O Concello de Barcelona reforzará o uso do catalán nas escolas e nas actividades extraescolares a través do «Pla de Barris», co obxectivo de combater as desigualdades e recuperar o valor cohesivo desta lingua. As novas medidas incluirán a esixencia do catalán como lingua vehicular nas empresas adxudicatarias, así como un programa de auxiliares de conversa en inglés para garantir a igualdade de oportunidades na mocidade.
Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
29 de maio de 2025
29 de maio de 2025
A Real Academia Galega e a asociación Alingua estudan fórmulas de colaboración para promover a normalización do galego desde o ámbito local. No encontro, ambas as dúas entidades mostraron interese por proxectos compartidos como Enreguéifate, Youtubeiras ou Apego, así como por ampliar a iniciativa «Modo Galego, actívao!» a máis concellos.
29 de maio de 2025
O secretario xeral da Lingua, Valentín García, salientou a importante contribución para “pór en valor o galego dun xeito lúdico e educativo entre a cativada” da xornada de convivencia Cholo e Nela Ciencia e Conciencia, que se desenvolveu no colexio Manuel Respino, do municipio ourensán da Rúa, coa participación de 500 rapaces de 18 centros de Educación Infantil da provincia de Ourense, que estiveron acompañados polos seus mestres e por 300 pais e nais.
28 de maio de 2025
Durante un seminario en Kobani, diversos académicos e expertos abordaron a inclusión do kurdo como lingua oficial na futura constitución siria. Defenden que a lingua é clave para a identidade do pobo kurdo e que debería recoñecerse o dereito a recibir ensino nesta lingua vernácula. A proposta insírese nun proxecto máis amplo para unha Siria plural e descentralizada, onde se respecten os dereitos lingüísticos e culturais de todas as comunidades.
28 de maio de 2025
O goberno de Flandres decidiu triplicar o custo dos cursos de idiomas estranxeiros en centros de formación para adultos. A medida non afecta aos cursos de neerlandés para persoas non nativas nin á lingua de signos flamenga, que incluso verá reducido o seu prezo. A ministra de Educación, Zuhal Demir, xustificou a medida argumentando que estes cursos non ofrecen garantías de emprego e considerounos actividades de lecer.
28 de maio de 2025
A Deputación de Zaragoza acolle a presentación do estudo Charrando aragonés. La lengua aragonesa en su zona de uso predominante, unha análise sociolingüística sobre o emprego do aragonés nas zonas onde aínda se mantén vivo. Baseado en mil enquisas, o traballo examina o coñecemento e transmisión do idioma segundo factores sociais e territoriais. A publicación busca fornecer datos que permitan orientar accións para a súa preservación e revitalización.
28 de maio de 2025
O alumnado de Sueca participou nunha xornada lúdica, organizada pola Academia Valenciana da Lingua, para fomentar o uso do valenciano mediante xogos e talleres na praza do Concello. A iniciativa, que contou coa colaboración da área de Promoción Lingüística local, reuniu estudantes de distintos centros e busca visibilizar a vitalidade da lingua e o seu valor como ferramenta educativa e social.
28 de maio de 2025
O secretario xeral da Lingua, Valentín García, e o secretario xeral de Universidades, José Alberto Díez, participaron na Coruña na reunión ordinaria da Comisión Interuniversitaria de Política Lingüística, xunto cos representantes dos órganos de goberno das tres universidades públicas galegas e membros dos seus servizos de normalización lingüística.
27 de maio de 2025
O secretario xeral técnico, Manuel Vila, e o secretario xeral da Lingua, Valentín García, participaron na rolda de prensa de presentación das nove obras finalistas do XXIX Premio Literario Arcebispo Juan de San Clemente, organizado polo Instituto IES Rosalía de Castro de Santiago en colaboración coa Xunta de Galicia. Os representantes das consellerías de Educación, Ciencia, Universidades e FP e de Cultura, Lingua e Xuventude aplaudiron o labor de todos os implicados no certame e desenvolvemento da elección dos nove finalistas desta edición.
27 de maio de 2025
O secretario xeral da Lingua, Valentín García, participou no instituto Rafael Dieste da Coruña na presentación da segunda edición do festival musical Aquí tamén se fala, impulsado polo propio centro educativo coa colaboración da Xunta de Galicia, e do que resaltou que “se volve pór de manifesto a importancia dos espazos escolares como motores de dinamización da nosa lingua e a implicación de alumnado e profesorado con este tipo de proxectos a prol do galego”.
Boletín
Subscríbase ao boletín
