O Parlamento de Polonia aprobou un proxecto de lei para recoñecer oficialmente o silesiano como lingua rexional. A iniciativa permitiría a súa ensinanza nas escolas e o seu uso na administración local nas zonas onde unha parte significativa da poboación o fala. O texto contou co apoio principal da coalición gobernante, mentres que a oposición conservadora votou en contra.

Fonte: Notes from Poland

Un proxecto colaborativo constata que o uso do galego nas lápidas medrou nos últimos anos nesta provincia, ata alcanzar o 4,5 %, a porcentaxe máis alta de Galicia. A iniciativa Palabra e Memoria analizou milleiros de inscricións nos cemiterios galegos e detectou unha presenza aínda minoritaria, mais en claro aumento desde comezos de século. Algúns concellos presentan porcentaxes especialmente elevadas, o que amosa realidades territoriais diversas.

O Movemento Cultural da Terra de Miranda pediulle ao Goberno portugués que a creación e o funcionamento da Estrutura de Misión para a Promoción da Lingua Mirandesa sexa inclusiva, transparente e representativa de todas as persoas ou colectivos que estudan e promoven o idioma. Tamén mostraron preocupación pola eliminación dunha dotación de 500 mil euros prevista para apoiar o mirandés, o que consideran un retroceso no compromiso co patrimonio cultural e lingüístico da rexión.