Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
Mil estudantes asinan unha campaña para demandar o ensino da lingua sarda na Universidade de Sassari (Sardeña). En concreto, reclaman a impartición de dous cursos universitarios (Maxisterio en lingua sarda e Lingua e literatura sardas) que contribuirán á formación de futuros profesores nesta lingua.
Fonte: La Nuova Sardegna
O ensino da lingua chinesa experimentou nos últimos anos un incremento exponencial en Italia. Na década de 1980, só tres centros universitarios (Roma, Venecia e Nápoles) ofrecían a lingua asiática. Hoxe en día, impártese en 20 facultades e, algunhas reciben centos de matrículas cada ano.
Fonte: Civita News
Nas próximas catro semanas o servizo de éuscaro do Concello visitará 600 establecementos repartidos por sete barrios da cidade co fin de realizar un diagnóstico do uso do éuscaro no comercio.
Fonte: Diario Vasco
Un total de oito empresas de toda a comarca de Pasaia e San Sebastián, dúas máis que hai un ano, ofrecerán nos próximos meses aos alumnos de Oarsoaldea que cursen estudos no IEFPS Don Bosco a posibilidade de realizar prácticas en éuscaro.
Fonte: Diario Vasco
A Universidade de Vigo abre un curso máis a convocatoria de axudas á investigación en lingua galega para todos os traballos realizados durante o ano 2012. Estas bolsas ofértanse ao abeiro co convenio de colaboración asinado entre a institución académica e a Consellería de Cultura, Educación e Ordenación Universitaria para promover o galego.
Fonte: Universidade de Vigo
Coa finalidade de que nazan proxectos de todo tipo para o fomento do galego, a Coordinadora de Traballadores/as pola Normalización da Lingua (CTNL) crea o Viveiro de propostas normalizadoras, un espazo de traballo e intercambio para que traballadoras/es de normalización lingüística poidan madurar e desenvolver ideas e proxectos.
Fonte: CTNL
A Consellería de Cultura, Educación e Ordenación Universitaria levará nos vindeiros días as actividades gratuítas do seu novo programa de dinamización –FalaRedes- a outro dos concellos pertencentes á Rede de Dinamización Lingüística (RDL) da Xunta de Galicia.
Fonte: Xunta de Galicia
O director xeral de Política Educativa Escolar da Junta de Castilla y León comunicoulle a Xesús Vázquez Abad que se coordinarán os programas bilingües para asegurar a permanencia do galego como lingua vehicular do ensino.
Fonte: Xunta de Galicia
O 62 % dos alumnos de cuarto primaria dos centros educativos de Baleares demostrou un coñecemento sólido da lingua catalá durante o pasado ano escolar, o que supón un 8 % máis con respecto ao curso anterior nas escolas públicas.
Fonte: Diario de Mallorca
O impreso para facer a declaración da Renda mecanizada inclúe os ocos nos que se pode optar polo éuscaro ou o castelán.
Fonte: Diario Vasco
Subscríbase ao boletín
