Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O concurso infantil "Os Bolechas e o Sabichón" volverá percorrer as vilas galegas da man do programa de dinamización lingüística FalaRedes, promovido pola Consellería de Cultura, Educación e Ordenación Universitaria por medio da Secretaría Xeral de Política Lingüística.
Fonte: Xunta de Galicia
O guaná, con tan só catro falantes, é unha das linguas indíxenas que corren perigo de desaparecer en Paraguai. O país suramericano afronta o desafío de preservar os seus 20 idiomas orixinarios e non quere perder parte dunha cultura ancestral que historicamente foi deixada de lado polas súas institucións.
Fonte: Yahoo Notícias
O goberno da cidade luxemburguesa de Differdange decidiu pechar a oferta de cursos de lingua portuguesa e deixará máis de 300 estudantes sen clases de portugués. Membros da comunidade portuguesa de Luxemburgo lamentaron esta medida que achacan á necesidade imposta polo Instituto Camões de que os grupos teñan agora un mínimo de dez alumnos.
Fonte: Mundo português
Un relatorio elaborado pola Universidade de Cambridge revela que as zonas cun índice de desenvolvemento económico máis elevado son as que rexistran maior perda de diversidade lingüística. Segunda a investigadora do estudo, unha das razóns está en que "moitos falantes se ven forzados a adoptar a lingua dominante se non queren verse relegados económica e politicamente".
Fonte: Aljazeera
Un idioma orixinario do norte de Alemaña, o pomerano, continúa vivo no interior do estado brasileiro de Espírito Santo, onde é lingua materna de moitas persoas. A elaboración dun dicionario e a impartición de clases nesta lingua inclúense entre as iniciativas que contribúen á súa preservación.
Fonte: DW
Máis de vinte mozos e mozas están matriculados no novo grao en Ciencias da Linguaxe e Estudos Literarios, a titulación que estrea este curso a Universidade de Vigo.
Fonte: Universidade de Vigo
A Mesa pola Normalización Lingüística denunciou o trato que recibe a lingua galega no municipio de Vilanova de Arousa, onde o Concello "non respecta a oficialidade desta e a exclúe por completo da páxina web institucional".
Fonte: Faro de Vigo
O Conselleiro de Cultura da Generalitat de Cataluña, Ferran Mascarell, presidiu a reunión da Comisión Técnica de Política Lingüística, formada polos secretarios xerais dos departamentos da Generalitat e na que tamén participou a directora xeral de Política Lingüística, Ester Franquesa. O obxectivo é que os diferentes departamentos do Goberno impulsen medidas non só para o fomento e uso da lingua, senón tamén para o seu prestixio.
O Concello de Logroño disporá dun servizo de intérprete de signos presencial e de forma estable, co fin de facilitar información e xestión ao colectivo de persoas xordas, segundo confirmou a súa alcaldesa, Cuca Gamarra.
Fonte: La Rioja.com
Plataforma9 é un novo portal cultural do mundo lusófono que pretende converterse “no sitio de referencia para todas as persoas e institucións interesadas en recibir información fiable e actualizada de todo o que está a acontecer e é preciso saber na cultura e na investigación en e de lingua portuguesa”. No nome de Plataforma9 insírense os nove países da lusofonía: Portugal, Brasil, Angola, Mozambique, Guinea-Bisau, San Tomé e Príncipe, Cabo Verde, Galicia e Timor.
Subscríbase ao boletín
