A totalidade das prazas ofertadas nesta actividade, 50 en cada cidade, quedou cuberta por profesionais do ensino primario e secundario

O programa estrutúrase en seis sesións, nas que se abordarán a planificación sociolingüística, o proxecto lingüístico de centro e as iniciativas que se están desenvolvendo con éxito en diferentes comunidades

Continúa aberto o prazo de inscrición, ata o 14 de novembro, para as cidades de Santiago, A Coruña, Lugo e Vigo

As cidades de Ferrol, Pontevedra e Ourense acollen, a partir do 1 de outubro, a terceira edición dos Seminarios de Dinamización Lingüística no Ensino. As xornadas están organizadas pola Secretaría Xeral de Política Lingüística, coa colaboración da Dirección Xeral de Ordenación e Innovación Educativa.

Esta actividade, destinada ao profesorado de ensino primario e secundario, tanto dos centros públicos coma dos privados, contou con moi boa acollida entre os docentes, que cubriron a totalidade das prazas dispoñibles, 50 en cada cidade.

Os seminarios están pensados para darlle formación ao profesorado que debe desenvolver no seu centro labores de planificación lingüística co fin de acadar a competencia plurilingüe que marca a lexislación.

Tres das seis sesións das que consta o seminario están dedicadas ao proxecto lingüístico de centro e á planificación sociolingüística. Para iso, contarase coa participación dunha especialista da Comunitat Valenciana, Montserrat Ferrer, que ofrecerá formación teórica. Ademais abordaranse experiencias concretas de centros que están desenvolvendo a planificación sociolingüística e realizarase un obradoiro no que os asistentes, distribuídos en grupos de traballo, acometerán supostos prácticos.

Os seminarios tentan, así mesmo, presentar alternativas viables e realistas que se están a desenvolver na actualidade e que poden valer de referente para impulsar o incremento de usos da lingua, tanto na comunidade educativa como no seu contorno.

As iniciativas de fomento do uso do galego oral e de utilización das novas tecnoloxías na aula tamén terán cabida nestes seminarios, que ano tras ano esgotan o número de prazas ante a gran demanda existente no profesorado.

En Ferrol, o seminario desenvolverase no IES de Canido; en Pontevedra será na Escola Oficial de Idiomas e en Ourense no IES Universidade Laboral. Nos tres casos, as sesións comezarán o 1 de outubro, e prolongaranse durante os días 2, 3, 7, 8 e 9 do mesmo mes, sempre a partir das 18,00 horas.

Tamén en Santiago, A Coruña, Lugo e Vigo
Santiago, A Coruña, Lugo e Vigo tamén acollerán este seminario, pero nos meses de novembro en decembro. As sesións iniciaranse o 25 de novembro, e continuarán o 26 e o 27 do mesmo mes e os días 2, 3 e 4 de decembro. No caso de Compostela, o seminario realizarase no IES As Fontiñas; na Coruña será no IES Rafael Dieste; en Lugo no IES Politécnico de Lugo e en Vigo no IES Politécnico de Vigo. Nestes casos, o prazo de matrícula remata o 14 de novembro.

Os asistentes recibirán un certificado de asistencia expedido polo Servizo de Formación do Profesorado da Consellería de Educación e Ordenación Universitaria. Todos os profesores e as profesoras que desexen asistir aos seminarios deben inscribirse no enderezo electrónico http://www.edu.xunta.es/fprof.

Fonte: Xunta de Galicia

A nova versión do navegador Firefox 3, que se anunciara para o 25 de xullo, xa se pode descargar no noso idioma. Agora ben, grazas ao traballo dun amplo grupo de voluntarios, está en fase “beta”, que pode durar arredor dun mes. Pasado ese tempo, o navegador galego estará xunto ás máis de corenta traducións en diferentes linguas do mundo.

Fonte: Consello da Cultura Galega

A plataforma para a defensa do uso do galego, unha entidade privada, ameaza por carta propietarios de tendas que usan o castelán nos seus escaparates e rótulos.

Fonte: La Opinión

O deputado nacionalista Bieito Lobeira dedicou o pasado 2 de outubro unha rolda de prensa a criticar a actitude "pasiva" ou de "ataque" dalgúns sectores do PP con respecto ao idioma galego. Evitou, en todo momento, referirse aos socios do BNG na Xunta. Pero, ao final, chegou a quenda de preguntas e a Lobeira non lle quedou máis remedio que contestar. "Hai áreas do Goberno nas que non se está a aplicar o decreto do galego" aprobado en 2007. "Cómpre que o Goberno se poña as pilas e cumpra co plan" de normalización.

Fonte: El País

No acto de presentación participarán personalidades da vida cultural, universitaria e política de Galicia, e representantes da Academia das Ciências de Lisboa e da Academia Brasileira das Letras.

Fonte: Vieiros

A Mesa pola Normalización Lingüística anunciou que estuda a posibilidade de emprender accións legais contra Javier Losada, alcalde da Coruña, polas súas declaracións en Radio Voz, especialmente pola frase «en democracia sobran os inquisidores». O alcalde entraba así na polémica sobre o envío de cartas aos comerciantes e empresarios por parte da Mesa para, segundo a entidade, «vixiar ou cumprimento da lei ou evitar discriminacións».

Fonte: La Voz de Galicia

¿O futuro da industria do cine pasa pola lingua? ¿Cal é o mercado das producións feitas en lingua minorizadas? Estas son algunhas das cuestións que se porán sobre a mesa no foro A lingua fendida. O audiovisual e o galego (14 e 15 de outubro) que organiza a Academia Galega do Audiovisual.

Fonte: Consello da Cultura Galega

O estándar da lingua cumpre o seu primeiro cuarto de século se tomamos como punto de partida a publicación das Normas Ortográficas e Morfolóxicas do Idioma Galego. A Xunta de Galicia refrendou aquelas Normas, aprobadas un ano antes pola Academia Galega da Lingua e o Instituto da Lingua Galega.
Pasaron só vinte e cinco anos, mais o contexto sociolóxico, político e lingüístico mudou, nalgún caso de xeito notable. Desde a II República española empezárase a traballar seriamente, por parte das institucións científicas vinculadas ao grupo Nós, nunha escritura unificada para o noso idioma. Se nos países con Estado propio (Grecia) ou cunha pequena burguesía proclive ao idioma (Cataluña) as discusións sobre o modelo de lingua escrita cobraron no seu día gran virulencia, no caso galego engadíanse dificultades aínda maiores.

Fonte: Galicia Hoxe

O II Encontro de Política Lingüística desde as administracións locais da Coruña pretende dar a coñecer propostas de acción e coordinación para a promoción social do uso do galego e deseñar liñas de cooperación entre concellos.

Fonte: Galicia Hoxe

* Política Lingüística destina un millón de euros a esta convocatoria, o que supón un incremento de 200.000 euros respecto da contía establecida no pasado exercicio
* O prazo para entregar as solicitudes remata o 6 de outubro
* O financiamento máximo para os centros con máis de 50 alumnos e alumnas será de 2.500 euros

A Secretaría Xeral de Política Lingüística convocou en setembro pasado subvencións por un importe total de un millón de euros para desenvolver proxectos de fomento do uso do galego nos centros públicos de ensino non universitario de Galicia que dependen da Consellería de Educación e Ordenación Universitaria. O luns, 6 de outubro, remata o prazo establecido para a presentación das solicitudes de axudas con cargo a esta convocatoria.

As solicitudes deberán remitirse aos gabinetes provinciais da Secretaría Xeral de Política Lingüística, nas delegacións provinciais da Consellería de Presidencia, Administracións Públicas e Xustiza e presentaranse, preferentemente, nos rexistros destas delegacións ou tamén en calquera outro rexistro administrativo propio ou concertado da Comunidade Autónoma de Galicia. A data de entrada válida é a de entrada nalgún dos rexistros, non considerándose válida a data de saída do rexistro do centro de ensino.

O financiamento máximo para os centros con máis de 50 alumnos e alumnas será de 2.500 euros, 600 euros para os que conten cun número de estudantes de entre 25 e 50, e 400 euros para os centros con menos de 25 alumnos.

Incremento
Nesta edición, Política Lingüística decidiu incrementar en 200.000 mil euros a contía destinada a esta liña de subvencións respecto da asignada o ano pasado, co obxectivo de achegar máis recursos e beneficiar máis centros.

Por outra banda, o departamento que dirixe Marisol López, tendo en conta a petición feita por parte dos equipos de dinamización e normalización lingüística dos centros de ensino, acordou adiantar este curso a publicación da convocatoria de axudas para que colexios e institutos poidan dese xeito planificar as súas iniciativas cun orzamento pechado xa na primeira parte do período académico. Ademais, os centros adxudicatarios dos incentivos recibirán, no mes de decembro, un anticipo da cantidade concedida.

Para resolver a adxudicación das axudas terase en conta, fundamentalmente, a calidade dos proxectos, que terá un peso do 80 por cento, e ponderarase tamén o número de estudantes de cada centro.

Na resolución publicada a comezos de setembro no Diario Oficial de Galicia, establécese que os criterios de calidade que se avaliarán serán: a implicación activa dos distintos membros da comunidade no proxecto, a orixinalidade nas propostas para incidir nos usos reais da lingua, a potenciación das competencias activas sobre as pasivas, con especial atención a aquelas que fomenten a oralidade, a utilización de novas tecnoloxías, a colaboración con outros organismos alleos ao centro, a diversificación de actividades e a realización de proxectos plurianuais.

Fonte: Xunta de Galicia