Diversos estudos demostran que as mulleres deixan de falar galego en favor do castelán, por "presión social", en maior proporción que os homes, e este feito é considerado como "outra forma de violencia" de xénero. Así o manifestaron os responsables dos departamentos de Normalización Lingüística do Concello e a Universidade da Coruña así como o da Deputación coruñesa.

Fonte: La Opinión

Para facilitar a distribución do novo OpenOffice.org 3.0.0 en galego, dende Mancomún publican unha imaxe do CD coas versións do paquete ofimático para distintos sistemas operativos, xunto co corrector ortográfico en galego.

Fonte: Código Cero

Estes exames realizáronse nas escolas de idiomas das principais cidades galegas e tamén en universidades de Barcelona, Granada, Madrid, Tubinga e Montevideo

Vigo e A Coruña son as localidades nas que se rexistrou o maior número de aspirantes inscritos no nivel 3

As probas para a obtención dos Certificados de Lingua Galega correspondentes aos niveis 2 e 1 leváronse a cabo o 29 de novembro e o 13 de decembro

Dez cidades, situadas en Galicia e noutros puntos do Estado e do estranxeiro, acolleron o pasado sábado a realización das probas de obtención dos Certificados de Lingua Galega (Celga) correspondentes ao nivel 3. Un total de 586 persoas inscribíronse nesta convocatoria. En Galicia, os exames leváronse a cabo nas sedes coas que conta a Escola Oficial de Idiomas nas cidades de Santiago de Compostela, A Coruña, Lugo, Ourense e Vigo. Fóra de Galicia, as probas de Celga 3 fixéronse na Universidade Autónoma de Barcelona, na Universidade de Granada, no Espazo das Linguas de Madrid, na Universidade da República Oriental do Uruguai, con sede en Montevideo; e na Universidade de Tubinga, en Alemaña.

Seguintes convocatorias
En vindeiras fins de semana realizaranse outras probas para a obtención dos Celga. Así, o sábado 29 de novembro levaranse a cabo os exames do nivel 2, nos que se inscribiron 384 persoas. Por outra parte, o 13 de decembro terán lugar as probas do Celga 1, nas que figuran 323 aspirantes matriculados.

Ata o momento, os únicos exames que se realizaron dentro desta última convocatoria foron os do nivel 4, que tiveron lugar o pasado 15 de novembro nas principais cidades galegas e noutros puntos do Estado e do estranxeiro.

Nesta convocatoria e entre os catro niveis existentes son preto de 2800 persoas as que aspiran a facerse co Certificado de Lingua Galega. O Celga é un sistema de certificación adaptado ao Marco común europeo de referencia para as linguas que lles concede prioridade ás habilidades comunicativas en galego por riba dos enfoques gramaticalistas.

Fonte: Xunta de Galicia

Os docentes asistirán a partir do martes 25 e ao longo de seis xornadas a uns seminarios organizados pola Secretaría Xeral de Política Lingüística en colaboración coa Dirección Xeral de Ordenación e Innovación Educativa

As prazas iniciais ofertadas para poder participar nesta iniciativa, que vai pola súa terceira edición, tiveron que ser ampliadas ante a elevada demanda rexistrada

Nas sesións analizaranse diferentes modelos de planificación sociolingüística implantados en colexios e institutos de Galicia e noutras comunidades

As cidades de Santiago, A Coruña, Lugo e Vigo acollerán, a partir do martes 25 de novembro e ao longo dun total de seis xornadas, a terceira edición dos Seminarios de Dinamización Lingüística no Ensino, que van dirixidos ao profesorado de ensino primario e secundario dos centros públicos e privados de Galicia. Preto de 300 docentes participarán nesta iniciativa, que organiza a Secretaría Xeral de Política Lingüística en colaboración coa Dirección Xeral de Ordenación e Innovación Educativa.

Os seminarios comezarán o martes 25, continuarán durante o mércores 26 e o xoves 27, e retomaranse os días 2, 3 e 4 de decembro. As sesións realizaranse sempre a partir das 18.00 horas. En Santiago, será o IES As Fontiñas o lugar no que se impartirán as charlas, obradoiros e demais actividades. Na Coruña, as xornadas desenvolveranse no IES Rafael Dieste; en Lugo no IES Politécnico, e en Vigo no IES Politécnico.

O número inicial de prazas que se ofertaba por cada unha das cidades era de 50 persoas como máximo, pero debido á elevada demanda rexistrada optouse finalmente por incrementalas.

Programa
Nestes seminarios de dinamización haberá sesións nas que se analizarán modelos de planificación sociolingüística implantados con éxito en centros de ensino de Galicia e noutras comunidades. As xornadas contarán coa participación de dous especialistas en planificación lingüística da Comunitat Valenciana, Vicent Pascual e Rafael Fresquet. A relación da lingua galega coas novas tecnoloxías da información e da comunicación é outro dos asuntos que se abordará. O programa inclúe tamén obradoiros prácticos sobre realización de proxectos de normalización lingüística.

Os participantes nos seminarios obterán un certificado de asistencia expedido polo Servizo de Formación do Profesorado da Consellería de Educación e Ordenación Universitaria.

Todos os detalles sobre o programa dos seminarios que se van impartir en Santiago, A Coruña, Lugo e Vigo poden consultarse no enderezo http://www.xunta.es/linguagalega/convocatorias_de_formacion.

Fonte: Xunta de Galicia

“Por unha administración mellor, mellor en galego” é o lema da campaña de promoción do uso do galego que a CIG vén de pór en marcha na Administración Pública. A campaña, que constitúe a segunda fase dunha iniciativa que arrancou antes da celebración do 17 de maio, pretende concienciar a traballadores/as e administracións da necesidade de afondar no cumprimento da normativa referida á normalización lingüística.

Fonte: CIG

Política Lingüística (PSOE) e Industria (BNG) invisten, cada unha polo seu lado, en dous tradutores automáticos coa mesma función. O de Industria presentouno a pasada semana a empresa galega 'Imaxin'. O de Política Lingüística, tamén para galego-inglés, está a desenvolvelo a catalá 'Translendium'.

Fonte: A Nosa Terra

O colectivo veterinario ou calquera outro profesional interesado poderá facer uso a partir da próxima semana do Vocabulario de morfoloxía, anatomía e citoloxía veterinaria , en galego, español e inglés, que vai ser presentado o vindeiro mércores e no que estiveron traballando nos últimos catro anos unha decena de profesionais.

Fonte: La Voz de Galicia

Para Xusto Rodríguez Río, o galego no eido veterinario atravesa por dúas situacións bastante contrapostas. Por un lado, é a lingua maioritaria no que se refire ao traballo de campo que este profesionais levan a cabo cos propietarios dos animais. Non obstante a situación cambia totalmente no apartado da formación, xa que a docencia en galego na Facultade de Veterinaria se sitúa arredor do vinte por cento.

Fonte: La Voz de Galicia

Galicia Bilingüe solicitou á Consellería de Educación que inclúa os libros de texto en castelán no programa de gratuidade. No seu escrito, a asociación sinala que, a pesar de que xa se recoñeceu o dereito a dous escolares de Pontedeume a usar os manuais en castelán e a utilizalo oralmente e por escrito na aula, a consellería debe «emitir agora un pronunciamento público que deixe clara a existencia dese dereito», así como que admita que os escolares que opten polo castelán teñan tamén acceso ao programa de gratuidade, restrinxido aos libros en galego para as materias impartidas nesa lingua.

Fonte: La Voz de Galicia

O portavoz da Mocidade pola Normalización Lingüística, Fran Rei, acompañado de representantes de Galiza Nova e Comités, entregáronlle un escrito ao Valedor do Pobo, Benigno López, no que lle piden que "actúe ante o incumprimento" do decreto do galego no ensino.

Fonte: Europa Press