Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
A Xunta de Galicia presenta GaliciaLe, unha plataforma de préstamo de libros electrónicos que ofrece dous catálogos, un de obras en galego e outro de obras en castelán, de temática diversa (ficción, informática, historia…).
Fonte: Consello da Cultura Galega
O Goberno de Eivisa, a través do seu Departamento de Educación, Cultura e Patrimonio, abriu unha liña de subvencións para o fomento do uso da lingua catalá nos ámbitos do comercio, a restauración, a industria e os servizos de actuacións levadas a cabo durante o ano 2014. Cóntase cunha partida total de 9000 euros para este fin.
Fonte: Diario de Ibiza
O Gremio de Empresarios carniceiros e chacineiros, Gesa Maior e Goly Creations de Vic son os gañadores da XI edición do Premio CCC á mellor iniciativa lingüística no sector comercial. Este galardón, que ten como finalidade recoñecer o esforzo que fan as entidades, empresas e asociacións dos sectores do comercio, os servizos e do turismo para promover o uso do catalán, conta co apoio da Generalitat de Cataluña, a través dos departamentos de Empresa e Emprego, de Cultura (Dirección Xeral de Política Lingüística) e de Benestar Social e Familia (Dirección Xeral para a inmigración).
Mundus21, unha canle de televisión en internet, reunirá vídeos de produción cultural en lingua portuguesa e pretende converterse na maior base de datos mundial nesta área, informou á axencia Lusa a directora xeral do proxecto.
Fonte: Diário digital
O filme en lingua irlandesa An Bronntanas representará a Irlanda na 87 edición dos Premios da Academia, no apartado de mellor filme en lingua non inglesa. A directora executiva da Academia do Cinema e da Televisión de Irlanda (IFTA, polas súas siglas en inglés), Áine Moriarty, declarou que esta decisión será unha grande oportunidade para achegar a lingua nativa de Irlanda a un público internacional máis amplo.
A Consellería de Cultura, Educación e Ordenación Universitaria, a través do secretario xeral de Política Lingüística, presentou a segunda parte da actividade da Rede de Dinamización Lingüística (RDL) “O galego na onda”, centrada na comunicación radiofónica.
Fonte: Xunta de Galicia
Os grupos parlamentarios de PSN, Esquerda-Ezkerra e Geroa Bai rexistraron no Parlamento a proposición de lei de modificación da Lei do éuscaro e que recolle que se atenda o ensino en éuscaro tamén na zona non vascófona de Navarra “en función da demanda”.
Fonte: Noticias de Navarra
Segundo o ministro de Educación de Angola, Pinda Simão, o ensino das linguas nacionais nos primeiros anos de escolaridade está condicionado polo reducido número de profesores.
Fonte: Agência Angola Press
A presidenta do Instituto Camões, Ana Paula Laborinho, afirmou na cidade caboverdiana de Praia que a Universidade de Cabo Verde introducirá en breve unha cátedra de portugués científico na área da educación e a investigación.
Fonte: Sapo
A Federación de Gremios de Editores de España acaba de facer público o seu informe correspondente ao ano 2013. Os datos sinalan que en Galicia continúa a minguar o número de obras editadas por empresas, que no período estudado diminuíu un 10,9 por cento a respecto de 2012.
Fonte: Culturagalega.org
Subscríbase ao boletín
