O executivo andorrano iniciou un proceso para contratar unha empresa que organice unha campaña destinada a fomentar o uso do catalán nas redes sociais. Un dos principais obxectivos é a realización dunha xuntanza de creadores de contido que empregan habitualmente o catalán, co propósito de xerar sinerxías e novos proxectos no ámbito dixital. Esta iniciativa enmárcase na Lei da lingua propia, aprobada en setembro de 2023.
Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
09 de maio de 2025
Aprender unha nova lingua non só facilita a comunicación, senón que tamén ten efectos positivos no cerebro. Estudos indican que o bilingüismo pode mellorar a memoria, a atención e a capacidade de multitarefa. Ademais, aprender idiomas fortalece as funcións executivas e pode atrasar o deterioro cognitivo relacionado coa idade, contribuíndo así a unha mellor saúde cerebral a longo prazo.
Fonte: Deutsche Welle
09 de maio de 2025
A Facultade de Ciencias Xurídicas e do Traballo da Universidade de Vigo premiou catro estudantes na cuarta edición do certame Xosé Luis Franco, que promove o uso do galego no ámbito legal. Os traballos galardoados abordaron temas actuais e deles o xurado destacou o nivel técnico e lingüístico.
09 de maio de 2025
Un grupo de veciños da Franxa puxo en marcha Lo Pregó de la Franja, un medio dixital en catalán que busca dar voz a este territorio historicamente ignorado nos medios e promover o uso da lingua catalá. A iniciativa, nacida o 23 de abril, aposta pola diversidade dialectal e procura visibilizar a realidade local máis alá da cuestión lingüística.
09 de maio de 2025
Oito entidades catalás únense para lanzar o #repte21dies, unha campaña que convida a usar exclusivamente o catalán durante 21 días, co obxectivo de consolidar este hábito e frear o costume de mudarse ao castelán. A iniciativa, que decorrerá do 12 de maio ao 1 de xuño, busca fortalecer a autoestima lingüística das persoas falantes desta lingua e promover unha actitude colectiva de afirmación, sen renunciar á cortesía nin á convivencia.
09 de maio de 2025
O conselleiro de Cultura, Lingua e Xuventude, José López Campos, acompañado do delegado territorial da Xunta en Pontevedra, Agustín Reguera, e da directora xeral de Xuventude, Lara Meneses, visitou o alumnado de primaria dos centros do Bierzo que participan nunha nova edición das estadías organizadas no marco do Programa de promoción do galego desenvolvido polo Goberno de Castela e León e a Xunta de Galicia nos territorios limítrofes coa Comunidade.
09 de maio de 2025
Unha empresa de Macau creou o DeeCo-Model, o primeiro modelo de intelixencia artificial do país centrado na lingua portuguesa. Esta innovación busca mellorar a tradución entre o chinés e o portugués, reforzando o papel de Macau como ponte entre China e os países lusófonos.
Fonte: Macau Business
09 de maio de 2025
O proxecto interdisciplinario Prosiect Pūtahitanga, liderado pola Universidade de Cardiff, promove a colaboración entre artistas que empregan linguas minoritarias e indíxenas, como o galés e o te reo maorí. Durante o festival FOCUS Wales 2025 en Wrexham, músicos de Gales e Aotearoa Nova Zelandia compartirán escenarios e participarán en debates sobre a revitalización lingüística mediante a música.
08 de maio de 2025
A Real Academia Galega conmemora o Día das Letras cunha serie de vídeos sobre a orixe dos topónimos vencellados ás cantareiras homenaxeadas. A iniciativa, coordinada polo Seminario de Onomástica, explora a etimoloxía dos nomes dos lugares onde naceron as informantes que nutriron o cancioneiro tradicional galego e ofrece unha ollada lingüística e cultural sobre Cerceda, Mens, Malpica e Muxía.
08 de maio de 2025
A Consellería de Educación, Ciencia, Universidades e FP vén de publicar os gañadores do VII Concurso de Podcasts-Radio na Biblio, que convoca en colaboración coa Radio Galega. Oito centros educativos da Baña, Bueu, Cospeito, Ferrol, Laza, Malpica de Bergantiños, Vedra e Vilagarcía de Arousa álzanse cos galardóns deste certame, que nesta edición está dedicado ás cantareiras e á poesía popular oral, ás que se lle rende homenaxe co gallo do Día das Letras Galegas 2025.
Boletín
Subscríbase ao boletín
