Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
Un curso na localidade sueca de Älvdalen permitiu achegar a lingua elfdaliana a 26 persoas doutras realidades lingüísticas. O elfdaliano provén do nórdico antigo e conserva particularidades arcaicas que non se atopan en ningunha outra lingua xermánica.
Fonte: The Local
O forte crecemento que está a experimentar a economía sueca e a escaseza de demandantes de emprego nalgúns sectores produtivos permiten que as empresas suecas poidan contratar traballadores sen competencias firmes na lingua do país.
Fonte: La Repubblica
A Fundación Curros Enríquez concedeulle o Premio Celanova, Casa dos Poetas á corporación Hijos de Rivera polo seu compromiso con Galicia e polo fomento da lingua e da cultura galegas, así como pola súa implicación no desenvolvemento do medio rural galego.
Fonte: La Voz de Galicia
O Festival de Poesía Contemporánea de Zaragoza "Soñar 2017" tratará, entre outras cuestións, a poesía da muller e a lingua aragonesa. Respecto ao aragonés, realizarase un recital no que grandes poetas confirmarán cos seus poemas o patrimonio lingüístico de Aragón. O acto terá lugar entre os días 9 e 17 de setembro de 2017.
Fonte: aragondigital.es
O BNG de Ferrol criticou que a festa das Meninas de Canido exclúe o galego na súa publicidade e nos actos que se celebran co gallo desta actividade.
Fonte: Finanzas
Diversas asociacións contrarias ao decreto do plurilingüismo da Comunidade Valenciana criticaron o novo decreto-lei aprobado polo Goberno valenciano, e solicítanlles ao Goberno de España e aos partidos políticos que recorran esta norma no Tribunal Constitucional.
Fonte: ABC
A asociación Bagera Donostiako Euskaltzaleen Elkartea publicou, xunto á Deputación foral de Guipúscoa, unha colección de experiencias para promover o uso da lingua vasca a través da incidencia en ámbitos lingüísticos.
Fonte: 20 minutos
Esta canle educativa, que leva o nome de Xeoclip, foi impulsada por Xacobo de Toro e Adela Otero e xa conseguiu un premio á innovación, o #ProyectaInnovación. A iniciativa consiste en vídeos educativos en lingua galega sobre xeoloxía e ciencia que se poden visualizar en YouTube.
Fonte: Galicia Confidencial
Os cidadáns do cantón suízo de Lucerna decidirán nunha votación se queren que se sigan ensinando dúas linguas estranxeiras no ensino primario. Se a opción que defende o ensino dunha soa lingua estranxeira ten apoio, a lingua inglesa pasará a impartirse só a partir do ensino secundario.
Fonte: Tribune de Genève
O Concello de Donostia ofrecerá cursos de balde de lingua vasca para persoas desempregadas en outono de 2017. O prazo de inscrición finaliza o 21 de setembro, mentres que os cursos darán comezo o día 5 de outubro.
Fonte: Noticias de Gipuzkoa
Subscríbase ao boletín
