Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O Goberno galés anuncia un plan para frear o declive do idioma nas áreas onde tradicionalmente ten maior presenza, como Anglesey, Gwynedd, Carmarthenshire e Ceredigion. As medidas inclúen mellorar o acceso á educación en galés e ofrecer máis orientación no uso da lingua en ámbitos como a vivenda, a economía e o desenvolvemento comunitario.
Fonte: BBC
O Programa de Posgrao en Letras da Universidade Federal do Rio Grande (FURG) presentou un dicionario electrónico que recolle información sobre autores, xornais e publicacións literarias de diferentes países lusófonos. O recurso pretende facilitar o acceso e estudo da tradición xornalística literaria en lingua portuguesa.
Fonte: FURG
Segundo o ministro de Educación de Guinea-Bissau, menos do 5 % da poboación emprega o portugués no seu día a día. A maioría comunícase en crioulo, o que evidencia a escasa presenza social do portugués fóra do ensino. O Goberno traballa en iniciativas para aumentar o uso da lingua oficial no país.
Fonte: Forbes África Lusófona
Manresa vén de constituír a Mesa para o Fomento do Uso Social do Catalán, un órgano que reúne sesenta axentes sociais co propósito de reverter a perda de presenza do idioma nos espazos comunitarios. Esta iniciativa, apoiada amplamente polo pleno municipal, pretende coordinar esforzos desde unha perspectiva transversal para reforzar o prestixio e a transmisión do catalán como lingua de cohesión social.
O Instituto Catalán das Empresas Culturais abriu o prazo para solicitar axudas destinadas a promover libros en catalán ou occitano durante o ano 2025. As subvencións cobren accións publicitarias e de visibilidade, e deben solicitarse antes do 1 de xullo cun único proxecto por iniciativa.
Os cursos de linguaxe administrativa galega en liña (dos niveis medio e superior) están dirixidos ao persoal das administracións autonómica e local e ao da Administración periférica do Estado en Galicia. Aos cursos preparatorios para a obtención dos certificados de lingua galega dos niveis Celga 2, 3 e 4 poderán asistir todas as persoas maiores de dezaseis anos interesadas.
O IES Castro Alobre presentou unha nova edición da campaña «Magnetízate co galego», na que o alumnado deseñou imáns inspirados en Vilagarcía para promover o uso da lingua. Os seis deseños gañadores, reproducidos en mil exemplares cada un, repartíronse por cincuenta comercios da vila co apoio do Concello. A actividade forma parte do programa «Implicados co galego», que busca integrar este idioma na vida diaria de maneira creativa e próxima.
Na última sesión do foro «Un país coa súa lingua», promovido polo Consello da Cultura Galega, representantes de diversos sectores reclamaron medidas que faciliten o uso do galego en servizos auxiliares como notarias e asesorías, sen obstáculos nin custos engadidos. Así mesmo, puxéronse en valor proxectos que incorporan a lingua propia en contextos profesionais e reivindicáronse políticas que garantan a súa presenza plena en todos os ámbitos sociais.
O Concello de Portugalete destina 10 000 euros a subvencionar actividades en éuscaro promovidas por asociacións locais, cunha achega máxima do 80 % do orzamento e ata 3000 euros por proxecto. Priorizaranse as propostas dirixidas a persoas adultas e valorarase a súa calidade, innovación e coherencia co plan de éuscaro municipal.
O Goberno do Principado e a Academia da Lingua Asturiana acordaron reforzar a política lingüística nos próximos anos mediante un plan de acción para normalizar o uso do asturiano e do eonaviego. Entre outras propostas, abordaron a presenza nos medios públicos, o desenvolvemento normativo da lei de 1998, a inclusión da lingua nos proxectos de intelixencia artificial e a mellora da súa presenza no sistema educativo. O Executivo comprometeuse a manter o diálogo e avanzar conxuntamente nestas medidas.
Subscríbase ao boletín
