Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O sitio oficial do Vaticano está agora dispoñible en árabe, a última lingua dun total de dez. O sitio ofrece información sobre o papa, o Vaticano e a Santa Sé e está tamén dispoñible en dispositivos móbiles que empreguen os sistemas de Android e Apple.
Fonte: News.va
Dentro das actividades de dinamización lingüística do Concello de Cambados, a Administración local convoca un concurso de lemas entre os escolares, de maneira que os máis novos se animen a utilizar a lingua galega.
Fonte: Faro de Vigo
A Universidade de Vigo une o mellor das letras galegas coa tecnoloxía saída das súas facultades. A institución aproveita a entrega de premios de poesía, relato curto e tradución 2014 para transmitir en código morse ao espazo a través dos seu satélite Humsat-D o nome de varios autores e o primeiro verso do poema Penélope de Díaz Castro.
Fonte: Faro de Vigo
Compromís presentou unha proposición non de lei á Mesa das Cortes Valencianas pola que lle demanda á Cámara que inste o Goberno central a pór en marcha exames de valenciano para os axentes da Guarda Civil e a Policía Nacional que prestan servizo na Comunidade, porque consideran que vulneran os dereitos dos falantes de valenciano.
Fonte: Las Provincias
Artur Mas remitiulle unha carta ao presidente da Organización Internacional da Franconfonía (OIF), o senegalés Abdou Diouf, na que solicita formalmente a adhesión de Cataluña á OIF, a organización que agrupa os países francófonos.
Fonte: Periodista Digital
A comunidade saami de Finlandia conta agora cunha canle de televisión que ofrece programación en tres variedades diferentes da lingua saami. Cada ano aumenta a presenza da lingua saami nos medios de información en Finlandia grazas ao maior investimento de recursos na promoción da cultura nativa.
Fonte: Barents Observer
Organizacións kurdas de Turquía fixaron no calendario o Día da Lingua Kurda para demandar que esta lingua sexa introducida nos centros públicos de ensino. "Os nenos deben recibir a educación na súa lingua materna", declarou Osman Ozcelik, voceiro da organización Congreso da Sociedade Democrática (DTK).
Fonte: Rudaw
O ministro de Educación de Portugal, Nuno Crato, afirmou que a Unión Europea pretende incrementar a cooperación con universidades africanas e asiáticas, sobre todo con China, e aproba que o ensino dunha segunda lingua estranxeira nas escolas portuguesas sexa obrigatorio.
Fonte: Jornal de Notícias
A comisión de Educación do Senado brasileiro creou un Grupo de Traballo Técnico que ten como obxectivo simplificar, perfeccionar e converter o portugués nunha lingua máis lóxica e comprensible. Todas as propostas serán avaliadas e presentadas no Simposio Internacional Lingüístico-Ortográfico da Lingua Portuguesa, que terá lugar en Brasilia.
Fonte: SRZD
A Universidade do País Vasco ofrecerá, en colaboración co Instituto vasco Etxepare, un novo curso de formación destinado a lectores de lingua vasca en universidades e centros de educación superior no estranxeiro.
Fonte: 20 minutos
Subscríbase ao boletín
