Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
A Dirección Xeral de Política Lingüística de Cataluña publicou o Informe de política lingüística 2016, que recolle información sobre os usos e o coñecemento da lingua catalá e de outras linguas de Cataluña, así como sobre o labor do Goberno catalán no eido lingüístico.
Fonte: Generalitat de Catalunya
Xa son 30 os concellos participantes neste proxecto de socialización da infancia en galego, despois de sumarse sete novos recentemente aos 23 que xa o estaban a desenvolver.
Fonte: Galicia Confidencial
O escritor Antonio Piñeiro resultou gañador do Premio Torrente Ballester en galego coa súa novela A través do fume. Este galardón, que convoca a Deputación da Coruña, inclúe a publicación da obra e unha dotación de 25 000 euros.
Fonte: Galicia Hoxe
O presidente de Francia, Emmanuel Macron, nomeou a galardoada escritora Leïla Slimani para representar e promover a lingua e cultura francesas no mundo.
Fonte: The Guardian
O cambio de nome nunha páxina de Facebook da BBC de "parsi" a "darí", unha das denominacións da lingua persa falada en Afganistán, levantou unha profunda polémica no país centroasiático.
Fonte: Aljazeera
Esta petición prodúcese porque certos departamentos dependentes da institución provincial utilizan de maneira exclusiva o castelán, ata o punto de non facilitar documentación ou atención en galego cando son requiridas.
Fonte: Sermos Galiza
A presidenta da Comisión Especial de Estudo sobre o Réxime de Protección e Promoción do Asturiano, Concha Masa, presentou un borrador de conclusións no que se recolle que a cooficialidade é a única vía para a supervivencia do asturiano.
Fonte: Asturies.com
A Facultade de Matemáticas acolle ‘Habelas, hainas, queremos contarchas!’, unha xornada divulgativa sobre a investigación en matemáticas, cuxas exposicións se farán en galego. Preténdese que oradores e oradoras se afagan a presentar as súas investigacións noutro idioma que non sexa o inglés e tamén normalizar o uso do galego nas matemáticas.
A Academia Valenciana da Lingua inclúe máis de 3000 nomes no seu "Vocabulario de nomes de persoa", o que permitirá que pais e nais poidan elixir o nome dos seus fillos en valenciano. Así mesmo, os funcionarios terán acceso á forma correcta dos nomes nesta lingua.
Fonte: El Mundo
O conselleiro de Cultura, Educación e Ordenación Universitaria, Román Rodríguez, presentou no Pazo de San Roque os XXXVII Cadernos Ramón Piñeiro. Carlos Casares: homenaxe. De amicitia, un volume dedicado a afondar na figura do homenaxeado este ano no Día das Letras Galegas co gallo da programación conmemorativa impulsada desde a Xunta.
Fonte: O Portal da Lingua Galega
Subscríbase ao boletín
