Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
A empresa líder en transporte de autobuses en Europa, FlixBus, anunciou a incorporación da lingua catalá na súa páxina web e aplicación móbil. Esta medida permitirá aos usuarios acceder a información e atención ao cliente en catalán, reforzando así o compromiso da empresa coa diversidade lingüística.
Fonte: El Diari de la Llengua
Case 100 estudantes e docentes de todo o Reino Unido reuníronse en Londres para conmemorar o Día Internacional da Lingua Chinesa 2025. Durante o evento, os participantes exploraron o patrimonio vivo da cultura chinesa a través de recitais de poesía, demostracións de artes marciais e caligrafía tradicional, destacando a riqueza e diversidade desta lingua milenaria.
Fonte: China Daily
O 15 de maio deu comezo unha nova edición de Euskaraldia, coa participación de milleiros de persoas que buscan modificar os seus hábitos lingüísticos e reforzar o uso do éuscaro. Durante once días, as persoas participantes levarán unha chapa que identifica o seu rol para fomentar conversas inclusivas e naturais en éuscaro en espazos cotiáns.
Xa está dispoñible en liña e de balde o Diccionariu Llionés. Volume I: llionés-castellanu, de Nicolás Bartolomé Pérez, cunha ampla selección léxica de preto de 11 000 entradas. A obra recolle variantes dialectais, fraseoloxía e termos especializados, ademais de incluír observacións gramaticais e etimolóxicas, consolidando un recurso esencial para preservar e divulgar o patrimonio lingüístico do leonés.
A Facultade de Comunicación acolleu un acto no que recibiu o distintivo de galeguización Gal Ego que recoñece a súa implicación co idioma, ao tempo que se entregaron tamén os Premios de poesía, relato curto e tradución 2025 que poñen en valor a capacidade creativa en galego da comunidade universitaria.
A cidade de Berna anunciou que o seu programa experimental de educación bilingüe alemán-francés, iniciado en 2019, finalizará no verán de 2026. A decisión afecta máis de 90 estudantes e 24 membros do persoal docente e de apoio. As autoridades locais argumentan que a medida responde a incompatibilidades curriculares e diversos sectores políticos critican a decisión por considerala un retroceso na promoción do bilingüismo e da cohesión cultural en Suíza.
Fonte: Le News
A Universidade de Andorra, en colaboración co Instituto Camões, abriu unha convocatoria para unha bolsa de investigación sociolingüística centrada na lingua e cultura portuguesas no contexto andorrano. O proxecto, supervisado polo Grupo de Investigación en Linguas (GREL), está dirixido a investigadores interesados en temas relacionados co portugués en Andorra.
Fonte: CPLP
A Xunta de Galicia e Renfe Viajeros volven poñer en marcha a campaña das Letras Galegas co obxectivo de achegarlle as cantareiras ás persoas usuarias da rede ferroviaria. O secretario xeral da Lingua, Valentín García, e a delegada territorial da Xunta en Vigo, Ana Ortiz, presentaron a campaña na cidade olívica onde salientaron “a relevancia das homenaxeadas e a súa importante aportación ao noso patrimonio inmaterial”.
O secretario xeral da Lingua, Valentín García destacou “a importancia da implicación cidadá e empresarial para o desenvolvemento de iniciativas a prol da lingua como é o Proxecto Nós”. Fíxoo durante un acto celebrado na Cidade da Cultura no que se recoñeceu a campaña levada a cabo pola empresa SD Group entre o seu persoal para facelo partícipe deste proxecto, impulsado pola Xunta de Galicia en colaboración coa Universidade de Santiago e enfocado en potenciar a presenza do galego no eido dixital.
O Parlamento galés (Senedd, en galés) aprobou unha nova lei que busca garantir que todos os nenos e nenas de Gales teñan a oportunidade de falar galés con seguridade, sexa cal for a súa orixe ou a lingua principal do seu centro. A norma crea tres modelos lingüísticos para os colexios e aposta pola inmersión en galés, co obxectivo de chegar ao millón de falantes no ano 2050. Tamén inclúe medidas como formación gratuíta en galés para o profesorado e programas para incrementar o número de docentes falantes de galés.
Subscríbase ao boletín
