Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
A Fundación Eira da Xoana recibiu o premio Gabriel Barreiro Toural, coñecido como Garabato, pola súa defensa do patrimonio cultural galego, a súa aposta polo mundo rural, a súa contribución á creación da conciencia ecolóxica e o seu compromiso coa lingua galega.
Fonte: Faro de Vigo
Unha nova canción de Magín Blanco dedicada aos meses do ano a partir do libro O tempo cronolóxico quere contribuír a paliar a escaseza de materiais didácticos en galego dirixidos a nenas e nenos de ata seis anos de idade.
Fonte: Sermos Galiza
A Comisión Europea lanza a décimo terceira edición do concurso de tradución Juvenes Translatores que promoverá o coñecemento lingüístico entre alumnado de centros de ensino medio de toda a Unión Europea.
Fonte: Government Europa
O Museo da Lingua Portuguesa de São Paulo reabriu parcialmente para ofrecer unha programación educativa para nenos e nenas. Entre as actividades destaca un club de lectura e a exhibición de filmes e teatro.
Fonte: Folha de São Paulo
A denuncia a Air Canada realizouna unha parella de Ontario por considerar que a compañía vulnera os dereitos lingüísticos dos francófonos ao utilizar predominantemente o inglés. Segundo a Lei de idiomas oficiais do Canadá, este país é bilingüe, polo que inglés e francés teñen o mesmo status, o que significa que todos os servizos en aeronaves deben ofrecerse nas dúas linguas.
Fonte: Público
Estes cursos básicos están dirixidos a persoas recentemente chegadas á comarca guipuscoana de Oarsoaldea para que aprendan éuscaro. Polo momento, a fase de inscrición permanece aberta e os cursos comezarán en outubro.
Fonte: Diario Vasco
O Concello de Ames organiza un ano máis os Obradoiros de Lingua e Cultura "En galego, co teu acento!", unha actividade gratuíta de 30 horas de duración destinada a persoas de fóra de Galicia que vivan neste municipio.
Fonte: Concello de Ames
A rede social galega Caxigo.gal ofreceralles unha mellor experiencia aos seus usuarios e usuarias a través dun novo deseño, novas funcionalidades da rede e novas posibilidades da aplicación móbil.
Fonte: Código Cero
Ao longo do mes de outubro impartiranse en Palma 30 cursos de catalán especialmente dirixidos a persoas que acaban de chegar á cidade. Por este motivo, o folleto de promoción destes editouse en seis idiomas (catalán, castelán, inglés, alemán, chinés e árabe).
Fonte: 20 minutos
Nos últimos tempos, escritores e xornalistas portugueses incrementaron o seu interese pola lingua galega. Proba disto son as reportaxes e as entrevistas publicadas recentemente en prestixiosas revistas de Portugal, das que se fixeron eco xornais como Público ou Jornal de Nóticias.
Fonte: Galicia Confidencial
Subscríbase ao boletín
