Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
As axudas para a dinamización lingüística da Deputación de Pontevedra están dirixidas aos concellos e outras entidades locais da provincia, que poderán elixir entre dúas opcións: a creación ou mantemento do Servizo de Normalización Lingüística, ou a promoción e desenvolvemento de programas de dinamización do galego.
Fonte: Deputación de Pontevedra
A mostra "Navarrorum. Dous mil anos de documentos navarros sobre o éuscaro" comeza a súa xira, chegando en primeiro lugar á Casa da Cultura Fray Diego de Estrella. Agárdase que acade o éxito recollido durante os meses que estivo exposto en Pamplona, onde atraeu a atención de miles de visitantes.
Fonte: Diario de Navarra
Os profesores e investigadores Mar Neira e Javier Gómez foron os protagonistas da presentación do libro A cultura castrexa e galaico romana no Condado de Pallares, froito dun traballo de investigación de máis dun ano e que se fixo acredor do premio do Certame de Investigación Condado de Pallares.
Fonte: O Portal da Lingua Galega
O Centro Ramón Piñeiro para a Investigación en Humanidades (CRPIH) recibiu a visita dos alumnos e alumnas que cursan no presente ano académico o Máster en Literatura Infantil e Xuvenil para a Formación e Desenvolvemento de Hábitos Lectores e o Curso de Experto en Literatura Infantil e Xuvenil da Universidade de Santiago de Compostela.
Fonte: O Portal da Lingua Galega
O Goberno de Casaquistán adoptou un decreto para abandonar o alfabeto cirílico e adoptar o latino na escrita da lingua casaca, medida que levantou unha grande polémica.
Fonte: Equal Times
O Instituto do Patrimonio Cultural (IPC) do Ministerio de Cultura de Cabo Verde quere que o novo marco constitucional recolla a oficialización da lingua caboverdiana para poder incluíla no patrimonio inmaterial nacional.
Fonte: Expresso das Ilhas
O Concello de Benidorm pon en marcha a iniciativa «Voluntariat pel Valencià», a través da cal as persoas interesadas poderán conversar en valenciano entre elas. A idea é pór en contacto persoas que queiran aprender a falalo con outras que queiran ensinalo, sen necesidade de xustificar unha titulación específica de profesor.
Fonte: Información
O presidente da República de Francia defendeu que se poida facer unha mención especial a Córsega na Constitución, mais rexeitou que o corso poida ser declarado lingua cooficial.
Fonte: Le Parisien
A Unión Federal de Nacionalidades Europeas (FUEN) presentou unha iniciativa a nivel continental que pretende conseguir o compromiso da Unión Europea na protección dos dereitos lingüísticos das minorías de Europa.
Fonte: Sermos Galiza
O Centro Ramón Piñeiro para a Investigación en Humanidades (CRPIH), dependente da Secretaría Xeral de Política Lingüística, presentou o volume 18 dos Cadernos de Fraseoloxía Galega, unha revista internacional sobre fraseoloxía galega que se edita no marco do proxecto de investigación homónimo dirixido pola profesora María Isabel González Rey.
Fonte: O Portal da Lingua Galega
Subscríbase ao boletín
