A Asociación Lar de Unta impulsará en Betanzos un grupo de conversas en galego concibido como un espazo aberto para practicar o idioma con naturalidade e sen formato académico. A iniciativa diríxese tanto a persoas acabadas de chegar como á veciñanza que entende o galego mais non o emprega con seguridade, así como a quen xa o usa e desexa máis oportunidades. As sesións semanais abordarán temas diversos nun ambiente participativo e relaxado.

Vén de publicarse un novo dicionario enciclopédico que analiza o léxico do español de orixe árabe desde unha perspectiva histórica e cultural. A obra afonda na pegada deixada por séculos de convivencia lingüística, especialmente durante al-Ándalus, e amosa o árabe como unha das principais fontes do vocabulario español. O traballo vai máis alá da listaxe de palabras e estuda a súa evolución fonética, semántica e contextual.

Diversas iniciativas no Brasil, impulsadas por universidades, museos e comunidades indíxenas, buscan documentar, revitalizar e dar visibilidade a un bo número de idiomas indíxenas mediante a investigación, a educación e o uso de ferramentas dixitais.

Fonte: DW

O goberno nacionalista de Narendra Modi na India está favorecendo o uso do hindi en actos oficiais, documentos e concursos, co argumento de superar o pasado colonial e diminuír a preponderancia do inglés. Isto xerou descontento e controversia nalgúns estados onde o hindi non é a lingua principal, especialmente no sur do país.

Fonte: DW