Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
A Presidencia da República de Cabo Verde anunciou a tradución da Constitución da República á lingua caboverdiana, na variante de Santiago. O proxecto, presentado polo lingüista e escritor Manuel Veiga, conta co patrocinio do presidente José Maria Neves e será lanzado o 6 de marzo, no marco das celebracións do 50º aniversario da independencia nacional.
Fonte: Expresso das Ilhas
A directora do Instituto Nacional de Lingüística da Universidade Nacional Timor-Lorosae, Rosa Tilman, destacou a importancia de preservar as linguas maternas do país, xa que representan a identidade e cultura dos timorenses e están en risco de desaparecer.
Fonte: Plataforma Media
O proxecto ERA Eskola, impulsado por Euskarabidea e diversas entidades locais de Navarra desde 2020, busca apoiar as familias con fillas e fillos escolarizados en éuscaro. A través de sesións formativas, persoas expertas abordan cuestións relacionadas coa crianza e o reforzo do uso da lingua, tanto no ámbito escolar como no lecer. Ademais, a web era.eus ofrece recursos complementarios para facilitar a aprendizaxe do éuscaro na infancia.
O Concello de Redondela incorporará a toponimia ao seu Plan Xeral de Ordenación Municipal como ben patrimonial, unha decisión valorada pola Real Academia Galega como pioneira. Na xuntanza entre representantes municipais e membros da Academia, presentáronse diversas iniciativas para recuperar e dar a coñecer a toponimia local, como a catalogación de microtopónimos e a publicación de estudos. A institución académica animou outros concellos a seguir este exemplo.
O Departamento de Política Lingüística investirá 8,8 millóns de euros nun plan para reforzar o ensino e a acreditación do catalán entre as persoas adultas, especialmente dirixido a colectivos como persoas migrantes e profesionais de sectores clave. Ampliarase a oferta formativa en 30 000 prazas, chegando a 140 000 en 2026, e impulsaranse cursos en colaboración con diversas entidades. Ademais, crearase unha liña de axudas para descentralizar a formación.
Como cada 21 de febreiro, a Organización das Nacións Unidas para a Educación, a Ciencia e a Cultura (UNESCO) conmemora en todo o mundo o Día Internacional da Lingua Materna co fin de lembrar a responsabilidade de todas as persoas e Estados na promoción e protección do plurilingüismo e da diversidade lingüística e cultural.
Fonte: UNESCO
O Goberno vasco presentou Euskorpus, un proxecto estratéxico para fortalecer a presenza do éuscaro no ámbito dixital mediante a intelixencia artificial e as tecnoloxías da lingua. Cun orzamento inicial de 5,55 millóns de euros, a iniciativa busca desenvolver un corpus dixital que permita a integración do éuscaro en dispositivos e asistentes virtuais.
A Enquisa de Usos Lingüísticas da Poboación 2023 revela que o número de persoas que saben catalán medrou nos últimos anos, pois suma 267 600 novos coñecedores desde 2018. Porén, debido ao incremento poboacional, a proporción global mantívose ou descendeu lixeiramente. A comprensión da lingua alcanza o 93,4 % da poboación maior de 15 anos, mentres que a súa utilización segue por baixo do castelán en todas as franxas de idade.
Os conselleiros de Cultura, Lingua e Xuventude, José López Campos, e de Educación, Ciencia, Universidades e FP, Román Rodríguez, acompañaron a cativada do colexio Mestre Rodríguez Xixirei, de Santiago de Compostela, na actividade «Ecoralia, a lambona ecolóxica». Trátase da proposta coa que a Xunta de Galicia pon en marcha a celebración do Día da Lingua Materna, que terá lugar o vindeiro venres 21 de febreiro, e que chegará tamén a outros centros galegos.
A poeta e novelista brasileira Adélia Prado foi distinguida co Premio Camões 2024. Aos 89 anos, a autora, cuxa traxectoria literaria enriqueceu profundamente a lingua portuguesa e a cultura lusófona, recibiu o galardón a través do seu fillo, xa que non puido asistir á cerimonia por motivos de saúde.
Fonte: RTP
Subscríbase ao boletín
