte hai que adquirilos en tendas especializadas ou a través da rede. A Asociación Profesional de Pedagogos de Galicia demandou o ano pasado que a industria elaborase bonecos ou xogos electrónicos que falasen galego, unha medida que Política Lingüística trasladou os xogueteiros pero que non tivo o éxito agardado.

Fonte: La Opinión