Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
Un estudo realizado por un profesor da Universidade de Cardiff revela que os defensores da lingua galesa son maioría no País de Gales. Segundo a análise, só un de cada seis galeses pensa que "Gales estaría mellor sen a lingua galesa". Pola contra, case un terzo considera que se deberían tomar medidas excepcionais para promover a lingua vernácula.
Fonte: Wales Online
A ministra de Asuntos Exteriores da India, Sushma Swaraj, declarou que o Goberno da India está facendo o posible para popularizar o hindi internacionalmente e convertelo en lingua oficial das Nacións Unidas.
Fonte: Hindustan Times
O obxectivo desta campaña de Nadal é fomentar o uso oficial e social do valenciano no ámbito municipal.
Fonte: Cadena SER
O Curso de Extensión Cultural para alumnado estranxeiro que organiza a Universidade de Vigo conta con 22 estudantes de sete nacionalidades diferentes, con Alemaña como país que máis estudantes achega, cun total de 13, seguido de Italia e República Checa.
Fonte: Universidade de Vigo
EH Bildu propuxo a creación dunha comisión conxunta entre diversas institucións de Navarra, Euskadi e País Vasco francés para a coordinación e o fomento de políticas lingüísticas que impulsen a normalización do éuscaro.
Fonte: Diario de Navarra
A liberación de dereitos de autor vai permitir traducir legalmente ao galego as obras de Ramón María del Valle-Inclán, polo que o Centro Dramático Galego porá sobre as táboas dúas das obras da triloxía Martes de Carnaval.
Fonte: Culturagalega.org
O Goberno do Estado de São Paulo anunciou que en breve comezarán as obras de restauración do Museo da Lingua Portuguesa que fora parcialmente destruído por un incendio en 2015.
Fonte: Público
Un novo Centro da Lingua Portuguesa do Instituto Camões abrirá as súas portas no Senegal, concretamente na rexión de Casamansa. Con este, o país africano conta xa con dous centros destas características que tentan facer fronte á importante demanda de ensino de portugués.
Fonte: Público
A Mesa pola Normalización Lingüística e o sindicato CIG solicitáronlle á Valedora do Pobo que inste a Consellería de Cultura, Educación e Ordenación Universitaria a que garanta un equilibrio entre o galego e o castelán durante a ESO.
Fonte: Galicia Hoxe
O escenario desta presentación será o Foro Europeo da Diversidade Lingüística, os días 15 e 16 de decembro, un encontro centrado na situación das linguas minorizadas.
Fonte: El Diario Vasco
Subscríbase ao boletín
