A instalación interactiva A Cova permanecerá no parque Barbaña dende o venres día 14 de novembro, ata o domingo 16

Esta iniciativa convida a facer unha viaxe da man das novas tecnoloxías pola riqueza lingüística galega e a construír de xeito colectivo unha cadea xigante de palabras

Logo do seu paso por Ourense, esta montaxe promovida por Política Lingüística visitará as cidades de Vigo e Lugo

A cidade de Ourense acollerá a partir do venres e durante toda a fin de semana a instalación interactiva A Cova, unha iniciativa que se engloba dentro da campaña “En galego, tes todo por vivir. Tócache!”, que promove a Secretaría Xeral de Política Lingüística. Esta montaxe convida a mergullarse na riqueza léxica da lingua galega a través dunha moderna versión do xogo das palabras encadeadas e está pensada para que participen nela persoas de todas as idades. A Cova permanecerá no parque Barbaña de Ourense os días 14, 15 e 16 de novembro.

Esta iniciativa chega á cidade ourensá logo do éxito que acadou no seu paso por Santiago de Compostela e A Coruña. A Cova é unha instalación itinerante de última tecnoloxía na que se recrea o mito da caverna de Platón. As persoas que se internen nela terán ocasión de interactuar coa linguaxe achegando palabras coas que contribuirán a construír entre todos unha cadea xigante de vocábulos. Para garantir a corrección das palabras empregadas, cóntase coa base de datos do Vocabulario ortográfico da lingua galega (Volga).

Con posterioridade ao seu paso por Ourense, A Cova recalará nas cidades de Vigo e Lugo. Na primeira das vilas mencionadas, a instalación estará situada na rúa Urzáiz os días 21, 22 e 23 de novembro. A praza Maior de Lugo será a última escala que faga esta iniciativa, durante os días 28, 29 e 30 de novembro.

Fonte: Xunta de Galicia

O Consello da Xuventude de Galicia convoca diferentes seminarios de linguaxe non sexista cos obxectivos de crear espazos de debate e de reflexión acerca da repercusión e da influencia do sexismo social sobre a linguaxe, e de analizar a linguaxe sexista en diferentes ámbitos, así como facilitar recursos para evitar calquera tipo de discriminación.

Fonte: CTNL

A Consellería de Traballo tramitará un expediente sancionador se se constatan "actos discriminatorios" no caso denunciado polo Comité de empresa de Navantia pola vulneración dos dereitos lingüísticos dun traballador no pasado mes de maio.

Fonte: Galicia Hoxe

O coñecemento da lingua galega é un requisito imprescindible para aspirar a un posto de traballo na Administración autonómica, pero a realización polos funcionarios de cursos para perfeccionar o seu manexo non é considerado pola Xunta como un mérito engadido á especialización en calquera outro idioma da UE. A efectos de promoción interna na Administración, un curso de galego puntúa o mesmo que un de húngaro ou de italiano.

Fonte: La Voz de Galicia

O departamento de Migración da Confederación Intersindical Galega (CIG) está organizando un curso de integración, lingüística e cultural, dirixido a inmigrantes e emigrantes retornados/as, que se vai impartir na cidade de Vigo nos locais do sindicato nos próximos meses.

Fonte: XornalGalicia

A Mesa pola Normalización Lingüística vai distribuír catro mil folletos na Coruña informando sobre a actuación da Liña do Galego, un servizo que ofrece desde hai un ano a asociación en defensa da lingua e que tramita consultas, queixas e parabéns.

Fonte: XornalGalicia

O sábado realizáronse os exames do Celga 4, nos que había 1500 persoas inscritas

Ademais dos principais concellos galegos, foron sede dos exames outros puntos do Estado e varios países europeos e latinoamericanos

En sucesivas fins de semana terán lugar as probas de obtención dos niveis 3, 2 e 1 deste novo sistema de acreditación de coñecementos de galego

Este sábado iniciáronse as probas de obtención dos Certificados de Lingua Galega (Celga), para os que se inscribiron, nesta convocatoria un total de 2792 persoas. O primeiro exame foi o correspondente ao nivel 4, no que se matriculou o maior número de persoas, 1500. A proba celebrouse nas principais cidades galegas, e tamén noutras sete cidades do Estado e en Heidelberg, en Alemaña. Comezou ás 9 da mañá, e os aspirantes tiñan que presentarse nos lugares de realización un cuarto de hora antes.

As cidades galegas que acolleron as probas foron Santiago de Compostela, A Coruña, Lugo, Ourense e Vigo. En todas elas, a sede dos exames foi a Escola Oficial de Idiomas. Fóra de Galicia, realizáronse exames de Celga 4 na Universidade Autónoma de Barcelona, no Espazo das Linguas de Madrid, na Universidade de Deusto, (Bilbao), na Universidade de Estremadura (Cáceres), na Universidade de Granada, na Universidade de Salamanca, na Universidade do País Vasco, (Vitoria) e na Universidade de Heidelberg, en Alemaña.

Santiago de Compostela foi a cidade con máis aspirantes inscritos na proba, cun total de 377. Séguenlle A Coruña, con 359, Vigo, con 324, Lugo, con 246 e Ourense, con 130 persoas inscritas.

No resto do Estado, o Espazo das Linguas, situado no Barrio das Letras de Madrid, recibiu 24 aspirantes para obter o Celga 4. En Barcelona foron 17 as persoas que se puideron examinar; 13 candidatos examináronse en Salamanca, 3 en Bilbao e outros tantos en Granada, mentres que en Vitoria houbo unha persoa inscrita, ao igual que en Cáceres. Igualmente, en Heidelberg, unha persoa inscribiuse para realizar o exame.

Seguintes exames
Nas fins de semana sucesivas, ata o 13 de decembro, exceptuando o 6 de decembro, terán lugar os exames dos niveis 3, 2 e 1 do Celga, que tamén se van realizar nas principais cidades galegas, no resto do Estado e en cidades europeas e latinoamericanas.

O Celga é un sistema de certificación adaptado ao Marco común europeo de referencia para as linguas que lles dá prioridade ás habilidades comunicativas en galego por riba dos enfoques gramaticalistas.

Fonte: Xunta de Galicia

O Servizo de Asesoramento Lingüístico do Colexio de Avogados de Santiago de Compostela presenta unha nova campaña de promoción do uso do galego entre a avogacía. "Xustamente, en galego" é o seu título, co que se pretende reflexionar acerca dos usos lingüísticos que acotío se veñen desenvolvendo nas relacións entre a cidadanía e a Administración de xustiza.

Fonte: CTNL

Só catro das vinte firmas galegas que máis diñeiro facturaron teñen a súa web na nosa lingua. Estas compañías ingresaron, en conxunto, máis de 23 mil millóns de euros. A téxtil Zara, as distribuidoras de alimentación Gadisa e Vegonsa e a pesqueira Pescanova son as únicas que nos ofrecen a posibilidade de ver a súa páxina na internet en galego.

Fonte: Vieiros

Un grupo de profesores universitarios realizou unha sondaxe preliminar sobre o grao cumprimento do decreto do galego no ensino e atoparon indicios de que o castelán segue a ser a lingua maioritaria en case todas as materias.

Fonte: A Nosa Terra