Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O IES María Casares de Oleiros impulsou unha iniciativa que consiste en falar galego durante 48 horas. Participaron neste reto uns 200 alumnos e alumnas do centro, que asinaron previamente un “contrato de compromiso lingüístico”.
Fonte: Sermos Galiza
O conselleiro de Cultura e Turismo, Román Rodríguez, participou no acto de apertura da mostra Antonio Fraguas Fraguas. Letras Galegas 2019 no Museo do Pobo Galego.
Fonte: O Portal da Lingua Galega
Un xuíz do estado de Florida (EUA) deulle a razón a unha cidadá hispana que solicitara que a documentación electoral estivese tamén en español. A partir das eleccións primarias de 2020, a documentación deberá estar dispoñible nesta lingua.
Fonte: CNN
Segundo informou o Secretario de Estado das Comunidades Portuguesas, José Luís Carneiro, o estudo do portugués no ensino básico e secundario dos EUA medrou significativamente nos últimos tres anos.
Fonte: Diário de Notícias
O Centro Dramático Galego (CDG) ten preparado un intenso programa de actividades para conmemorar o Día das Letras Galegas na súa sede do Salón Teatro de Santiago.
Fonte: O Portal da Lingua Galega
Co gallo da celebración do Día das Letras Galegas, a plataforma Queremos Galego convoca este ano manifestacións en trece localidades co obxectivo de deslocalizar a gran manifestación que se facía todos os anos en Santiago e facilitar así que todo o mundo poida participar nas mobilizacións simultáneas en toda Galicia en defensa da lingua galega.
Fonte: Galicia Confidencial
Kontseilua, a coordinadora de asociacións en favor do éuscaro, presentou quince medidas en materia lingüística para a próxima lexislatura en Navarra. Estas medidas diríxense a conseguir a oficialidade do éuscaro en toda Navarra: Administración Pública, sistema educativo, medios de comunicación etc.
Fonte: Noticias de Navarra
O Consell de Mallorca publicou a convocatoria de axudas para prensa escrita ou dixital en lingua catalá do 2019, cunha dotación total de 38 000 euros. O obxecto da convocatoria é a adquisición de equipamentos e materiais necesarios para desenvolver traballos periodísticos.
Fonte: La Vanguardia
O secretario xeral de Política Lingüística, Valentín García, asistiu no compostelán IES Plurilingüe Rosalía de Castro ao acto de homenaxe a Antonio Fraguas Fraguas, con motivo das Letras Galegas 2019.
Fonte: O Portal da Lingua Galega
A Consellería de Cultura e Turismo, por medio da Secretaría Xeral de Política Lingüística, e a compañía galega de distribución alimentaria Vegalsa-Eroski homenaxean a Antonio Fraguas Fraguas na semana grande das Letras Galegas e volven poñer en marcha, por noveno ano consecutivo, a campaña Letras Galegas para festexar o 17 de maio cunha tirada especial de bolsas e carteis que chegarán aos fogares galegos nos Eroski Center, Autoservizos Familia e Hipermercados Eroski.
Subscríbase ao boletín
