Máis de 200 persoas, entre elas 150 representantes municipais, concentráronse en Bilbao convocadas por Euskalgintzaren Kontseilua para denunciar sentenzas xudiciais que consideran contrarias ao éuscaro e ao autogoberno vasco. Alertan dunha “emerxencia lingüística” e reclaman medidas unitarias para garantir os dereitos lingüísticos e revitalizar a lingua vasca.
Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
28 de xullo de 2025
Un 80,52 % das familias das illas Baleares que matriculan os seus fillos e fillas en 4º de Educación Infantil escolleu o catalán como lingua inicial de ensino, fronte ao 19,48 % que optou polo castelán. Menorca destaca cun 91,65 % de elección a prol do catalán, seguida de Mallorca e, en menor medida, Eivisa e Formentera.
28 de xullo de 2025
Common Voice incorpora unha ferramenta que permite recoller fala espontánea en galego, co obxectivo de representar a diversidade dialectal e oral da lingua no ámbito dixital. O ILG, mediante o Proxecto Nós, colaborou na elaboración das primeiras preguntas, aínda que calquera persoa pode contribuír. Esta innovación facilita datos abertos para impulsar tecnoloxías inclusivas e investigacións baseadas na realidade lingüística galega.
28 de xullo de 2025
A 35ª edición dos Cursos 'Galego sen fronteiras' reuniu en Santiago a sesenta persoas de vinte países para aprenderen lingua e cultura galegas ao longo do mes de xullo. Organizados polo ILG e a RAG, esta iniciativa internacional contribúe á proxección global do galego e á súa revitalización.
25 de xullo de 2025
Un informe revela que nas escolas públicas menos favorecidas de Inglaterra só o 47 % do alumnado estuda linguas estranxeiras para os exames GCSE, fronte ao 69 % nas máis acomodadas. Esta diferenza está a agravar a desigualdade no acceso ao ensino de idiomas e ameaza a promoción da diversidade lingüística do país.
Fonte: The Guardian
25 de xullo de 2025
Ao redor do 40 % das linguas do mundo están en perigo de desaparecer. Un novo proxecto de investigación da Unión Europea, chamado FOSTERLANG e financiado con tres millóns de euros no marco do programa Horizon Europe, busca revitalizar linguas minoritarias e de migrantes en Europa.
23 de xullo de 2025
O viceministro de Educación de Lituania, Jonas Petkevičius, propuxo finalizar de forma gradual a docencia en ruso como lingua estranxeira e reducir tamén o ensino en centros de lingua rusa, seguindo o exemplo dos países veciños Letonia e Estonia.
Fonte: LRT
23 de xullo de 2025
O Departamento de Política Lingüística abriu unha nova liña de bolsas para o curso 2025-2026, co obxectivo de captar novo talento e aumentar o número de profesionais titulados en filoloxía catalá e en estudos occitans.
Fonte: Generalitat de Catalunya
23 de xullo de 2025
O pleno do Concello de Valencia acordou a nova denominación da cidade, que pasará a ter un nome bilingüe "Valencia/València". Esta medida está a xerar controversia, xa que a nova denominación se afasta da forma normativa en valenciano.
Fonte: Diari de la Llengua
23 de xullo de 2025
O colectivo Plataforma pola Lingua mobilízase para denunciar a prohibición imposta polo actual goberno municipal de extrema dereita de Perpiñán de celebrar casamentos civís en catalán, defendendo o dereito ao uso da lingua propia en actos oficiais na Cataluña Norte.
Fonte: Diari de la Llengua
Boletín
Subscríbase ao boletín
