Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O conselleiro de Cultura, Educación e Ordenación Universitaria, Xesús Vázquez Abad, participou no acto de entrega do VIII Premio de Narrativa Breve Repsol, que nesta edición recaeu no vigués Santiago Lopo pola súa obra A diagonal dos tolos.
Fonte: Xunta de Galicia
A Consellería de Cultura acaba de anunciar a convocatoria dunha nova liña de subvencións para incrementar a dotación de libros en asturiano nas bibliotecas públicas. Os concellos titulares de centros de lectura integrados na Rede de Bibliotecas do Principado de Asturias deben solicitar axuda económica con esta finalidade.
Fonte: Asturnews
Un informe da Universidade Jaume I reflicte que só 239 dos 1425 profesores desta institución acreditan ter un nivel de inglés de B2 ou superior. A cifra supón un 16,77 % do total do persoal –aínda sube ao 51,39 % se se ten en conta só o persoal que respondeu a enquisa-.
Fonte: El Periódico Mediterráneo
A Confederación de Comercio de Cataluña apoia a Asociación en Defensa do Etiquetado en Catalán para organizar a 31 Mostra de Produtos Etiquetados en Catalán, que terá lugar en Barcelona.
Fonte: Generalitat de Cataluña
Na súa primeira edición, o certame organizado pola Área de Cultura e Educación centrou o seu cartel anunciador nos cómics editados en linguas minoritarias.
Fonte: El Diario
Polo menos 5000 persoas manifestáronse o pasado 8 de novembro na localidade vascofrancesa de Ciboure (departamento de Pireneos Atlánticos) a prol das escolas en lingua vasca. Tratouse dunha das concentracións máis multitudinarias dos últimos anos. Os manifestantes protestaban contra a ameaza de desaloxo dunha escola infantil.
Fonte: La Gazette
A primeira Feira de Linguas Autóctonas de Paraguai terá lugar en Asunción e será unha mostra das diferentes linguas faladas no país. Nesta primeira sesión, que se desenvolverá no Congreso Nacional, haberá salas temáticas para intercambiar criterios sobre as políticas lingüísticas do país e a existencia de linguas estranxeiras en Paraguai, onde o español e o guaraní son as formas de comunicación oficiais.
Fonte: Prensa Latina
A Asociación Ponte… nas Ondas! celebra a duodécima edición da Mostra da Oralidade Galego-Portuguesa, un acto dirixido ao público infantil das dúas beiras do Miño co obxectivo de transmitirlle o seu patrimonio lingüístico común (narración oral, cantos, danzas, música, xogos de lingua etc.).
Fonte: Consello da Cultura Galega
A Mesa pola Normalización Lingüística envioulle un escrito ao Secretario Xeral de Política Lingüística, Valentín García, para lle exixir que cumpra coas funcións que lle encomenda a Lei de normalización lingüística e defenda a oficialidade do galego fronte “aos ataques” que ao seu entender mantén a empresa FCC no conflito coa Mancomunidade de concellos Serra do Barbanza.
Fonte: Galicia Confidencial
A Consellería de Cultura, Educación e Ordenación Universitaria, representada no seu secretario xeral de Política Lingüística, Valentín García, participou no acto de presentación do novo número especial de CompHostelería "Do Womex ao mes do cine e das tapas".
Fonte: Xunta de Galicia
Subscríbase ao boletín
